သုၼ်ၵၢၼ်ငမ်းယဵၼ်မႄးလီၼႂ်းၸိူဝ်ႉၸၢတ်ႈ NRPC မွၵ်ႇထိုင် ၸုမ်းယိပ်းၵွင်ႈၵၢင်ႇ ဢၼ်ပႆႇလူင်းလၢႆးမိုဝ်း NCA 8 ၸုမ်း ၵႂႃႇ ၶဝ်ႈပၢင်ၵုမ် တီႈၼေႇပျီႇတေႃႇ ဝႃႈၼႆ။

ဢူးသေႃႇထေး ၽူႈၶၢၼ်ပၢၵ်ႇ တီႈၵိူဝ်းၵုမ် ၸိုင်ႈမိူင်း လူင်းလၢႆးမိုဝ်းသေ ဢွၵ်ႇၶေႃႈပိုၼ်ၽၢဝ်ႇဝႆႉဝႃႈ “ ယူႇတီႈၸုမ်းယိပ်း ၵွင်ႈၵၢင်ႇ FPNCC ဢၼ်ဝႃႉUWSA ဢွၼ်ႁူဝ်ဝႆႉ 7 ၸုမ်း တင်း တပ်ႉသိုၵ်းပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် KNPP ဢၼ်တိုၵ်ႉထွၼ်တူဝ်ဢွၵ်ႇ ၼႂ်းလုၵ်ႈၸုမ်း UNFC ပႆႇႁိုင်ၼၼ်ႉ မွၵ်ႇၵႂႃႇႁူပ်ႉထူပ်းဢုပ်ႇဢူဝ်း တင်း NRPC သုၼ်ၵၢင် ငမ်းယဵၼ်မႄးလီၼႂ်းၸၢတ်ႈ တီႈၼေႇပျီႇတေႃႇ” ဝႃႈၼႆ။

ဢူးၺီႇလၢၼ်ႇ ၽူႈၼင်ႈလုမ်းၵပ်းသၢၼ်ဝႃႉ UWSA တီႈလႃႈသဵဝ်ႈ လၢတ်ႈဝႃႈ“ ႁဝ်းၶႃႈ လုၵ်ႈၸုမ်း FPNCC တင်း လူင် ပွင်ၸိုင်ႈ တေႁူပ်ႉၵၼ် တီႈၼေႇပျီႇတေႃႇဢေႃႈ ႁဝ်းၶႃႈတေၵႂႃႇဢေႃႈ” ဝႃႈၼႆ။

ၶူးတေႇၼီႇယႃႇ ၽူႈၼမ်းၼႂ်း 2 KNPP လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈႁဝ်းၶႃႈ ႁူပ်ႉၵၼ်တီႈၵဵင်းမႆႇၼၼ်ႉ ႁဝ်းလႆႈ ဢုပ်ႇဢူဝ်းၵၼ် တူၵ်းလူင်းတႅပ်းတတ်းဝႆႉဝႃႈ တေၵႂႃႇ ၼေႇပျီႇတေႃႇ ႁဝ်းၶႃႈႁၢင်းႁႅၼ်းဝႆႉယဝ်ႉ။ ႁဝ်းၶႃႈတႄႉ မုင်ႈမွင်း ပဵၼ်ဢၼ်လီတီႈသုတ်းၵူၺ်း။ လိူဝ်ၼၼ်ႉ လွင်ႈၸမ်ၸႂ် ၵၼ်၊ လွင်ႈယုမ်ႇယမ်ၼိူဝ်ၵၼ်ၵေႃႈ တေပဵၼ်မႃးယူႇ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈႁၢၼ် ၸၢႆးၽူင်းႁၢၼ် ၽူႈၶၢၼ်ပၢၵ်ႇ SSPP/SSA လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ တေၵႂႃႇဢေႃႈ။ တေႃႈလဵဝ် ဢၼ်ႁဝ်းၶႃႈတေဢုပ်ႇဢူဝ်းႁူဝ်ၶေႃႈသင် ဢၼ်ဝႃႈၼၼ်ႉ ႁဝ်းၶႃႈလၢတ်ႈပႆႇလႆႈ” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ ပၢင်ၵုမ်ဢုပ်ႇဢူဝ်းၶၵ်ႉၵၢၼ်လွင်ႈငမ်းယဵၼ်ၼႆႉ တေၸတ်းႁဵတ်းတီႈသုၼ်ၵၢင် ငမ်းယဵၼ် မႄးလီၼႂ်းၸၢတ်ႈ NRPC တီႈၼေႇပျီႇတေႃႇ တေပဵၼ်ဝၼ်းတီႈ 21/03/2019 ယၢမ်းၵၢင်ၼႂ် 10 မူင်း။ လိူဝ် ၼၼ်ႉ ၼႂ်းလိၵ်ႈၼၼ်ႉပိုၼ်ၽၢဝ်ႇပႃးဝႃႈ တေမွၵ်ႇထိုင် ႁူဝ်ၼႃႈၸုမ်းယိပ်းၵွင်ႈၵၢင်ႇ 1 ၸုမ်းလႂ် 1 ၵေႃႉ။ ယဝ်ႉၵေႃႈ လုၵ်ႈၸုမ်း 1 ၵေႃႉ ၶဝ်ႈႁူမ်ႈၸွမ်း ဝႃႈၼႆ။

ၼွၵ်ႈလိူဝ်ၼၼ်ႉ ပိုၼ်ၽၢဝ်ႇပႃးဝႆႉထႅင်ႈ သင်ႁူပ်ႉၵၼ်တင်းလူင်ပွင်ၸိုင်ႈယဝ်ႉၸိုင် တေႁူပ်ႉတူဝ်တႅၼ်းသိုၵ်းမၢၼ်ႈ ၵႂႃႇၵမ်းၸုမ်းၸုမ်း ဝႃႈၼႆ။

တွၼ်ႈတႃႇတေၶဝ်ႈႁူမ်ႈပၢင်ၵုမ်ဢုပ်ႇဢူဝ်းလွင်ႈငမ်းယဵၼ်ၼႆႉ ယူႇတီႈလူင်ပွင်ၸိုင်ႈလႆႈမွၵ်ႇဝႆႉ ၸုမ်းပႆႇလူင်း လၢႆးမိုဝ်း NCA မိူၼ်ၼင်ႇ ၸုမ်းဝႃႉ (UWSP/UWSA)၊ ၸုမ်းၶၢင် (KIO/KIA)၊ ၸုမ်းဝၢၼ်ႈႁႆး (SSPP/SSA)၊ ၸုမ်းတဢၢင်း (PSLF/TNLA)၊ ၸုမ်းမိူင်းလႃး (NDAA/PSC)၊ ၸုမ်းၶႄႇၵဝ်ႈၵၢင်ႉ/ၵူဝ်းၵၢင်ႉ (MNTJP)၊ ၸုမ်းရၶႅင်ႇ (ULA/AA)၊ ၸုမ်း ယၢင်းလႅင် KNPP ၸဵမ်ၸိူဝ်းၼႆႉ။