ပွႆးလူႇတၢၼ်းယၢတ်ႇၼမ်ႉၵျွင်း ၸတ်းႁဵတ်းတီႈဢိူင်ႇမိူင်းယႃႉ ၸႄႈဝဵင်းၵူတ်ႉၶၢႆ ၸတ်းႁဵတ်းပႃးပၢင်ဢုပ်ႇၶႆႈ/ တၢၼ်ႈၶႆႈ ပိုၼ်ႉႁူႉလေႃးၵလႄႈ ထမ်မ ဝႃႈၼႆ။

ဝၼ်းတီႈ 3-7/4/2019 သင်ၶၸဝ်ႈ လႄႈ တၵ်ႉၵႃႇသတ်ႉထႃး ၸတ်းႁဵတ်းပွႆးလူႇတၢၼ်းယၢတ်ႇၼမ်ႉ ၵျွင်း၊ ၸလွပ်ႈ၊ သိုင်ႇၾႆး၊ ႁူဝ်ႉဝၢင်း၊ ႁွင်ႈဢၢပ်ႇၼမ်ႉ၊ ထၢင်ၽၢႆႈ၊ ႁေႃသွၼ်းၼမ်ႉ၊ ဢွင်ႈတူၺ်းပႃ၊ ပွႆးသၢင်ႇလွင်းလႄႈ ႁူင်းႁဵၼ်းမႂ်ႇ တီႈဝတ်ႉ/ ၵျွင်းပႃမုင်းလူင် ဢိူင်ႇမိူင်းယ ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ။ ၼႂ်းပၢင်ပွႆးလူႇတၢၼ်းယၢတ်ႇၼမ်ႉၼၼ်ႉ ၸတ်းႁဵတ်း ပႃးပၢင်ဢုပ်ႇၶႆႈ/ တၢၼ်ႈၶႆႈ ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႈလိူၵ်ႈတင်ႈ မၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇ ႁွၵ်ႈဝႃႈ “ မိူဝ်ႈဝၼ်းတီႈ 6 ယၢမ်းဝၢႆးဝၼ်း 1 မူင်း ထိုင် 3 မူင်းၼၼ်ႉ ႁဝ်းၶႃႈ ၸတ်းႁဵတ်း ပၢင်တၢၼ်ႈၶႆႈၵၼ် ၵဵဝ်ႇၵပ်းႁူဝ် ၶေႃႈ ဢၼ်ဝႃႈ ပိုၼ်ႉႁူႉလေႃးၵလႄႈ ထမ်မ။ ၼႂ်းပၢင်တၢၼ်ႈၶႆႈၼၼ်ႉ ၶႃႈႁဝ်းၸၢႆးဝၼ်းလႅင်းၶမ်း လႆႈတၢၼ်ႈၶႆႈၼႄ ႁူဝ် ၶေႃႈ ဢၼ်ဝႃႈ ပူၵ်းပွင်လႅၵ်ႈလၢႆႈ လုၵ်ႉတီႈၼႃႈႁိူၼ်းတေႃႇထိုင် ၸိုင်ႈမိူင်း။ ၼၢင်းၶႅမ်ဝၼ်း ၵေႃတႆးသမ်ႉ တၢၼ်ႈၶႆႈၼႄ ၵူၼ်းလႄႈၾိင်ႈလီ။ လိူဝ်ၼၼ်ႉ ၸဝ်ႈတူၼ်ၶူး ဝိၸေယသမ်ႉ တၢၼ်ႈၶႆႈၼႄ လွင်ႈလေႃးၵလႄႈ ထမ်မ ၸိူဝ်းၼႆႉ” ဝႃႈၼႆ။

လိူဝ်ၼၼ်ႉ ၼႂ်းဝၼ်းတီႈ 6 ၵူၺ်းၼင်ႇၵဝ်ႇ ယၢမ်းၵၢင်ၼႂ် သင်ၶၸဝ်ႈလႄႈ တၵ်ႉၵႃႇသတ်ႉထႃး ႁူမ်ႈၵၼ် ၵႂႃႇပိုတ်ႇႁူင်း ႁဵၼ်းမႂ်ႇ ၸၼ်ႉဢွၼ် တီႈဢိူင်ႇမိူင်းယႃႉ။ ဢၼ်ၸဝ်ႈတႃႇၼ ၸိုဝ်ႈႁွင်ႉ Care to Poor Education Group ၸွႆႈၵမ်ႉထႅမ်မႃး ၼၼ်ႉသေ ယူႇတီႈ ၸဝ်ႈၶူးၼၼ်ႇတဝမ်ႇသ၊ ၸဝ်ႈၶူးပၺ်ႇၺႃႇသႃႇမိ တင်း ၸၢႆးဝၼ်းလႅင်းၶမ်း ႁူမ်ႈၵၼ် ၵႅတ်းမၢႆလၢႆႈ ပိုတ်ႇပၢႆႉၵႂႃႇ ဝႃႈၼႆ။

ၸၢႆးဝၼ်းလႅင်းၶမ်း လၢတ်ႈဝႃႈ “ ၶွပ်ႈၸႂ်ထိုင် ၸုမ်း Care to Poor Education Group ဢၼ်မႃးၸွႆႈထႅမ်ပေႃႈမႄႈၵူၼ်းမိူင်း ႁဝ်းၶႃႈ ဢိၵ်ႇလူၺ်ႈ ပီႈၼွင်ႉၼႂ်းဢိူင်ႇၼႂ်းဝၢၼ်ႈႁဝ်းၶႃႈၵူႈၵေႃႉ ႁူင်းႁဵၼ်းၼႆႉ သၢင်ႈဝႆႉ တႃႇလုၵ်ႈဢွၼ်ႇႁဝ်းၶႃႈၵႂႃႇမိူဝ်းၼႃႈ ပဵၼ်ဢၼ်ယိၼ်းၸူမ်းတႄႉတႄႉ လိူဝ်သေၼၼ်ႉ ပၢႆးပၺ်ၺႃၼႆႉ မၼ်းလမ်ႇလွင်ႈတႄႉ ၵွပ်ႈပိူဝ်ႈၼႂ်းထုင်ႉမိူင်းယႃႉၼႆႉ မၼ်း ဢမ်ႇၸႂ်ႈပီႈၼွင်ႉတႆးၵူၺ်းယူႇ တေမီးပီႈၼွင်ႉတဢၢင်း၊ ၶၢင်၊ ၵူဝ်းၵၢင်ႉ၊ လီႇသူးလႄႈ ပီႈၼွင်ႉတႆး ယူႇႁူမ်ႈၸွမ်းၵၼ် မႃး ၼင်ႇႁိုဝ် ႁဝ်းႁႃးပေႃးတေဢမ်ႇၽိတ်းၽႅၵ်ႇၵၼ်၊ ၼင်ႇႁိုဝ် တေၽွမ်ႉႁူမ်ႈၵၼ်ၼၼ်ႉ ႁဝ်းၶႃႈ လူဝ်ႇလႆႈမႃးယူႇတီႈႁူင်း သွၼ်လိၵ်ႈၼႆႉ လုၵ်ႈဢွၼ်ႇႁဝ်းမိူဝ်ႈၼႆႉ ပေႃးၶဝ်လႆႈမႃးယူႇႁူမ်ႈၸွမ်းၵၼ် ပဵၼ်ၵေႃႉပဵၼ်သေႈၵၼ်ၵႂႃႇၸဵမ်လဵၵ်ႉၸိုင် လွင်ႈၽိတ်းၽႅၵ်ႇမေႃးၵၼ်ၵေႃႈ တေဢမ်ႇမီးမႃး” ဝႃႈၼႆ။