လုၵ်ႈဢွၼ်ႇ ဢႃယု 4 ၶူပ်ႇ ၵူၼ်းမိူင်းၵိုင် ပုၼ်းပူၵ်ႇဢွၵ်ႇသူပ်းသေ လူႉတၢႆ ဝၢႆးလင်မၼ်းၸၢႆးၵိၼ်ၺႃးတၢင်းၵိၼ် (မၢၵ်ႇဢူမ်) ဢၼ်လုၵ်ႉမိူင်းၶႄႇမႃး ဝႃႈၼႆ။
ဝၼ်းတီႈ 22/03/2019 ယၢမ်းဝၢႆးဝၼ်း 1:30 မူင်းၼၼ်ႉ ဢွၼ်ႇၸၢႆးၸိုဝ်ႈႁွင်ႉ ၸၢႆးၵွင်တႆး ဢႃယု 4 ၶူပ်ႇ ပဵၼ် လုၵ်ႈၸၢႆး ၸၢႆးၶိူဝ်းလီ လႄႈ ၼၢင်းလႃႉယဵၼ်ႇ ၵူၼ်းဝၢၼ်ႈၵုင်းလူမ်း ပွၵ်ႉ 6 ၸႄႈဝဵင်းမိူင်းၵိုင် ၸိုင်ႈတႆးပွတ်း ၸၢၼ်းၵိၼ် ၺႃးမၢၵ်ႇဢူမ်သေ လႆႈလူႉတၢႆပႅတ်ႈ ဝႃႈၼႆ။
ၵူၼ်းမိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၸၢႆး ၵိၼ်မၢၵ်ႇဢူမ် ဢၼ်မႃးတၢင်းမိူင်းၶႄႇၼၼ်ႉ ၼႂ်း မၼ်းတေ မီးယူႇ 9 လုၵ်ႈ။ ၼမ်ႉလႅမ်ႉဢရသႃႇမၼ်းတႄႉ ၸဵမ်းႁိုၼ်းဝႆႉ။ မၼ်းၸၢႆးလႆႈၵိၼ်ၵႂႃႇ မွၵ်ႈ 4 လုၵ်ႈသေ ၶၢင်းဝႃႈတွင်ႉၸဵပ်းၼႆလႄႈ ၼႅတ်ႈဢဝ်ၵႂႃႇႁူင်းယႃ ၵူၺ်းဢမ်ႇတၼ်းထိုင်ႁူင်းယႃ ၵႂႃႇတၢင်းႁိုင် မွၵ်ႈ 15 မိၼိတ်ႉ ၵူၺ်း တီႈသူပ်းမၼ်းၸၢႆးၼၼ်ႉ ဢွၵ်ႇပုၼ်းပူၵ်ႇမႃးသေ လႆႈလူႉတၢႆၵႂႃႇၸွမ်းတၢင်း” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၵေႃႉပဵၼ်ပေႃႈ/မႄႈလႄႈ ပီႈၼွင်ႉၸိူဝ်ႉၶိူဝ်းပီႈၼွင်ႉ လႆႈဢွၼ်ၵၼ်ပူၼ်ႉၶၢပ်ႈတူဝ် ဢွၼ်ႇၸၢႆး ၸၢႆးၵွင်တႆး ဢႃယု 4 ၶူပ်ႇ ၼႂ်းဝၼ်းၼၼ်ႉၵမ်းလဵဝ် ဝႃႈၼႆ။