မၢၵ်ႇတႅၵ်ႇတိူဝ့်သႂ်ႇ ၵူၼ်းမၢၼ်ႈလီႈ ၼႂ်းၵႄႈသဵၼ်ႈတၢင်း ၼမ့်တူႈ – သီႇပေႃ့ တႅၵ်ႇတိူဝ့်သႂ်ႇ ၵူၼ်းမိူင်း တၢႆထင်တီႈ 3 ၵေႃ့ မၢတ်ႇၸဵပ်း 4 ၵေႃ့။
ဝၼ်းတီႈ 30/03/2019 ယၢမ်းၵၢင်ၼႂ် မွၵ်ႈ 6 မူင်း ၵူၼ်းမၢၼ်ႈလီႈ မွၵ်ႈ 10 ၵေႃ့ ဢွၼ်ၵၼ်ၵႂႃႇႁဵတ်းႁႆႈ ၾၢႆႇဢွၵ်ႇဝၢၼ်ႈမၢၼ်ႈလီႈ ဢိူင်ႇ ၵျွင်းသႃႇ ၸႄႈဝဵင်းၼမ့်တူႈ ၸႄႈတွၼ်ႈၵျွၵ့်မႄး ၸိုင်ႈတႆးပွတ်းႁွင်ႇ။ ၽွင်းၵႂႃႇႁဵတ်းၵၢၼ်ၼၼ့် ၵႂႃႇၽႃႇၺႃးမၢၵ်ႇသေ တႅၵ်ႇတိူဝ့်သႂ်ႇ ၸွမ်းတူဝ် ၸွမ်းၶိင်း လႆႈလူ့တၢႆ ထင်တီႈ 3 ၵေႃ့ မၢတ်ႇၸဵပ်း 4 ၵေႃ့ ၼႂ်းၵူၼ်းမၢတ်ႇၸဵပ်း 4 ၵေႃ့ ပဵၼ်ၼၢင်းယိင်း တင်းမူတ်း ဝႃႈၼႆ။
ၵူၼ်းမိူင်းသီႇပေႃ့ ၵေႃ့ၽူႈၶဝ်ႈၸွႆႈထႅမ် လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈ 3 ၵေႃ့ ဢၼ်လႆႈတၢႆၵႂႃႇၼၼ့် ၼၢင်းဢေးဢွင်ႇ ဢႃယု 14 ပီ၊ ၸၢႆးလၢဝ် ဢႃယု 15 ပီလႄႈ ၸၢႆးႁိူင်း ဢႃယု 34 ပီ။ ဢၼ်မၢတ်ႇၸဵပ်း 4 ၵေႃ့ၼၼ့် တႃႇ 3 ၵေႃ့ လႆႈယူတ်းယႃတူဝ်ဝႆ့တီႈ ႁူင်းယႃ သီႇပေႃ့ တႃႇၵေႃ့ၼိုင်ႈတႄ့ ယွၼ့်ဝႃႈ မၢတ်ႇၸဵပ်းႁၢဝ်ႈႁႅင်းသေ လႆႈသူင်ႇယူတ်းယႃ တူဝ်တီႈ လႃႈသဵဝ်ႈ လႆႈငိၼ်းဝႃႈ လုၵ့်တီႈႁူင်း ယႃ လႃႈသဵဝ်ႈသေ သိုပ်ႇသူင်ႇၵႂႃႇတီႈႁူင်းယႃလူင် ဝဵင်းလိူဝ်ႇယဝ့်” ဝႃႈၼႆ။
တၢင်းပွတ်း မၢၼ်ႈလီႈၼႆ့ မီးသိုၵ်းဢၼ်တူင့်ၼိုင်ၵႂႃႇ မႃးမိူၼ် တပ့်သိုၵ်းလူင်ပွင်ၸိုင်ႈမၢၼ်ႈ၊ သိုၵ်း TNLA၊ သိုၵ်း SSPP လႄႈ RCSS တင်းသိုၵ်းလူင်ပွင်ၸိုင်ႈမၢၼ်ႈၸိူဝ်းၼႆ့။
“ လွင်ႈၼႆ့ တိူဝ့်သႂ်ႇၽႂ်ၵေႃႈ မၼ်းဢမ်ႇလီ တိူဝ့်သႂ်ႇသိုၵ်းၵေႃႈ မၼ်းဢမ်ႇလီ တိူဝ့်သႂ်ႇၵူၼ်းမိူင်းၵေႃႈ မၼ်းဢမ်ႇလီ။ ထႅင်ႈၾၢႆႇၼိုင်ႈၵေႃႈ ဢၼ်ပဵၼ်ပၢင်တိုၵ်းၵၼ်ယူႇၼႆ့ သမ့်ပဵၼ်သိုၵ်းႁဝ်းၼင်ႇၵၼ်ၵမ်ႈၼမ်ၵူၺ်း ပဵၼ်ၵၼ်ႁႅင်း။ ဢၼ်ပဵၼ်ၸွမ်းသိုၵ်းမၢၼ်ႈၼၼ့် မၢင်ပွၵ်ႈ မၢင်လႂ်ၵူၺ်း။ လွင်ႈႁဝ်းၼင်ႇၵၼ် ယိုဝ်းၵၼ်ၼႆ့ မၼ်းမႃးတုမ့်ယွၼ်ႈ(သၢင်ႈ) ၵူၼ်းမိူင်းတႄ့တႄ့ၶႃႈယဝ့်” ဝႃႈၼႆ။
ၵဵဝ်ႇၵပ်းလွင်ႈမၢၵ်ႇတႅၵ်ႇတိူဝ့်သႂ်ႇၵူၼ်းမိူင်း ဢၼ်လႆႈလူ့တၢႆ 3 ၵေႃ့ မၢတ်ႇၸဵပ်း 4 ၵေႃ့ၼႆ့ ပဵၼ်မၢၵ်ႇၸုမ်းလႂ် ႁၢင်ႈၵၢင်ဝႆ့ ဢၼ်ဝႃႈၼၼ့် ဢမ်ႇလႆႈႁူ့ ဝႃႈၼႆ။
RCSS ပိုၼ်ၽၢဝ်ႇတီႈဝႅပ်ႊသၢႆႊတႆးလွတ်ႈလႅဝ်း TaiFreedom.com ဝႃႈပဵၼ်သိုၵ်း TNLA ႁၢင်ႈၵၢင် ၾၢႆႇ TNLA ႁွင်ႈၵၢၼ်ၶၢဝ်ႇ ပိုၼ်ၽၢဝ်ႇဝႃႈ ထုင့်ၼၼ့် ဢမ်ႇမီးသိုၵ်း TNLA တူင့်ၼိုင် ဝႃႈၼႆ။
