သုၼ်ၵၢင်ငမ်းယဵၼ် မႄးလီၼႂ်းၸိူဝ်ႉၸၢတ်ႈ NRPC လႄႈ ၸုမ်းယိပ်းၵွင်ႈၵၢင်ႇ ဢၼ်ပႆႇလူင်းလၢႆးမိုဝ်း NCA 8 ၸုမ်း ႁူပ်ႉဢုပ်ႇ ၵၼ် တီႈၼေႇပျီႇတေႃႇ သွင်ၾၢႆႇလႆႈၸႂ်လၢႆၶေႃႈ ပႃးလွင်ႈတေႁူမ်ႈၵၼ်လူတ်းယွၼ်ႇပၢင်တိုၵ်း။

ဝၼ်းတီႈ 21/03/2019 သုၼ်ၵၢင်ငမ်းယဵၼ် မႄးလီၼႂ်းၸိူဝ်ႉၸၢတ်ႈ NRPC တင်း တူဝ်တႅၼ်း ၸုမ်းယိပ်းၵွင်ႈၵၢင်ႇ EAO 8 ၸုမ်း ဢၼ်ပႆႇလူင်းလၢႆးမိုဝ်း NCA ႁူပ်ႉဢုပ်ႇၵၼ်တီႈလုမ်း NRPC ၼေႇပျီႇတေႃႇသေ တႅပ်းတတ်း ဢွၵ်ႇ ၶေႃႈပိုၼ် ၽၢဝ်ႇ ႁူမ်ႈၵၼ် လၢႆလၢႆၶေႃႈ။

ၵဵဝ်ႇၵပ်းလွင်ႈပၢင်ႁူပ်ႉထူပ်းၼၼ်ႉသေ ၽူႈၶၢၼ်ပၢၵ်ႇပႃႇတီႇမႂ်ႇသုင်ၸိုင်ႈတႆး SSPP ၸဝ်ႈႁၢၼ်ၽူင်းႁၢၼ် လၢတ်ႈဝႃႈ “ပၢင်ႁူပ်ႉထူပ်းၵၼ်ၼႆႉ ၶိုၵ်ႉၶၵ်ႉလႄႈ ၸုမ်းလႂ်ၵေႃႈ ဢမ်ႇလႆႈႁၢင်ႈႁႅၼ်းမႃးလီ။ ပဵၼ်ၾၢႆႇ NRPC ၶဝ်ႁႅၼ်းၵူၺ်း၊ ၸုမ်း ဢၼ်မႃးဢုပ်ႇၼႆႉ ငဝ်းလၢႆးဢမ်ႇမိူၼ်ၵၼ်၊ ဝႃႉ၊ မိူင်းလႃး၊ ႁဝ်း တင်း KNPP ၸိူဝ်းၼႆႉ လူင်းလၢႆးမိုဝ်း ၸၼ်ႉၸႄႈမိူင်း၊ မိူင်းႁူမ်ႈတုမ်ဝႆႉ၊ တၢင်ႇၸုမ်းသမ်ႉ ပႆႇလူင်း၊ ပိူင်လူင်တႄႉ ၼႂ်းၶၵ်ႉၵၢၼ်လွင်ႈငမ်းယဵၼ်ၼႆႉ ႁႂ်ႈလႆႈၶဝ်ႈပႃးၵူႈမူႇ ၵူႈၸုမ်း ၼၼ်ႉယဝ်ႉ” ဝႃႈၼႆ။

ၼႂ်းၶေႃႈပိုၼ်ၽၢဝ်ႇၼၼ်ႉတႄႉ (1) တႃႇလူတ်းယွမ်းပၢင်တိုၵ်း၊ (2) တေသိုပ်ႇဢုပ်ႇဢူဝ်းငူပ်ႉငီႉၵၼ်တႃႇႁႂ်ႈဝၢၼ်ႈမိူင်း ၵတ်းယဵၼ်ၼိမ်သဝ်း။ (3) သွင်ၾၢႆႇတေႁူမ်ႈၵၼ်ပူၵ်းပွင်ပၼ်ၵူၼ်းမိူင်း ၼႂ်းပိုၼ်ႉတီႈႁုၼ်ႈမုၼ်းၶိုၼ်ႈယႂ်ႇ၊ (4) တႃႇႁူမ်ႈၵၼ်ၵႄႈလိတ်ႈပၼ်ႁႃၵၢၼ်မိူင်း၊ (5) ႁႂ်ႈမီးၽူႈယူႇၵၢင်တႅပ်းတတ်းလႆႈၼၼ်ႉ ၶဝ်ႈပႃးသေ ၵႆႉႁဵတ်းပၢင်ၵုမ်ၵႂႃႇ ၸဵမ်ၸိူဝ်းၼႆႉ။

ၼႂ်းၶေႃႈပိုၼ်ၽၢဝ်ႇၼၼ်ႉပႃးလွင်ႈတေလူတ်းယွၼ်ႇပၢင်တိုၵ်းၼႆသေတႃႉ တွၼ်ႈတႃႇတေႁူပ်ႉ ဢုပ်ႇတူဝ်တႅၼ်းၸုမ်း သိုၵ်းလူင်ပွင်ၸိုင်ႈ ၼႂ်းဝၼ်းမိူဝ်ႈၽုၵ်ႈတႄႉ ယွၼ်ႉဢမ်ႇလႆႈတၢင်ႇႁူဝ်ၶေႃႈဢုပ်ႇဢူဝ်းဝႆႉလႄႈ ဢမ်ႇပဵၼ်ယဝ်ႉ လႆႈႁူႉ ၼင်ႇၼႆ။

ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 8 ၸုမ်း ဢၼ်ပႆႇလူင်းလၢႆးမိုဝ်းၵိုတ်းတိုၵ်း NCA ၵႂႃႇႁူပ်ႉ NRPC ၶွင်လူင်ပွင်ၸိုင်ႈ တီႈၼေႇပျီႇ တေႃႇၼၼ်ႉ ၸိူဝ်းပဵၼ်လုၵ်ႈၸုမ်း FPNCC ၼၼ်ႉ ၸုမ်းသိုၵ်းဝႃႉ UWSA ဢွၼ်ႁူဝ် 7 ၸုမ်း ပႃးမိူင်းလႃး NDAA ၊ ၵူဝ်းၵၢင်ႉ MNDAA ၊ တဢၢင်း TNLA၊ ၶၢင် KIA၊ ဝၢၼ်ႈႁႆး SSPP/SSA ၊ ရၶႅင်ႇ AA ။ ယၢင်းလႅင် KNPP တႄႉ ၵႂႃႇတူဝ်တႅၼ်းသိုၵ်း/ တူဝ်တႅၼ်းလူင်ပွင်ၸိုင်ႈၵႂႃႇႁင်းၶေႃမိူဝ်ႈပူၼ်ႉမႃးဝၼ်းတီႈ 19/03/2019 ယွၼ်ႉ KNPP ဢမ်ႇၸႂ်ႈ လုၵ်ႈၸုမ်း FPNCC ဝႃႈၼႆ။

ပႂ်ႉသိုပ်ႇဢၢၼ်ႇတေႃႇ ၶေႃႈထၢမ်တွပ်ႇ ၸဝ်ႈႁၢၼ်ၽူင်းႁၢၼ် ထႅင်ႈသေၵမ်းၶႃႈ။