ၼႂ်းၸႄႈဝဵင်းလႃႈသဵဝ်ႈ ထုင်ႉၸဵင်ႇၸၢၼ်းဝၼ်းဢွၵ်ႇဝဵင်း ၽူႈၵွၼ်းဝၢၼ်ႈ/ ဢိူင်ႇလႄႈ ၸုမ်းပျီႇတူႉၸိတ်ႉမၢၼ်ႈပၢင်ႇ ဝႃႈၵူၼ်းဝၢၼ်ႈယွင်ႇၼႆသေ တီႉမတ်ႉပေႃႉထုပ်ႉ ပူၼ်ႉတိၼ်ပူၼ်ႉမိုဝ်း ထိုင်တီႈပေႃးလူႉတၢႆၵႂႃႇ။

ဝၼ်းတီႈ 14/03/2019 ယၢမ်းဝၢႆးဝၼ်း ပေႃႈမႄႈပီႈၼွင်ႉၸိူဝ်ႉၶိူဝ်း ၸၢႆးဢၢႆႈထုၼ်းလႄႈ ပႃႇတီႇႁူဝ်သိူဝ် SNLD ႁူမ်ႈၵၼ် ၵႂႃႇၸႅင်ႈၵႂၢမ်း တီႈႁူင်းပလိၵ်ႈၸႄႈဝဵင်းလႃႈသဵဝ်ႈ။ ႁႂ်ႈဢဝ်လိူင်ႈလၢဝ်း တီႈၵူၼ်းႁဵတ်းႁၢႆႉ ပေႃႉထုပ်ႉၶႃႈႁႅမ် ၸၢႆးဢၢႆႈ ထုၼ်း ဢႃယု 34 ပီ ဢၼ်ၺႃးၽူႈၵွၼ်းဝၢၼ်ႈ/ ဢိူင်ႇလႄႈ ပျီႇတူႉၸိတ်ႉ မၢၼ်ႈပၢင်ႇ ႁဵတ်းႁၢႆႉ ပေႃႉထုပ်ႉ ၶႃႈႁႅမ်တၢႆ မိူဝ်ႈဝၼ်းတီႈ 29-30/01/2019 ၼၼ်ႉ ႁႂ်ႈၽူႈမီးပုၼ်ႈၽွၼ်းပလိၵ်ႈၶဝ် ဢဝ်လိူင်ႈလၢဝ်း ပၼ်တူတ်ႈ တၢမ်ႇၸွမ်းၼင်ႇ ပၵ်းပိူင်မၢႆမီႈ ဝၢၼ်ႈမိူင်းမီး ဝႃႈၼႆ။

ပႃႈၼၢင်းၵွင် ၵေႃႉပဵၼ်မႄႈၸၢႆးဢၢႆႈထုၼ်း လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈႁဝ်းယွမ်းႁပ်ႉယူႇၶႃႈ ဝႃႈလုၵ်ႈၸၢႆးၶႃႈ မၼ်း ပဵၼ်ၵူၼ်းယွင်ႇ။ ၵူၺ်းၵႃႈ မၼ်းၸၢႆးဢမ်ႇၵႂႃႇၵဝ်းၽႂ်၊ ၽိတ်းၽႂ်ၶႃႈလူး ယူႇတီႈႁိူၼ်းႁဵတ်းၼၼ်ၵူၺ်း။ ပူႇၵႄႇ ၽူႈယႂ်ႇ ၵူၼ်းလူင်ၼႂ်းဝၢၼ်ႈလႄႈ ၽူႈၵွၼ်းဢိူင်ႇၶဝ်ဝႃႈ ဢမ်ႇလူဝ်ႇပၼ်မီး၊ ဢမ်ႇလူဝ်ႇဝႆႉ ၵူၼ်းယွင်ႇ ၼႂ်းဝၢၼ်ႈၼႆသေ တီႉ မတ်ႉၽႅၼ်ပေႃႉထုပ်ႉ မၼ်းၸၢႆး ပေႃးဢွၵ်ႇလိူတ်ႈယၢင်မၢတ်ႇၸဵပ်းႁၢဝ်ႈႁႅင်းၶႃႈယဝ်ႉ။ လုၵ်ႈၶႃႈယွၼ်းၵိၼ်ၶဝ်ႈ ၵိၼ် ၼမ်ႉ ၵေႃႈ ၶဝ်ဢမ်ႇပၼ်ၵိၼ် မတ်ႉဝႆႉၼႂ်းဝၢင်းႁိူၼ်းႁဵတ်းၼၼ်။ ဢၼ်ၶဝ်မတ်ႉပေႃႉထုပ်ႉ ႁဵတ်းတေႃႇလုၵ်ႈၸၢႆးၶႃႈ ၼႆႉ မိူဝ်ႈဝၼ်းတီႈ 29/01/2019၊ ထိုင်မႃး ဝၼ်းတီႈ 30 ယၢမ်းၵၢင်ၼႂ် မွၵ်ႈ 10 မူင်းၼၼ်ႉ မၼ်းၸၢႆးလူႉသဵင်ႈၵႂႃႇ။ ယူႇတီႈၽူႈၵွၼ်းဢိူင်ႇဝၢၼ်ႈ ၶဝ်ၸိူဝ်းၼၼ်ႉ မႃးတတ်းၸိူၵ်ႈၶၢတ်ႇပႅတ်ႈသေ ဢဝ်တူဝ်မၼ်းၸၢႆး ၵႂႃႇၾင်ပႅတ်ႈႁဵတ်းၼၼ်” ဝႃႈၼႆ။

သိုပ်ႇလၢတ်ႈဝႃႈ “ ဢၼ်ၶဝ်ႁဵတ်းၼၼ်ႉ ႁွင်ႉပႃးပျီႇတူႉၸိတ်ႉမၢၼ်ႈပၢင်ႇမႃး 3 ၵေႃႉ ပႃးၸၼ်ႉၶုၼ်ႁၢၼ်။ လိူဝ်ၼၼ်ႉ ပၢႆလွၵ်ႇငိုတ်ႈပႃးဝႃႈ သင်ၵႂႃႇမွၵ်ႇၽႂ် လၢတ်ႈၶၢဝ်ႇဢွၵ်ႇၸိုင် တေၽဵဝ်ႈပႅတ်ႈသူတင်းမူတ်း။ တေႃႈလဵဝ်ၼႆႉ ၸိူဝ်ႉၶိူဝ်းပီႈ ၼွင်ႉ ႁဝ်းၶႃႈ ဢမ်ႇႁတ်းယူႇတီႈဝၢၼ်ႈၼၼ်ႉသေ ပၢႆႈဢွၵ်ႇၵၼ်မႃးတင်းမူတ်း။ တေႃႈလဵဝ် ႁိူၼ်းႁဝ်းၶႃႈ ၵေႃႈ ၶဝ် ၸုတ်ႇၽဝ်ပႅတ်ႈမူတ်း ဢမ်ႇၵိုတ်းလိူဝ် ဢီႈသင်ၶႃႈ မၢႆၾင်ၵေႃႈ ဢမ်ႇတၼ်းလႆႈ၊ ဢိင်ႇထွင်ႇၸူႉၵေႃႈ ယင်း ဢမ်ႇတၼ်း လႆႈ မႆႈၵႂႃႇၸွမ်းၾႆးမူတ်း ၶဝ်တင်ႈၸႂ်ယႃႉမွတ်ႇပႅတ်ႈ သၢၵ်ႈသေႇလၵ်းထၢၼ် မၼ်းပႅတ်ႈၶႃႈယဝ်ႉ။ လွင်ႈၼႆႉ ႁဝ်းၶႃႈ တုၵ်းယွၼ်း ႁႂ်ႈမၼ်းမီးလွင်ႈၽဵင်ႇပဵင်း မၢၼ်ႇမႅၼ်ႈၸွမ်းတြႃးၶႃႈ။ ဢမ်ႇၸႂ်ႈဝႃႈ ၶႂ်ႈဢဝ်ၵၼ်တၢႆၸိူင်ႉႁိုဝ်ၵေႃႈ ဢဝ်တၢႆ ၼႆ မၼ်း ဢမ်ႇၸႂ်ႈလွင်ႈမၢၼ်ႇမႅၼ်ႈတြႃးၶႃႈ” ဝႃႈၼႆ။

ၼင်ႇႁိုဝ် ပေႃးတေပဵၼ်လွင်ႈမၢၼ်ႇမႅၼ်ႈၸွမ်းၼင်ႇပၵ်းပိူင်ဝၢၼ်ႈမိူင်းၵႂႃႇၼၼ်ႉ ပေႃႈမႄႈပီႈၼွင်ႉ ၸိူဝ်ႉၶိူဝ်း ၸၢႆးဢၢႆႈထုၼ်း လႆႈမႃးၸႅင်ႈၵႂၢမ်းဝႆႉတီႈႁူင်းပလိၵ်ႈၸႄႈဝဵင်းလႃႈသဵဝ်ႈ ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇ ႁွၵ်ႈ ဝႃႈ “ ယူႇတီႈပႃႇတီႇႁူဝ်သိူဝ် ႁဝ်းလႄႈသင် ယူႇတီႈတႅၼ်းၽွင်းႁဝ်းလႄႈသင် ပႂ်ႉထွမ်ႇ/တူၺ်းဝႆႉယူႇၶႃႈ ပေႃးဝႃႈ ႁဵတ်း ၸၼ်ႉၼႆႉပႆႇလႆႈၼႆၵေႃႈ ႁဝ်းၶႃႈတေၶတ်းၸႂ် တၢင်ႇၶိုၼ်ႈထႅင်ႈ လၢႆလၢႆၸၼ်ႉ ၼင်ႇႁိုဝ် မၼ်းပေႃးတေဢွၵ်ႇမႃး လွင်ႈ မၢၼ်ႇမႅၼ်ႈၸွမ်းတြႃး။ ဢၼ်ၶဝ်ႁဵတ်းတေႃႇၵူၼ်းမိူင်းၼၼ်ႉ ၶဝ်ႁဵတ်းပူၼ်ႉပႅၼ်ပၵ်းပိူင်ဝၢၼ်ႈမိူင်း ဢၼ်မီးဝႆႉ။ ပၵ်း ပိူင်ဝၢၼ်ႈမိူင်း ဢၼ်ဝႃႈၼၼ်ႉ တေလႆႈမီးပႃႈၼိူဝ်ၵူၼ်းမိူင်း၊ ဢၼ်ၶဝ်ႁဵတ်းၼႆႉ ဢဝ်ဢႃႇၼႃႇသေ ၶႂ်ႈဢဝ်ၽႂ်တၢႆ ၶႂ်ႈ ပေႃႉ ၶႂ်ႈထုပ်ႉ ၶႂ်ႈဢဝ်တၢႆပႅတ်ႈငၢႆႈငၢႆႈလူမ်လူမ်ၼႆ ယူႇတီႈႁဝ်းၶႃႈတႄႉ ဢမ်ႇၶႂၢင်းပၼ်လႆႈၶႃႈ။ တေႃႈၼင်ႇၵူၼ်းမီး ပၵ်း ပိူင် ဢဝ်ပိူၼ်ႈတၢႆၼႆ ပိူၼ်ႈယင်းဢမ်ႇၸၢင်ႈ ဢဝ်တၢႆၶိုၼ်း တေလႆႈထူပ်းတေႃႇၼႃႈသူႈၸွမ်း ၶႂၢင်ႇတြႃးသေ ၸင်ႇတေ လႆႈတႅပ်း တတ်း ၵိုင်ႇလီပၼ်တၢမ်ႇၶွၵ်ႈမၼ်းၸိူင်ႉႁိုဝ်၊ ပၼ်တၢမ်ႇတၢႆၼႄႇ၊ တၢမ်ႇၶွၵ်ႈတေႃႇၸူဝ်ႈၼႄႇ ၸဵမ်ၸိူဝ်းၼႆႉ” ဝႃႈၼႆ။

သိုပ်ႇလၢတ်ႈဝႃႈ “ ဢၼ်ၽူႈမီးပုၼ်ႈၽွၼ်းၶဝ် ႁဵတ်းၵႂႃႇၼႆႉ မၼ်းပူၼ်ႉတိၼ်ပူၼ်ႉမိုဝ်းသေဢမ်ႇၵႃး မၼ်းလူလၢႆပႃး သုၼ်ႇလႆႈသုၼ်ႇပဵၼ်ပေႃႈမႄႈၵူၼ်းမိူင်းႁဝ်းၶႃႈ ယဝ်ႉၵေႃႈ ပူၼ်ႉပၵ်းပိူင်ၸိုင်ႈမိူင်း လွင်ႈၼႆႉ မၼ်းဢမ်ႇလီပဵၼ်လႃး လႃး။ လွင်ႈမၢၼ်ႇမႅၼ်ႈၸွမ်းထမ်းတြႃး ၵူၼ်းမိူင်းတၵ်းလႆႈႁပ်ႉလွင်ႈၽဵင်ႇပဵင်းၵၼ်မူတ်း ” ဝႃႈၼႆ။

ၸၢႆးဢၢႆႈထုၼ်းၼႆႉ ဢႃယု လႆႈ 34 ပီ ပဵၼ်လုၵ်ႈၸၢႆး လုင်းၸၢႆးဢွင်ႇပႃႉလႄႈ ပႃႈၼၢင်းၵွင် မီးပီႈၼွင်ႉႁူမ်ႈတွင်ႉၵၼ် 3 ၵေႃႉ မၼ်းၸၢႆး ပဵၼ်ၵေႃႉထူၼ်ႈ 2 ။ ပဵၼ်ၵူၼ်းၸႃတိ ဝၢၼ်ႈၵွင်းႁုင်း ဢိူင်ႇမိူင်းပၢႆ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်း ႁွင်ႇ ဝႃႈၼႆ။