UNICEF ပိုၼ်ၽၢဝ်ႇဝႃႈ ၼႂ်းပီ 2018 ၵူၼ်းမိူင်းဢၼ်ယဵပ်ႇၺႃးမၢၵ်ႇၾင်လိၼ်ႁၢင်ႈၵၢင်ဝႆႉၼမ်လိူဝ်ပိူၼ်ႈပဵၼ် ၵူၼ်းမိူင်းတႆး တင်း မိူင်းၶၢင် ဝႃႈၼႆ။
ဝၼ်းတီႈ 04/04/2019 ယူႇတီႈမုၵ်ႉၸုမ်းငိုၼ်းၵွင်ၵၢင်လုၵ်ႈဢွၼ်ႇၵူႈမိူင်းမိူင်း UNICEF ဢွၵ်ႇၶေႃႈပိုၼ် ၽၢဝ်ႇဝႃႈ မိူဝ်ႈပီ 2018 ၼၼ်ႉ ၵူၼ်းမိူင်း ဢၼ်ယဵပ်ႇၺႃးမၢၵ်ႇႁၢင်ႈၵၢင်ဝႆႉ ၸွမ်းလိၼ်ၼၼ်ႉ တိူဝ်ႉၺႃးၵူၼ်းမၢတ်ႇၸဵပ်း 276 ၵေႃႉ ဢၼ်လႆႈ လူႉတၢႆၵႂႃႇသမ်ႉ 48 ၵေႃႉ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ “ ၼႂ်းပီ 2018 ၵူၼ်းယဵပ်ႇၺႃးမၢၵ်ႇတႅၵ်ႇသေ လႆႈမၢတ်ႇၸဵပ်း 276 ၵေႃႉၼၼ်ႉ ၼႂ်းၼၼ်ႉ လုၵ်ႈဢွၼ်ႇပႃး 56 ၵေႃႉ။ ၼႂ်းလုၵ်ႈဢွၼ်ႇ 56 ၵေႃႉၼၼ်ႉ ဢၼ်လႆႈတၢႆယွၼ်ႉမၢၵ်ႇမီး 16 ၵေႃႉ” ဝႃႈၼႆ။
သိုပ်ႇသေၼၼ်ႉ ၼႂ်းပီ 2017 ၼၼ်ႉ ၵူၼ်းမိူင်းယဵပ်ႇၺႃးမၢၵ်ႇသေ လႆႈမၢတ်ႇၸဵပ်းၵႂႃႇ တင်းမူတ်း 176 ၵေႃႉ။ ပီ 2018 ၼႆႉ သမ်ႉ ၵူၼ်းမိူင်းယဵပ်ႇၺႃးမၢၵ်ႇ မီးၵႂႃႇ 276 ၵေႃႉ တေလႆႈဝႃႈ ပီ 2018 ၼႆႉ ၵူၼ်းယဵပ်ႇၺႃးမၢၵ်ႇ ၼမ်တိူဝ်းမႃး လိူဝ်ပီ 2017 ဝႃႈၼႆ။
ၵဵဝ်ႇလူၺ်ႈလွင်ႈၵူၼ်းမိူင်းယဵပ်ႇၺႃးမၢၵ်ႇတႅၵ်ႇၼႆႉ တႄႇဢဝ် ၼႂ်းပီ 2015 – 2018 ၼႆႉ ပဵၼ်ၵူၼ်းမိူင်းတႆး တင်း ၵူၼ်းမိူင်း ၶၢင် ၼမ်တီႈသုတ်း ဝႃႈၼႆ။