ၶွမ်ႊမတီႊလႅၼ်လိၼ်ထႆး – မိူင်းႁူမ်ႈတုမ်မၢၼ်ႈ ႁူပ့်ထူပ်းဢုပ်ႇၵၼ်တီႈဝဵင်းတႃႈၶီႈလဵၵ်း တႃႇႁူမ်ႈမိုဝ်းၵၼ်ၵႄႈ  လိတ်ႈပၼ်ႁႃ ဢၢႆၵွင့်ဢၢႆၵႂၼ်းမိူင်းမိုတ်းမူဝ်း။

ဝၼ်းတီႈ 14/03/2019 ၶွမ်ႊမတီႊလႅၼ်လိၼ် ထႆး – မိူင်းႁူမ်တုမ်မၢၼ်ႈ TBC ( Township Border Committee) ႁူပ့်ထူပ်းဢုပ်ႇဢူဝ်းၵၼ် တီႈဝဵင်းတႃႈၶီႈလဵၵ်း ၸိုင်ႈတႆး ၾၢႆႇထႆးၶုၼ်သိုၵ်းၽႆထတ်းသၼ် ဢမွၼ်းမေႊထႃႊသၵ်ႊ ဢွၼ်ႁူဝ်ၾၢႆႇတၢင်းတႃႈၶီႈလဵၵ်းသမ့် ဢူးၸေႃႇဝိၼ်းထေး ၵႅမ်ၽူႈၵွၼ်းၸႄႈတွၼ်ႈဢွၼ်ႁူဝ် ႁူပ့်ထူပ်းဢုပ်ႇဢူဝ်းၵၼ် ။ တႃႇႁူမ်ႈၵၼ်ၵႄႈလိတ်ႈပၼ်ႁႃၾႆးပႃႇ ဢၢႆၵွင့်ဢၢႆၵႂၼ်း မိူင်းမိုတ်းမူဝ်းတၼ် ၸိူဝ်းၼႆ့။

ၾၢႆႇၶွမ်ႊမတီႊမၢၼ်ႈ လၢတ်ႈဝႃႈ “ ၵဵဝ်ႇလူၺ်ႈလွင်ႈဢၢႆၵွင့်ဢၢႆၵႂၼ်းၼႆ့ ႁဝ်းၶႃႈၵေႃႈဢမ်ႇဝႆ့မဝ်မၢင်ၶႃႈ ယွၼ့်ဝႃႈ ဢၢႆၵွင့်ဢၢႆၵႂၼ်းၼႆ့ မၼ်းၸၢင်ႈတုမ့်တိူဝ့်တေႃႇပၢႆးယူႇလီၵူၼ်းမိူင်းႁဝ်း ႁဝ်းၶႃႈလႆႈသင်ႇလၢတ်ႈၵႂႃႇတီႈပူႇၵၢင့် ပူႇၵႄႇတႃႇ 19 ဝၢၼ်ႈ ဢၼ်တိတ်းၸပ်းလႅၼ်လိၼ် ႁႂ်ႈၵိုတ်းၵၢၼ်ၽဝ်ပႃႇလႄႈ ႁဝ်းၶႃႈဢဝ်ၽႃႈပိၵ့်ပၢၵ်ႇ Mask 5,000 ၸႅၵ်ႇပၼ် ၵူၼ်းဝၢၼ်ႈ ၵူၼ်းမိူင်း ၼင်ႇႁိုဝ်တေဢမ်ႇတုမ့်တိူဝ့်ပၢႆးယူႇလီၵူၼ်းမိူင်း လိူဝ်ၼၼ့်ၵေႃႈ လႆႈ   ဢဝ်ၼမ့်သိတ်းၸွမ်းၼႂ်းၵိဝ်ႇဝၢၼ်ႈ ” ဝႃႈၼႆ။

ဢၢႆၵွင့်ဢၢႆၵႂၼ်းဢၼ်လုၵ့်မႃးတီႈၾႆးပႃႇၼႂ်း 8 ၸႄႈတွၼ်ႈ ၼႂ်းၸိုင်ႈထႆးပွတ်းၼိူဝ်ၼႆ့ ႁဵတ်းႁႂ်ႈဝဵင်းၵဵင်းမႆႇ ပဵၼ်   မိူင်းဢၼ်မီးဢၢႆၵွင့်ဢၢႆၵႂၼ်း မိူင်းမူဝ်းႁၢႆ့ႁႅင်းသုတ်းမၢႆ 1 ၼႂ်းလုမ်ႈၾႃ့ ၸွမ်းၼင်ႇဢၼ် Website Air Visual ပိုၼ်ၽၢဝ်ႇ ၸၼ့်ၸွမ်ဝဵင်းၵဵင်းမႆႇ ပိုၼ်ၽၢဝ်ႇပိၵ့်ၵၢၼ်ႁဵၼ်းၵၢၼ်သွၼ် တႃႇၶၢဝ်းတၢင်း 2 ဝၼ်း ဝၼ်းတီႈ 14 – 15 /03/2019 ၊ သၢႆၵၢၼ်မိၼ်ဢၼ်လုၵ့်တၢင်းၵဵင်းမႆႇ ၵႂႃႇတၢင်းမႄႈႁွင်ႈသွၼ်ၵမ်ႈၽွင်ႈၵေႃႈ လႆႈၵိုတ်းဝႆ့ ၸူဝ်ႈၶၢဝ်း။ ။

မိူင်းထႆးတင်း မိူင်းႁူမ်ႈတုမ်မၢၼ်ႈၼႆ့ လႅၼ်လိၼ်တိတ်းၵၼ်ယၢဝ်း ၼႂ်းမိူင်းတႆး – မိူင်းထႆးၵေႃႈ တင်ႈတႄႇ သၢမ်ၸဵင်ႇၶမ်း – တႃႈၶီႈလဵၵ်း လူင်းၵႂႃႇတၢင်းမႄႈႁွင်ႈသွၼ် ။ လႅၼ်လိၼ်မိူင်းႁူမ်ႈတုမ်မၢၼ်ႈတင်းထႆးၶႅၼ်း ယၢဝ်းၵႆတႃႈၶီႈလဵၵ်း တေႃႇရၼွင်း တၢင်းယၢဝ်းႁဵင်လၵ်းပၢႆပၼ်ႁႃဝူင်ႈၵၢင်သွင်မိူင်းၵေႃႈၼမ်၊ ပၼ်ႁႃတုၸရိူၵ်ႈ၊ ပၼ်ႁႃၵူၼ်းၶၢမ်ႈလႅၼ်လိၼ်၊ ပၼ်ႁႃယႃႈမဝ်းၵမ်ဢၼ်လူဝ်ႇႁူမ်ႈၵၼ်ၵႅတ်ႇၵင်ႈပူၵ်းပွင်ၵေႃႈမီးတင်းၼမ်။ ၸႄႈတွၼ်ႈတႃႈၶီႈ    လဵၵ်း ၼႆ့မီးႁူးၽၵ်းတူလူင်ၵၢၼ်ၵႃ့ၶၢႆ တႃႈၶီႈလဵၵ်း – မႄႈသၢႆ ၵူၼ်းၶဝ်ႈဢွၵ်ႇ ၼပ့်ဢၢၼ်ႇ ႁူဝ်မိုၼ်ႇ ႁူဝ်သႅၼ်။