ယူႇတီႈငဝ်ႈငုၼ်းပၢင်သၢင်း တပ်ႉသိုၵ်းဝႃႉ ပွတ်းႁွင်ႇ တေၸတ်းႁဵတ်း ပၢင်ပွႆး ဝၼ်းၵေႃႇတင်ႈငမ်းယဵၼ်တပ်ႉသိုၵ်းဝႃႉ ၶွပ်ႈတဵမ် 30 ပီ ၼႂ်းၵၢင်လိူၼ်ဢေႊပရိူဝ်ႊၼႆႉ။ တပ်ႉသိုၵ်းဝႃႉ ပွတ်းၸၢၼ်း တီႈႁူၺ်ႈဢေႃႈၵေႃႈ တေၸတ်းႁဵတ်းပၢင်ပွႆး မိူၼ်ၵၼ် ဝႃႈၼႆ။
ပၢင်ပွႆးဝၼ်းၵေႃႇတင်ႈငမ်းယဵၼ် တပ်ႉသိုၵ်းဝႃႉ ၶွပ်ႈတဵမ် 30 ပီၼႆႉ တေၸတ်းႁဵတ်း တီႈပၢင်သဝ်း ငဝ်ႈငုၼ်းတၢင်း ပွတ်း ၸၢၼ်းသမ်ႉ တေပဵၼ်တီႈတပ်ႉ 171 ႁူၺ်ႈဢေႃႈ ဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆး ပွတ်းဢွၵ်ႇ တႄႇဢဝ် ဝၼ်းတီႈ 15-17/04/2019 တႃႇၶၢဝ်းတၢင်း 3 ဝၼ်း မိူၼ်ၵၼ်တင်းသွင်တီႈ ဝႃႈၼႆ။
ၵူၼ်းပိုၼ်ႉတီႈ မိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ “ တပ်ႉသိုၵ်းဝႃႉ 171 တီႈႁူၺ်ႈဢေႃႈၵေႃႈ ၶဝ်တေလႅပ်ႈႁဵတ်း ဝၼ်း ၵေႃႇတင်ႈငမ်းယဵၼ် တပ်ႉသိုၵ်းဝႃႉၶဝ် ၶွပ်ႈတဵမ် 30 ပီယူႇၶႃႈ။ ႁဵတ်းသင်ၼႆ ၵွပ်ႈပိူဝ်ႈဝႃႈ သိုၵ်းမၢၼ်ႈပၼ်သုၼ်ႇ ဢုပ်ႉပိူင်ႇ ၶဝ်မႃး တၢင်းပွတ်းပၢင်သၢင်းလႄႈ ပွတ်းၸၢၼ်းၼၼ်ႉၼႃႇ” ဝႃႈၼႆ။
ၸုမ်းၶၢဝ်ႇ ၵၢမ်ႇပေႃးသတၢႆးၵေႃႈ လႆႈတွင်ႈထၢမ် တီႈလုမ်းၵပ်းသၢၼ် ဝႃႉပွတ်းၸၢၼ်းသေ ဢွၵ်ႇဝႆႉဝႃႈ “ ၽိတ်ႈမွၵ်ႇ တင်း မူတ်း။ ၸဵမ်သိုဝ်ႇၶၢဝ်ႇၵေႃႈမွၵ်ႇပႃး။ တေႁပ်ႉတွၼ်ႈၶႅၵ်ႇပီႈၼွင်ႉမႃးၶဝ်ႈႁူမ်ႈ လဵင်ႉၶဝ်ႈၵၢင်ဝၼ်း။ ဝၼ်းတီႈ 17 ယၢမ်း ၵၢင်ၼႂ် တႄႇပၢင်သေ ၼႄတၢင်းၵႃႈ ၸၢဝ်းၶိူဝ်းလႄႈ ၵၢၼ်လဵၼ်ႈႁႅင်းယဝ်ႉၵေႃႈ တေၼႄပႃးၾၢင်ႁၢင်ႈသိုၵ်းၵႂႃႇ” ဝႃႈၼႆ။
တပ်ႉသိုၵ်းမိူင်းဝႃႉၽွမ်ႉႁူမ်ႈၼႆႉ ၽၢတ်ႇဢွၵ်ႇပႃႇတီႇၶွမ်ႊမိဝ်ႊၼိတ်ႉမၢၼ်ႈသေ လူင်းလၢႆးမိုဝ်းၵိုတ်းတိုၵ်းဢဝ်ငမ်းယဵၼ် တင်းလူင်ပွင်ၸိုင်ႈသိုၵ်းမၢၼ်ႈ မိူဝ်ႈ 1989 လိူၼ်ဢေႊပရိူဝ်ႊ ဝၼ်းတီႈ 17 ။ ၽွင်းၼၼ်ႉ လႆႈၸႂ်ၵၼ်ဝႆႉဝႃႈ လွင်ႈၵၢၼ်မိူင်း တႄႉ တေဢုပ်ႇၵုမ်ၸွမ်းလူင်ပွင်ၸိုင်ႈၵူၼ်းမိူင်း ဢၼ်လုၵ်ႉတီႈပၢင်လိူၵ်ႈတင်ႈမႃး ဝႃႈၼႆ။
တပ်ႉသိုၵ်းဝႃႉ UWSA လႆႈသုၼ်ႇၽွင်းငမ်းတူဝ်ၵဝ်ႇမႃး မိူဝ်ႈပီ 2008 ၸွမ်းၼင်ႇပိူင်ငဝ်ႈပိုင်းမိူင်း ဢၼ်တပ်ႉသိုၵ်း လူင်ပွင် ၸိုင်ႈမၢၼ်ႈ ႁဵတ်းဢွၵ်ႇပိုၼ်ၽၢဝ်ႇပဵၼ်တၢင်းၵၢၼ်ၼၼ်ႉ။ ၼႃႈလိၼ်ၽွင်းငမ်းတူဝ်ၵဝ်ႇဝႃႉ ဢၼ်ပႃးဝႆႉ ပၢင်သၢင်း၊ ၼႃး ၽၢၼ်း၊ မၢၵ်ႇမၢင်၊ မိူင်းမႂ်ႇ၊ ပၢင်ဝၢႆလႄႈ ႁူဝ်ပၢင်ႇ 6 ၸႄႈဝဵင်း။
ၽွင်းပီ 2008 ၼၼ်ႉ လူင်ပွင်ၸိုင်ႈသိုၵ်းတဵၵ်းၸႂ်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်း လႅၵ်ႈပဵၼ်ပီႇတူႉၸိတ်ႉ ဢမ်ႇၼၼ် တပ်ႉ ပႂ်ႉလႅၼ်လိၼ် ၸွမ်းၼင်ႇမၢႆမီႈဢၼ်ပႃးၼႂ်းပိူင်ငဝ်ႈပိုင်းမိူင်း 2008 ။ ၵူၺ်းၵႃႈ ၸုမ်းဝႃႉ ဢမ်ႇၽွမ်ႉၸွမ်း ၸင်ႇလႆႈမႃး ဢုပ်ႇ ၵၼ်တင်းလူင်ပွင်ၸိုင်ႈ ဢူးတဵင်းၸဵင်ႇသေ လႆႈလူင်းလၢႆးမိုဝ်းၵိုတ်းတိုၵ်းၸၼ်ႉၸႄႈမိူင်းလႄႈ ၸၼ်ႉမိူင်းႁူမ်ႈတုမ် ၵၼ် ထႅင်ႈၵမ်းၼိုင်ႈမိူဝ်ႈ 6/9/2011 ။
