ငဝ်ႈငုၼ်းပႃႇတီႇဝႃႉ ဢၼ်တင်ႈဝႆႉတီႈ ဝဵင်းလႃႈသဵဝ်ႈ ပွၵ်ႉ 1 ၼၼ်ႉ ၶိုၼ်းၶၢႆႉၵႂႃႇပိုတ်ႇတီႈဝဵင်းႁူဝ်ပၢင်ႇယဝ်ႉ ဝႃႈၼႆ။
ငဝ်ႈငုၼ်းပႃႇတီႇၸိူဝ်ႉၸၢတ်ႈဝႃႉၽွမ်ႉႁူမ်ႈ ဢၼ်ပၵ်းလုမ်းငဝ်ႈငုၼ်းဝႆႉတီႈ ပွၵ်ႉ 1 သဵၼ်ႈတၢင်းပိဝ်ႇႁႃႇ တီႈၸႄႈဝဵင်းလႃႈ သဵဝ်ႈ ဢၼ်မီးမႃးၶၢဝ်းတၢင်း 30 ပီပၢႆၼၼ်ႉ မိူဝ်ႈၼႆႉ ဝၼ်းတီႈ 08/04/2019 လႆႈၶၢႆႉၵႂႃႇပိုတ်ႇတီႈဝဵင်းႁူဝ်ပၢင်ႇ ၸိုင်ႈတႆးပွတ်း ႁွင်ႇယဝ်ႉ ဝႃႈၼႆ။
ဢူးသႆႇၼပ်း ၽူႈမီးပုၼ်ႈၽွၼ်း ၼႂ်းပႃႇတီႇဝႃႉ လၢတ်ႈတီႈသိုဝ်ႇၶၢဝ်ႇ DVB ဝႃႈ “ တေႃႈလဵဝ် ငဝ်ႈငုၼ်းပႃႇတီႇဝႃႉ ႁဝ်းၶႃႈ လႆႈၶၢႆႉၵႂႃႇပိုတ်ႇတီႈၼႃႈလိၼ်ၽွင်းငမ်းတူဝ်ၵဝ်ႇဝႃႉ တီႈဝဵင်းႁူဝ်ပၢင်ႇယဝ်ႉၶႃႈ။ ၵဵဝ်ႇလူၺ်ႈ လွင်ႈတၢင်းသေဢၼ်ဢၼ် တႄႉ ဢမ်ႇၸႂ်ႈၶႃႈ။ ၼင်ႇႁိုဝ် ပီႈၼွင်ႉၸၢဝ်းဝႃႉလႄႈ ပႃႇတီႇဝႃႉ ပေႃးတေယူႇၸွမ်းၵၼ် မိုတ်ႈၵိုတ်းၸမ်ၸႂ်ၵၼ်မႃးထႅင်ႈ ၵူၺ်း” ဝႃႈၼႆ။
ပႃႇတီႇၸိူဝ်ႉၸၢတ်ႈဝႃႉၽွမ်ႉႁူမ်ႈ(WNUP) ၼႆႉ ၵေႃႇတင်ႈမႃး မိူဝ်ႈပီ 1989 လိူၼ်ၵျႅၼ်ႊၼိဝ်ႊရီႊ ဝၼ်းတီႈ 31 ပၵ်းလုမ်း ငဝ်ႈငုၼ်း တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ႁၢၼ်ႉတေႃႇပေႃးၶၢႆႉယၢႆႉမႃး ပိုတ်ႇတီႈဝဵင်းႁူဝ်ပၢင်ႇ ယၢမ်းလဵဝ်။
ပႃႇတီႇၸိူဝ်ႉၸၢတ်ႈဝႃႉၽွမ်ႉႁူမ်ႈၼႆႉ မိူဝ်ႈပီ 1993 ထိုင် 2007 လူင်ပွင်ၸိုင်ႈသိုၵ်း ၸတ်းႁဵတ်း ပၢင်ၵုမ်လူင်ၸိူဝ်ႉၸၢတ်ႈ သွင်တူၼ်ႈႁုင်း (တႃႇၶဵၼ်ႇတႅမ်ႈပိူင်ငဝ်ႈပိုင်းမိူင်း) ၼၼ်ႉ လႆႈတုၵ်းယွၼ်းၸႄႈမိူင်းဝႃႉမႃး၊ ထိုင်လူင်ပွင်ၸိုင်ႈသိုၵ်းပိုၼ် ၽၢဝ်ႇ ပိူင်ငဝ်ႈပိုင်းမိူင်း 2008 ပီႈၼွင်ႉဝႃႉၵေႃႈလႆႈၼႃႈလိၼ်ၽွင်းငမ်းတူဝ်ၵဝ်ႇဝႃႉ ဢၼ်ပႃးဝႆႉ ပၢင်သၢင်း၊ ၼႃးၽၢၼ်း၊ မၢၵ်ႇမၢင်၊ မိူင်းမႂ်ႇ၊ ပၢင်ဝၢႆလႄႈ ႁူဝ်ပၢင်ႇ 6 ၸႄႈဝဵင်း။
ၶေႃႈမုလ်း – DVB
