ၸွမ်သိုၵ်းလူင် ပရႃႊယုတ်ႊ ၸၼ်ႊဢူဝ်ႊၶျႃႊ ၸွမ်ၽွင်းလူင် မိူင်းထႆး ဢွၵ်ႇၶၢဝ်းတၢင်း ထိုင်ဝဵင်းၵဵင်းမႆႇ ဢုပ်ႇဢူဝ်း ၽူႈမီးပုၼ်ႈၽွၼ်းသေ ၸီ့သင်ႇသိုၵ်း၊ တပ့်ပလိၵ်ႈႁႂ်ႈဢွၵ်ႇတၢင်း ၼွၼ်းထိူၼ်ႇပႂ့်တူၺ်းၾႆးပႃႇၸွမ်းလႅၼ်လိၼ် ႁႃလၢႆးတၢင်းၵႄႈလိတ်ႈ ပၼ်ႁႃဢၢႆၵွင့်ဢၢႆၵႂၼ်း ။
ဝၼ်းတီႈ 02/04/2019 ၸွမ်သိုၵ်းလူင်ပရႃႊယုတ်ႊ ၸၼ်ႊဢူဝ်ႊၶျႃႊ ၸွမ်ၽွင်းလူင် မိူင်းထႆးလႄႈ ၸုမ်းၸိူဝ်း ဢွၼ်ၵၼ်ဢွၵ်ႇၶၢဝ်းတၢင်းထိုင်ဝဵင်းၵဵင်းမႆႇသေ ႁူပ့်ထူပ်းၽူႈမီးပုၼ်ႈၽွၼ်း ၶႃႈႁၢပ်ႇၵၢၼ်ၶုၼ်လူင်ပွင်ၸိုင်ႈ ႁႃလၢႆးတၢင်းၵႄႈလိတ်ႈပၼ်ႁႃဢၢႆၵွင့်ဢၢႆၵႂၼ်း မိူင်းမိုတ်းမူဝ်းတၼ် ၸီ့သင်ႇႁႂ်ႈၾၢႆႇသိုၵ်း၊ ၾၢႆႇပလိၵ်ႈၼွၼ်းၼႂ်းထိူၼ်ႇ ပေႃးမီးပၼ်ႁႃ မႃးႁႂ်ႈၸၢင်ႈၵႄႈလိတ်ႈလႆႈ ၶိုတ်းတၼ်းၶၢဝ်းယၢမ်း ။
ၸွမ်သိုၵ်းလူင် ပရႃႊယုတ်ႊၸၼ်ႊဢူဝ်ႊၶျႃႊ လၢတ်ႈဝႃႈ -“ ငဝ်းလၢႆးၾႆးပႃႇမိူဝ်ႈလဵဝ်ၼႆ့ ၶႂ်ႈႁၢႆ့ႁႅင်းမႃးၵူႈမိုဝ့်ၵူႈဝၼ်း ယူႇတီႈႁဝ်းလူင်ပွင်ၸိုင်ႈသေ တေၶတ်းၸႂ်ႁႃလၢႆးတၢင်းတႃႇတေ ၵႄႈလိတ်ႈပၼ်ႁႃ ၼႂ်းၶၢဝ်းတၢင်း 7 ဝၼ်း ဢၢၼ်းႁႂ်ႈဢၢႆၵွင့်ဢၢႆၵႂၼ်းလူတ်းယွမ်း ၊ ႁူမ်ႈထိုင်ယွၼ်းတၢင်းႁူမ်ႈမိုဝ်းထိုင်ၵူၼ်းဝၢၼ်ႈၵူၼ်းမိူင်း ႁႂ်ႈၵိုတ်းၵၢၼ်ၽဝ်ပႃႇ သင်ဝႃႈၽႂ်ထူပ်းႁၼ်ၵူၼ်းၽဝ်ပႃႇၼႆ ႁႂ်ႈၸႅင်ႈၽူႈမီးပုၼ်ႈၽွၼ်း တႃႇဢဝ်ၵူၼ်းႁဵတ်းၽိတ်းပၼ်တူတ်ႈတၢမ်ႇ ၵႂႃႇ ၸွမ်းၼင်ႇမၢႆမီႈဝၢၼ်ႈမိူင်းမီးၼၼ့် ” ဝႃႈၼႆ။
ၵဵဝ်ႇလူၺ်ႈလွင်ႈပၼ်ႁႃ ဢၢႆၵွင့်ဢၢႆၵႂၼ်းသေ ယူႇတီႈလူင်ပွင်ၸိုင်ႈထႆးလႄႈ မၢၼ်ႈၵေႃႈ ႁူပ့်ဢုပ်ႇၵၼ်တႃႇႁူမ်ႈ ၵၼ်ၵႄႈလိတ်ႈပၼ်ႁႃ။
တီႈၼႂ်းမိူင်းၸိုင်ႈထႆးၼၼ့် ဢၢႆၵွင့်ဢၢႆၵႂၼ်းပဵၼ်ယွၼ့်ၾႆးပႃႇၼႂ်း 8 ၸႄႈတွၼ်ႈ ၼႂ်းၸိုင်ႈထႆးပွတ်း ၼိူဝ်ၼႆ့ႁဵတ်း ႁႂ်ႈဝဵင်းၵဵင်းမႆႇ ပဵၼ်မိူင်းဢၼ်မီးဢၢႆၵွင့်ဢၢႆၵႂၼ်း မိူင်းမူဝ်းႁၢႆ့ႁႅင်းသုတ်းမၢႆ 1 ၼႂ်းလုမ်ႈၾႃ့ ၸွမ်းၼင်ႇဢၼ် Website Air Visual ပိုၼ်ၽၢဝ်ႇ၊ ထိုင်တီႈၸၼ့်ၸွမ်၊ ႁူင်းႁဵၼ်းပႃးၸဵမ်သၢႆၵၢၼ် မိၼ်ၸိူဝ်း ၼႆ့လႆႈၵိုတ်း။ လိူဝ်ၼၼ့် ယင်းဢွၵ်ႇပၵ်းပိူင်ဝႆ့ပႃးဝႃႈ ပေႃးၽႂ်ၽူႈလႂ်ၽဝ်ပႃႇၼႆ တေၺႃးမႂ်ငိုၼ်း 20,000 – 2,000, 000 ဝၢတ်ႇ တူၵ်းၶွၵ်ႈ 1 ပီ ထိုင် 20 ပီ ၼႆယဝ့်။