ၶူးသွၼ်လႄႈ လုၵ်ႈႁဵၼ်းၸၼ်ႉၸွမ်တူင်ႇၵူၼ်းတႆး ႁူမ်ႈၵၼ်ၸွႆႈထႅမ်ၵူၼ်းဝၢၼ်ႈၵူၼ်းမိူင်း ၸိူဝ်းထူပ်းတၢင်းယၢပ်ႇ ၽိုတ်ႇၺႃးၸၢၵ်ႇပၢင်တိုၵ်း။
ဝၼ်းတီႈ 03/04/2019 မႃးၼႆ့ ၽူႈမီးပုၼ်ႈၽွၼ်း ၸုမ်းၵေႃတႆး ဢႅဝ်ႇယဵမ်ႈသူႇၸႂ်း ၵူၼ်းဝၢၼ်ႈ ၵူၼ်းမိူင်း လၢႆလၢႆဝၢၼ်ႈ ၼႂ်းၸႄႈဝဵင်းၼမ်ႉတူႈလႄႈ ၸႄႈဝဵင်းသီႇပေႃႉ မိူၼ်ၼင်ႇဝၢၼ်ႈၸၢမ်၊ မိူင်းမူ့၊ လူင်မိူတ်ႇ၊ သၢမ်ၶႃ၊ မၢၼ်ႈလီႈ၊ တူၼ်ႈၵႅင်းၸိူဝ်းၼႆ့သေ ၸွႆႈထႅမ်ပၼ်ငိုၼ်းၵမ်ႉၸွႆႈ။
ၸၢႆးလႅင်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ယူႇတီႈလုၵ်ႈႁဵၼ်းၸၼ်ႉၸွမ် တူင်ႇၵူၼ်းတႆး၊ ၶူးသွၼ် ၵေႃလိၵ်ႈလၢႆးဢိၵ်ႇ ၵူၼ်းမိူင်းၵႃလီ့ မႃးႁူမ်ႈငိုၼ်းၵၼ်သေ မႃးၸွႆႈထႅမ်ဢေႃႈ။ ဢၼ်ႁဝ်းၶႃႈ လူင်းပိုၼ်ႉတီႈ ပွၵ်ႈၵမ်းၼႆ့ ႁဝ်းၶႃႈတေတူၺ်းတူၺ်းသေၸွႆႈ မိူၼ်ၼင်ႇႁိူၼ်းဢၼ်ၺႃးၾႆးမႆႈမူတ်းၼၼ်ႉ ႁဝ်းၸွႆႈတႃႇငိုၼ်း 1 လၢၼ်ႉ၊ မၢင်တီႈ ၵေႃႈၸွႆႈ 2 – 3 သႅၼ်ၸိူဝ်းၼႆ့ဢေႃႈ ” ဝႃႈၼႆ။
ဢိင်ၼိူဝ်တပ်ႉသိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းၶိုၼ်ႈလေႃႇတိုၵ်း သိုၵ်းၸၢဝ်းၶိူဝ်းလႄႈသင် ၊ သိုၵ်းၸၢဝ်းၶိူဝ်း ၼင်ႇၵၼ်ၶိုၼ်းတိုၵ်းယိုဝ်းၵၼ်ၸိူဝ်းၼႆ့သေ ႁဵတ်းႁႂ်ႈၵူၼ်းမိူင်းၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇၼႂ်း ၸႄႈဝဵင်း ၼမ်ႉတူႈ၊ သီပေႃ့၊ ၵျွၵ်ႉမႄး ၸိူဝ်းၼႆ့ ဢွၼ်ၵၼ်ပၢႆႈယၢၼ်ႁိူၼ်းယေးတီႈယူႇ ဢမ်ႇၸၢင်ႈႁႃၵိၼ်လဵင့်တွင်ႉ ၊မၢင် ၸိူဝ်းလႆႈၺႃးၸၢၵ်ႇၽေးပၢင်တိုၵ်းသေမၢတ်ႇၸဵပ်းလူ့တၢႆၵေႃႈမီး ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ