ၾၢႆႇၵူတ်ႇထတ်းၵူၼ်းၶဝ်ႈမိူင်း ႁူမ်ႈၵၼ်လူင်းပိုၼ့်တီႈ တီ့ၺွပ်းလႆႈၵူၼ်းမိူင်းတႆးပွတ်းဢွၵ်ႇ ဢၼ်ဢၢၼ်းၶဝ်ႈႁဵတ်း ၵၢၼ်ၼႂ်းမိူင်းထႆး။
ဝၼ်းတီႈ 07/04/2019 ၸဝ်ႈၼႃႈတီႈ ၾၢႆႇၵူတ်ႇထတ်းၵူၼ်းၶဝ်ႈမိူင်း ဝဵင်းၵဵင်းႁၢႆး ၸိုင်ႈထႆး လူင်းပိုၼ့်တီႈၵူတ်ႇ ထတ်းတီႈႁိူၼ်းလင်ၼိုင်ႈ ဢၼ်မီးၼႂ်းဢိူင်ႇပူင်ႇၽႃ ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး ၸိုင်ႈထႆး။ ထူပ်းႁၼ် ႁႅင်းၵၢၼ်ယၢၼ်မိူင်း 13 ၵေႃ့ လုၵ့်တီႈၵဵင်းတုင်သေ တေဢၢၼ်းၵႂႃႇႁဵတ်းၵၢၼ်တၢင်းၵဵင်းမႆႇလႄႈ မိူင်းၵွၵ်ႇ။
ႁႅင်းၵၢၼ် 13 ၵေႃ့ဢၼ်ၺႃးၺွပ်းၼၼ့် လၢတ်ႈတီႈပလိၵ်ႈဝႃႈ -“ ႁဝ်းၶႃႈဢွၼ်ၵၼ် လုၵ့်တၢင်းဝဵင်းၵဵင်းတုင်မႃးဢေႃႈ ႁဵတ်းဝႂ်ၶၢမ်ႈၶူဝ်ၸူဝ်ႈၶၢဝ်း( ဢၼ်ႁွင့်ဝႃႈ ဝႂ် 7 ဝၼ်း) သေၶဝ်ႈမႃး တေဢၢၼ်းၵႂႃႇႁဵတ်းၵၢၼ်တီႈဝဵင်းၵဵင်းမႆႇ ပေႃးၵႂႃႇၵဵင်းမႆႇၼႆ လႆႈပၼ်ငိုၼ်း 5000 ဝၢတ်ႇ၊ ပေႃးၵႂႃႇမိူင်းၵွၵ်ႇလႆႈပၼ် 15,000 ဝၢတ်ႇ ပေႃးၵႂႃႇၶျူလ်းပူႊရီႊသမ့်လႆႈပၼ် 17,000 ဝၢတ်ႇဢေႃႈ ” ဝႃႈၼႆ။
ၸဝ်ႈၼႃႈတီႈ ၽူႈမီးပုၼ်ႈၽွၼ်းၸင်ႇ ဢဝ်သဵၼ်ႈမၢႆၸိုဝ်ႈသဵင်ဝႆ့သေ သူင်ႇတူဝ်ပွၵ်ႈၶိုၼ်းမိူင်းတႆးၵႂႃႇ ။
ၼၢင်းသိုဝ့် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ဝၢၼ်ႈမိူင်းႁဝ်းဢမ်ႇၶိုၼ်ႈယႂ်ႇ မႂ်ႇသုင်ပဵင်းပိူၼ်ႈသေဢမ်ႇၵႃး သမ့်မီးမႃးလွင်ႈပၼ်ႁႃၵၼ်ထႅင်ႈလႄႈ ႁဝ်းၵူၼ်းဝၢၼ်ႈၵူၼ်းမိူင်းတုၵ့်ၶတႄ့တႄ့ယဝ့် ယူႇဝၢၼ်ႈႁဝ်းၵေႃႈဢမ်ႇလႆႈ ႁဵတ်းၵၢၼ်လီလီ ၵမ့်ၸုမ်းၼၼ့်ယွၼ်းဝႃႇ ၸုမ်းၼႆ့ယွၼ်းဝႃႇ ပေႃးဢမ်ႇပၼ်ၵေႃႈဢမ်ႇလႆႈဝူၼ့်ဝႃႈၵႂႃႇႁႃႁဵတ်းၵၢၼ် တီႈမိူင်းပိူၼ်ႈၸၢင်ႈတေလီၼႆ ဢမ်ႇသၢင်ႇထုၵ်ႇသမ့် ၺႃးၺွပ်းထႅင်ႈ တုၵ့်ၶတႄ့ယဝ့်ၸၢတ်ႈပၢၼ်ၼႆ့” ဝႃႈၼႆ။
ဝူင်ႈဝၢင်ႈၼႆ့ ၸဝ်ႈၼႃႈတီႈပလိၵ်ႈထႆး ၵႆ့ၵူတ်ႇထတ်းတီ့ၺွပ်းလႆႈၵူၼ်းၶဝ်ႈမိူင်းၽိတ်းမၢႆမီႈၶိူဝ်းယႂ်း ၾၢႆႇၼိုင်ႈၼႂ်း မိူင်းတႆးသမ့် ပဵၼ်သိုၵ်းပဵၼ်သိူဝ်လႄႈ ႁဵတ်းႁႂ်ႈၵူၼ်းမိူင်းႁူပ့်တၢင်းယၢပ်ႇတႃႇႁႃၵိၼ်လဵင့်တွင့် ၵမ်ႈၽွင်ႈပၢႆႈၶဝ်ႈ တၢင်းမိူင်းၶႄႇ ၊ ၵမ်ႈၽွင်ႈပၢႆႈၶဝ်ႈတၢင်းမိူင်းထႆး ယၢမ်းလဵဝ်ၾၢႆႇတၢင်း မိူင်းထႆးသမ့်ၶဵင်ႈၶႅင်လွင်ႈႁူမ်ႇလူမ်ႈ၊ ႁဵတ်း ႁႂ်ႈၵူၼ်းလၵ့်ၶဝ်ႈမိူင်းထႆးၺႃးတီ့ၶိူဝ်းယႂ်း။
