ၽူႈမီးပုၼ်ႈၽွၼ်းတီႈသူၼ်လူင် National Park လႄႈ ၽူႈလူင်ႉလႅၼ်ႇပၢႆးသၢႆႈ တီႈမိူင်း ၾလေႃႇရီႇတႃႇ (Florida) ၸႂ်ႉပၢႆးသၢႆႈဢၼ်ၶိုတ်းၵၢပ်ႈပၢၼ်သေ ႁူမ်ႈၵၼ်တိၺွပ်း ငူးလိူမ်မႄႈမၢၼ်း ၼႂ်းသူၼ်လိုဝ်ႈသဝ်း။

ငူးလိူမ်ႈတူဝ်ၼၼ်ႉ ၸဝ်ႈၼႃႈတီႈႁူမ်ႈၵၼ်ဝၢင်းၽႅၼ်သေတိလႆႈမိူဝ်ႈဝၼ်းတီႈ 5/4/2019 ။  လူၺ်ႈဢဝ်ၶိူင်ႈသၢႆလူမ်း Radio Transmitters သႂ်ဝႆႉတီႈငူးတူဝ်ပေႃႈသေ ပွႆႇပၼ်ၶိုၼ်း။ ဝၢႆးၼၼ်ႉဢွၼ်ၵၼ်ပႂ်ႉတိသၢႆလူမ်း ငွႆးၸွမ်းလင်ငူးပေႃႈသေ လိုၼ်းသုတ်းၸင်ႇတိလႆႈငူလိူမ် တူဝ်မႄႈမၢၼ်း ဢၼ်မီးၶႆႇၼႂ်းတွင်ႉ 73 လုၵ်ႈ ၼၼ်ႉဝႃႈၼႆ။

ၸုမ်းၶၢဝ်ႇ CNN ပိုၼ်ၽၢဝ်ႇဝႃႈ ၸဝ်ႈၼႃႈတီႈသူၼ်လူင် လၢတ်ႈဝႃႈ “ငူးလိူမ်မႄႈမၢၼ်းတူဝ်ၼႆႉပဵၼ်ၸိူဝ်ႉၽၼ်းငူးလိူမ်မၢၼ်ႈ(မျၢၼ်ႇမႃႉသပဢူင်းမူၺ်ႇ) ၊ တၢင်းယၢဝ်းမီး 17 ထတ်း၊ ပဵၼ်ငူးဢၼ်တူဝ်ယႂ်ႇလိူဝ်ပိူၼ်ႈသုတ်းဢၼ်ယၢမ်ႈတိၺွပ်းလႆႈ။ ၼမ်ႉၼၵ်းငူးမီး 140 ပွင်ႇ( 63 ၵီႊလူဝ်ႊၵရမ်ႊ) ။ ငူးလိူမ်ၼႆႉပဵၼ်တူဝ်ဢၼ်ပၼ်ၽေးၶဵၼ်တူဝ်သတ်းၼႂ်းသူၼ်လူင်ၼႆႉသေပိူၼ်ႈ။ ၸူဝ်ႈမီးငူးလိူမ်ၼႆႉ တူဝ်သတ်းၼႂ်းသူၼ်လူင် လူတ်းယွမ်းလူင်းၵႂႃႇတၢင်းၼမ်”– ဝႃႈၼႆ။

ငူးလိူမ်ၸိူဝ်ႉၽၼ်းမၢၼ်ႈၸိူင်ႉၼႆ တူဝ်ယၢဝ်းသုတ်း ယၢဝ်းထိုင် 20 ပေႇ(ထတ်း)ပၢႆ။ တႄႇလႆႈႁၼ်တီႈမိူင်း Florida , ၸိုင်ႈမိူင်း USA ၸဵမ်မိူဝ်ႈပီ 1980။ ယူႇတီႈၾၢႆႇလဵင်ႉလူတူဝ်သတ်းမိူင်း Florida မၵ်းမၼ်ႈဝႃႈဢမ်ႇၸႂ်ငူးၸိူဝ်ႉၽၼ်းမိူင်းၶဝ်၊   ၵူၼ်းလၵ်ႉလွမ်ဢဝ်တၢင်းပွတ်းၵုၼ်ဢေႊသျိူဝ်ႊ ၶဝ်ႈမႃးလဵင်ႉၼႂ်းမိူင်းၶဝ်သေ မိူဝ်ႈပီ 1992 ၽွင်းလူမ်းလႅင်ႉလူင် ႁႃႊရီႊၶဵၼ်ႊဢႅၼ်ႊတရူႊ ၽတ်ႉပဝ်ႇၼၼ်ႉ ငူးလွတ်ႈဢွၵ်ႇၾၢမ်ႊ လဵင်ႉငူးသေၶဝ်ႈယူႇၼႂ်းပႃႇၼႂ်းထိူၼ်ႇ၊ ပဵၼ်ငူးဢၼ်ၸၢင်ႈပၼ်ၽေး ၸဵမ်ၵူၼ်းၸဵမ်သတ်းလႄႈ လႆႈပၵ်းတႃပႂ်ႉတူၺ်းယူႇတႃႇသေႇ ၶၢဝ်ႇ CNN ဢွၵ်ႇဝႆႉၼင်ႇၼႆ။

ၶေႃႈမုလ်းၶၢဝ်ႇ- CNN