ၸိုင်ႈတႆးပွတ်ႁွင်ႇ ၼႂ်းၸႄႈဝဵင်းသီႇပေႃႉၼၼ်ႉ ၾႆးၾႃႉသျွၵ်ႉသေ ၾႆးမႆႈဝတ်ႉၵျွင်းလင်ၼိုင်ႈ ဢမ်ႇလိူဝ်သင်ၵႃႈ ၶၼ်ငိုၼ်းဢၼ်သုမ်းၸွမ်းၾႆးၼပ်ႉပၢၵ်ႇသႅၼ်။
ဝၼ်းတီႈ 20/03/2019 ၶၢဝ်းယၢမ်းၵၢင်ၼႂ် 2 မူင်း ၾႆးၾႃႉသျွၵ်ႉသေ ႁဵတ်းႁႂ်ႈၾႆးမႆႈၵျွင်းမုၼ်ၸဝ်ႈ တီႈဝတ်ႉၵွင်းမူး ဝၢၼ်ႈၼႃးၼိဝ်ႉ လၵ်းတႅင်ႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ႁဵတ်းႁႂ်ႈ ၶူဝ်းၶွင်ၼႂ်းၵျွင်းလူင်လႄႈ ၵႃးၸဝ်ႈၵွၼ်းဝတ်ႉ ၺႃးမႆႈၵႂႃႇၼပ်ႉပဵၼ်ငိုၼ်း 500 သႅၼ်ၵျၢတ်ႉ ။
လုင်းၵေႃးတ ပူႇၵႄႇ ဝၢၼ်ႈၼႃးၼိဝ်ႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၾႆးမႆႈၽွင်းၵၢင်ၼႂ်ၸဝ်ႉဢေႃႈ ပဵၼ် ၽွင်းၶၢဝ်းၼွၼ်းလပ်းလီ ယွၼ်ႉဝႃႈယူႇဝၢၼ်ႈၼွၵ်ႈလႄႈ ၸုမ်းၶႄၾႆးၵေႃႈဢမ်ႇမီး ယူႇတီႈႁဝ်းၵူၼ်းဝၢၼ်ႈသေ လႆႈၸွႆႈၵၼ်ဢဝ်ထူဝ်ႈၵႂႃႇတၢင်ႇၼမ်ႉသေ မွတ်ႇၵူၺ်းၶႃႈဢေႃႈ ယွၼ်ႉၼၼ်ၾႆးလႆႈမႆႈၵျွင်းလူင်ၵႂႃႇတင်းလင် ၶူဝ်း ၶွင်ၼႂ်းၵျွင်းလႄႈ ၵႃးၸဝ်ႈၵွၼ်းဝတ်ႉ ပေႃးႁူမ်ႈၵၼ်တင်းမူတ်းၶၼ်ငိုၼ်းၼပ်ႉပဵၼ် ႁႃႈပၢၵ်ႇသႅၼ်ပၢႆ” ဝႃႈၼႆ။
ဝတ်ႉၵွင်းမူး ဝၢၼ်ႈၼႃးၼိဝ်ႉ လၵ်းတႅင်ႇၼႆႉ မီးၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ပဵၼ် ဝတ်ႉၵျွင်းဢၼ် ၵူၼ်းဝၢၼ်ႈ 5 ဝၢၼ်ႈ မိူၼ်ၼင်ႇဝၢၼ်ႈၵွင်း၊ ၵုင်းပဝ်း၊ ၵွင်းသၢၼ်း၊ ၼႃးၼိဝ်ႉ၊ ၼႃးလိၼ်းၸိူဝ်းၼႆႉ မႃးၶိုၼ်ႈလူႇဝႆႈ။
