ၶွမ်ႊမတီႊလႅၼ်လိၼ် ထႆး – မၢၼ်ႈ ႁူပ့်ထူပ်းဢုပ်ႇဢူဝ်းၵၼ် တႃႇႁႃတၢင်းၵႄႈလိတ်ႈပၼ်ႁႃဢၢႆၵွင့်ဢၢႆၵႂၼ်း ႁူမ်ႈၵၼ် ။
ဝၼ်းတီႈ 02/04/2019 ၶွမ်ႊမတီႊလႅၼ်လိၼ်ထႆး – မၢၼ်ႈ ဢၼ်မီးၸွမ်သိုၵ်းလူင် ဢႃႊသၢၼ်ႊႁႃႊ ၽုၼ်ႊသူႊဝၼ်ႊၾၢႆႇထႆးလႄႈ ၸွမ်သိုၵ်းဢွင်ႇသၢၼ်းဝိၼ်း ၾၢႆႇမၢၼ်ႈဢွၼ်ႁူဝ်ၸုမ်းၸိူဝ်းသေ ႁူပ့်ထူပ်းဢုပ်ႇဢူဝ်းၵၼ် တီႈၶူဝ်မိုတ်ႈၵိုဝ်းမၢႆ 2 ဢိူင်ႇသၢႆလူတ်ႈ ၸႄႈဝဵင်းမႄႈသွတ်ႇ ၸႄႈတွၼ်ႈတၢၵ်ႇ ပိူဝ်ႈတႃႇႁူမ်ႈၵၼ်ၵႄႈလိတ်ႈပၼ်ႁႃဢၢႆၵွင့်ဢၢႆၵႂၼ်း မိူင်းမိုတ်းမူဝ်းတၼ်ၼႂ်း 5 ၸႄႈဝဵင်း ဢၼ်တိတ်းၸပ်းလႅၼ်လိၼ်။
ၸွမ်သိုၵ်းလူင် ဢႃႊသၢၼ်ႊႁႃႊ လၢတ်ႈဝႃႈ – “ ၵူၼ်းဝၢၼ်ႈၵူၼ်းမိူင်းႁဝ်းၶႃႈၼႆ့ တင်းသွင်ၾင်ႇၸိုင်ႈမိူင်းပဵၼ် ၵူၼ်းဢၼ်ႁဵတ်းၵိၼ်ၵၢၼ်ႁႆႈ ၶၢဝ်းၼႆ့သမ့် ပဵၼ်ၶၢဝ်းတႄႇၽဝ်သူၼ်ႁႆႈ တႃႇႁဵတ်းႁႆႈ ဢၼ်ႁဝ်းၶႃႈမႃးႁူပ့်ထူပ်း ဢုပ်ႇဢူဝ်းၵၼ်ၼႆ့ ပဵၼ်ပိူဝ်ႈတႃႇတေႁူမ်ႈၵၼ် ၵႄႈလိတ်ႈပၼ်ႁႃ ဢၢႆၵွင့်ဢၢႆၵႂၼ်းမိူင်းမိုတ်းမူဝ်းတၼ် ” ဝႃႈၼႆ။
မိူင်းထႆးတင်း မိူင်းႁူမ်ႈတုမ်မၢၼ်ႈၼႆ့ လႅၼ်လိၼ်တိတ်းၵၼ်ယၢဝ်း ၼႂ်းမိူင်းတႆး – မိူင်းထႆး ၵေႃႈ တင်ႈတႄႇသၢမ် ၸဵင်ႇၶမ်း – တႃႈၶီႈလဵၵ်း လူင်းၵႂႃႇတၢင်းမႄႈႁွင်ႈသွၼ် ။ လႅၼ်လိၼ် မိူင်းႁူမ်ႈတုမ်မၢၼ်ႈတင်းထႆးၶႅၼ်းယၢဝ်းၵႆ တႃႈၶီႈလဵၵ်း တေႃႇရၼွင်း တၢင်းယၢဝ်းႁဵင်လၵ်းပၢႆ ။ ပၼ်ႁႃဝူင်ႈၵၢင်သွင်မိူင်းၵေႃႈၼမ်၊ ပၼ်ႁႃတုၸရိူၵ်ႈ၊ ပၼ်ႁႃၵူၼ်းၶၢမ်ႈလႅၼ်လိၼ်၊ ပၼ်ႁႃယႃႈမဝ်းၵမ်ဢၼ်လူဝ်ႇႁူမ်ႈၵၼ်ၵႅတ်ႇၵင်ႈပူၵ်းပွင်ၵေႃႈမီးတင်းၼမ်။ ၸႄႈတွၼ်ႈ တႃႈၶီႈလဵၵ်း ၼႆ့မီးႁူးၽၵ်းတူလူင်ၵၢၼ်ၵႃ့ၶၢႆ တႃႈၶီႈလဵၵ်း – မႄႈသၢႆ ၵူၼ်းၶဝ်ႈဢွၵ်ႇ ၼပ့်ဢၢၼ်ႇ ႁူဝ်မိုၼ်ႇ ႁူဝ်သႅၼ်။
