ၶၢဝ်းတၢင်း 2-3 ဝၼ်းမႃး ၼႂ်းၸႄႈဝဵင်းတႃႈၶီႈလဵၵ်း မိူင်းမူဝ်း သုမ်ႇၵုမ်ႈ တင်းဝဵင်းႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းၼႂ်းပိုၼ်ႉ တီႈပဵၼ်ၶေႃၸဵပ်း တႃသႅပ်ႇ ဢႆ ယွၼ်ႉဢၢႆၵႂၼ်းမိူင်းမိုတ်းမူဝ်း။
မိူဝ်ႈဝၼ်းတီႈ 31/03/2019 ၼႂ်းၸႄႈဝဵင်းတႃႈၶီႈလဵၵ်း မိူင်းမူဝ်း(လူမ်းဢမ်ႇသႅၼ်ႈသႂ်) ႁႅင်းၼႃ မီး 500 AQI ပၢႆ ႁႅင်းတီႈ သုတ်း၊ ၵူၼ်းမိူင်း ဢမ်ႇပေႃးႁတ်းဢွၵ်ႇၵႂႃႇၼွၵ်ႈႁိူၼ်း ၵူဝ်ႁူပ်ႉထူပ်းတုမ်ႉတိူဝ်ႉပၢႆးယူႇလီ ဝႃႈၼႆ။
ၵူၼ်းမိူင်းတႃႈၶီႈလဵၵ်း ၵေႃႉၼိုင်ႈ လၢတ်ႈဝႃႈ “ ၼႂ်း 2-3 ဝၼ်းမႃးၼႆႉ မိူင်းမူဝ်း သုမ်ႇၵုမ်ႈလူင်ဝႆႉၶႃႈယဝ်ႉ။ တႃၸဵပ်းသႅပ်ႇ၊ ၶေႃႈၸဵပ်းၵၼ်ၵေႃႈမီး၊ ထူၺ်ႈၸႂ်ယၢပ်ႇတႄႉၶႃႈ။ မၢင်ၵေႃႉ ဢမ်ႇႁတ်းဢွၵ်ႇႁိူၼ်းၵၼ်ၵေႃႈမီးမႃး” ဝႃႈၼႆ။
သိုပ်ႇလၢတ်ႈဝႃႈ “ၵဵဝ်ႇလူၺ်ႈလွင်ႈမိူင်းမူဝ်းၼႆႉ မၼ်းတေၵဵဝ်ႇၵပ်း လွင်ႈၽဝ်ပႃႇ၊ ၽဝ်ထိူၼ်ႇၶႃႈယဝ်ႉ။ လွင်ႈမိူင်းမူဝ်းၼႆႉ ဢမ်ႇၸႂ်ႈဝႃႈ ပဵၼ်တီႈတႃႈၶီႈလဵၵ်းၼႆႉ ဢၼ်လဵဝ်ၵူၺ်း တင်းပွတ်းမိူင်းထႆး ၵဵင်းမႆႇ၊ ၵဵင်းႁၢႆး ၸိူဝ်းၼႆႉၵေႃႈ ပဵၼ်ႁႅင်းဝႆႉ” ဝႃႈၼႆ။
မိူင်းမူဝ်း တီႈၸႄႈဝဵင်းတႃႈၶီႈလဵၵ်းၼႆႉ မိူဝ်ႈဝၼ်းတီႈ 1/4/2019 ႁႅင်းမိူင်းမူဝ်းၼႃ 500 AQI ပၢႆ လူတ်းယွမ်းလူင်းထိုင် 300 ပၢႆ။ မိူဝ်ႈၼႆႉ ဝၼ်းတီႈ 2 ၼႆႉ ၶိုၼ်းယွမ်းလူင်းမႃးထႅင်ႈယူႇ ဝႃႈၼႆ။
“လွင်ႈမိူင်းမူဝ်းၼႆႉ ဢမ်ႇၸႂ်ႈဝႃႈ ပဵၼ်တီႈဝဵင်းတႃႈၶီႈလဵၵ်းဢၼ်လဵဝ်ၵူၺ်း ၼႂ်းမိူင်းတႆးၼႆႉ ၶႂ်ႈဝႃႈ ပဵၼ်ၵူႈတီႈၶႃႈယဝ်ႉ။ ယွၼ်ႉဝႃႈ ၶၢဝ်းလိူၼ်သၢမ်- သီႇၼၼ်ႉ တွၼ်ႈတႃႇတေႁဵတ်းႁႆႈၼႆသေ ၵူၼ်းမိူင်းႁဝ်း ဢွၼ်ၵၼ်ၽဝ်ပႃႇထိူၼ်ႇ” ၵူၼ်းမိူင်း တႃႈၶီႈလဵၵ်းၵေႃႉၼိုင်ႈတႄႉ လၢတ်ႈၼႄၼင်ႇၼႆ။
လိူၼ်သၢမ် လိူၼ်သီႇၼႆႉ ပဵၼ်ၶၢဝ်းမိူင်းမူဝ်း တႃႇႁႂ်ႈမိူင်းမူဝ်းလူတ်းယွမ်းၼၼ်ႉ မိူင်းထႆး သႂ်ႇၸႂ်သႂ်ႇၶေႃး ႁႃလၢႆးတၢင်းၵႄႈ လိတ်ႈသေတႃႉ တွၼ်ႈတႃႇ မိူင်းၸိုင်ႈတႆး/ မိူင်းႁူမ်ႈတုမ်မၢၼ်ႈတႄႉ ဢမ်ႇမီးၸုမ်းလႂ်ပၼ်တၢင်းႁူႉ ပႃးၸဵမ်လူင်ပွင်ၸိုင်ႈ ၼေႇပျီႇတေႃႇ။
