သိုၵ်းတႆး 2 ၸုမ်း ဢမ်ႇတိုၵ်းတေႃးၵၼ် ယူႇယဵၼ်ဝႆႉႁင်းၽႂ်မၼ်းလႄႈ ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉ တီႈ ဝတ်ႉဝႃးၽႃသိူဝ်ႇ ၼႂ်းၸႄႈဝဵင်းသီႇပေႃႉၼႆႉ တေႃႈလဵဝ် ဢွၼ်ၵၼ်ပွၵ်ႈ ၶိုၼ်းႁိူၼ်းယေးၽႂ်မၼ်းၵမ်ႈၽွင်ႈယဝ်ႉ။
ဝၼ်းတီႈ 20/03/2019 ယၢမ်းၵၢင်ၼႂ် မွၵ်ႈ 9 မူင်း ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉၽူဝ်းတေႃႇ ပွၵ်ႉၸၢင်ႈ ၶမ်းၸၢၼ်း ၸႄႈဝဵင်းသီႇပေႃႉ ႁူဝ်ၵူၼ်း 146 ၵေႃႉ ၵူၼ်းဝၢၼ်ႈတႃႈတေႈ ဢိူင်ႇတႃႈတေႈ ဢွၼ်ၵၼ်ပွၵ်ႈမိူဝ်းၶိုၼ်းႁိူၼ်း ယေးၽႂ်မၼ်းယဝ်ႉ ဝႃႈၼႆ။
ၶွမ်ႊမတီႊ ၸွႆႈထႅမ်ၵူၼ်းပၢႆႈၽေးသိုၵ်း တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၶႂ်ႈဝႃႈ ငဝ်းလၢႆးၼႂ်းပိုၼ်ႉတီႈ ၼိမ်သဝ်း သေ ၵူၼ်းပၢႆႈၽေးသိုၵ်းႁဝ်း ဢၼ်မႃးသွၼ်ႈဝႆႉ ၸွမ်းဝတ်ႉဝႃးၽႃသိူဝ်ႇ ဢွၼ်ၵၼ်ပွၵ်ႈႁိူၼ်းၶိုၼ်းၵမ်ႈၽွင်ႈယဝ်ႉ။ ၼႂ်း ၶၢဝ်းတၢင်း 2-3 ဝၼ်းမႃးၼႆႉ ၵူၼ်းပၢႆႈၽေးသိုၵ်းႁဝ်း ဢွၼ်ၵၼ်ပွၵ်ႈၵမ်ႈၽွင်ႈ ၶႂ်ႈဝႃႈမီးၵူႈဝၼ်း” ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉတႄႉ တီႈဝတ်ႉၼမ်ႉသိမ်ႇ 36 ၵေႃႉ ပဵၼ်ၵူၼ်းဝၢၼ်ႈပၢင်ႇလေႃႉ၊ ဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄး။ တီႈဝတ်ႉမၢၼ်ႈလီႈ 1,354 ၵေႃႉ ၵူၼ်းဝၢၼ်ႈပႃႇၵၢင်း၊ လွႆငိုၼ်း။ တီႈဝတ်ႉၼႃး မၢၵ်ႇၶေႃ 133 ၵေႃႉ ၵူၼ်းဝၢၼ်ႈတူၼ်ႈၵႅင်း၊ တႃႈလူင်၊ ႁူဝ်ၼႃး။ တီႈသိုင်ႇ ဢူးလႃႉၽူၼ်း ဝၢၼ်ႈၼႃးလွႆ 111 ၵေႃႉ ၵူၼ်းဝၢၼ်ႈလွႆမွၵ်ႇ။ ဝတ်ႉပၢင်ၼိူဝ် 123 ၵေႃႉ ၵူၼ်းဝၢၼ်ႈပၢင်လူင် ၸႄႈဝဵင်းၼမ်ႉတူႈ။ ဝတ်ႉၼမ်ႉႁူးၼွႆႉ 51 ၵေႃႉ ၵူၼ်းဝၢၼ်ႈပၢင်လူင် ၸႄႈဝဵင်းၼမ်ႉတူႈ တင်းမူတ်း 1,808 ၵေႃႉဝႃႈၼႆ။
မိူဝ်ႈဝၼ်းတီႈ 18/03/2019 ယၢမ်းၵၢင်ဝၼ်းမွၵ်ႈ 11 မူင်းၼၼ်ႉ ၵူၼ်းပၢႆႈၽေးသိုၵ်း တီႈဝတ်ႉ 2500 ပွၵ်ႉဝဵင်းၸၢၼ်း သမ်ႉ ႁူဝ်ၵူၼ်း 251 ၵေႃႉ၊ တီႈႁူင်းႁဵၼ်းၸၼ်ႉဢွၼ် တူင်ႈၸၢင်ႉ 262 ၵေႃႉလႄႈ တီႈဝတ်ႉၽူဝ်းတေႃႇ ပွၵ်ႉၸၢင်ႈၶမ်း ၸၢၼ်းသမ်ႉ 66 ၵေႃႉ လႆႈဢွၼ်ၵၼ်ပွၵ်ႈၶိုၼ်းႁိူၼ်းၽႂ်မၼ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ