ၵူၼ်းဝၢၼ်ႈၵေႃႉၺႃးၸၢၵ်ႇမၢၵ်ႇ တီႈၵွင်ႇၵေႃႈသေ လႆႈသူင်ႇယူတ်းယႃတူဝ်တီႈဝဵင်းလႃႈသဵဝ်ႈၼၼ်ႉ တေႃႈလဵဝ် ႁၢႆ ၸိုၼ်ႈၶႅၼ်းမႃးသေ မိူဝ်ႈၼႆႉ တေလႆႈလူင်းႁူင်းယႃယဝ်ႉ ဝႃႈၼႆ။
မိူဝ်ႈၼႆႉ ဝၼ်းတီႈ 15/03/2019 ယၢမ်းဝၢႆးဝၼ်း မွၵ်ႈ 2 မူင်းၶိုင်ႈၼႆႉ ၸၢႆးၵႃႇလိင်ႇ ဢႃယု 25 ပီ ပဵၼ်ၵူၼ်းဝၢၼ်ႈ မၢၼ်ႈမႂ်ႇ ဢိူင်ႇၵုင်းသေႃႉ ဢၼ်တိူဝ်ႉၺႃးၸၢၵ်ႇမၢၵ်ႇ ၵႄႈသိုၵ်းၶူဝ်းၶဵဝ်ၶူဝ်းလၢႆးယိုဝ်းၵၼ် တီႈႁိမ်းဝၢၼ်ႈၼမ်ႉမေႃႇလူင် မိူဝ်ႈ ဝၼ်းတီႈ 12/03/2019 ၼၼ်ႉ လႆႈသူင်ႇယူတ်းယႃတူဝ်တီႈသီႇပေႃႉ လုၵ်ႉတီႈႁူင်းယႃ သီႇပေႃႉသေ လႆႈသူင်ႇယူတ်း တူဝ်တီႈ လႃႈသဵဝ်ႈၼၼ်ႉ တေႃႈလဵဝ် ယူႇတီႈမေႃယႃလူင် ဝဵင်းလႃႈသဵဝ်ႈ ပၼ်ၶႂၢင်ႉမၼ်းၸၢႆး ႁႂ်ႈလူင်းႁူင်းယႃယဝ်ႉ ဝႃႈၼႆ။
ၸၢႆးၵႃႇလိင်ႇ ၵေႃႉတိူဝ်ႉၺႃးမၢၵ်ႇတီႈၵွင်ႇၵေႃႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈတေလႆႈလူင်းမိူဝ်ႈၼႆႉ ယၢမ်းဝၢႆး ဝၼ်း 2 မူင်းၶိုင်ႈၶႃႈဝႃႇ။ တေႃႈလဵဝ် ပႂ်ႉဢဝ်ပပ်ႉႁူင်းယႃယူႇၶႃႈ။ သင်ဝႃႈ မေႃယႃလူင် လူင်းလၢႆးမိုဝ်းပၼ် ယဝ်ႉၼႆ ၵေႃႈ ၶႃႈႁဝ်း တေလႆႈပွၵ်ႈမိူဝ်းတီႈႁိူၼ်းသီႇပေႃႉမိူဝ်ႈၼႆႉၶႃႈ။ လွင်ႈတၢင်းဢၼ်လႆႈတိူဝ်ႉၺႃးမၢၵ်ႇၼၼ်ႉ မၼ်းလုၵ်ႉ တၢင်း လႂ်သေ သဵၼ် မႃးၵေႃႈဢမ်ႇတၼ်းႁူႉ။ ၽိူဝ်ႇႁူႉဝႃႈ ပဵၼ်ၸၢၵ်ႇမၢၵ်ႇတိူဝ်ႉၺႃးၵေႃႈ လႆႈမၢတ်ႇၸဵပ်း ၼၼ်ႉၶႃႈ” ဝႃႈၼႆ။
သိုပ်ႇလၢတ်ႈထႅင်ႈဝႃႈ “ ယူႇတီႈၸုမ်းၸွႆႈထႅမ် ဢဝ်ၵႃးၵႂႃႇတၢင်ႇဢွၵ်ႇမႃးသေ လႆႈသူင်ႇမႃးတီႈႁူင်းယႃသီႇပေႃႉ လုၵ်ႉတီႈ ႁူင်းယႃသီႇပေႃႉသေ လႆႈသိုပ်ႇသူင်ႇမႃးတီႈႁူင်းယႃလႃႈသဵဝ်ႈၼႆႉထႅင်ႈ။ ၸဵမ်ၵႃႈၵိၼ် ၵႃႈယႃ ၼိုင်ႈဝၼ်းလႂ် ႁဝ်းလႆႈ သဵင်ႈပၼ် တီႈႁူင်းယႃ မိုၼ်ႇႁႃႈႁဵင်ပျႃးပၢႆၶႃႈ၊ ႁၢၼ်ႉတေႃႇပေႃးလူင်းႁူင်းယႃ တေသဵင်ႈၵႃႈႁိုဝ် ဢၼ်ဝႃႈၼၼ်ႉ ပႆႇႁူႉ” ဝႃႈၼႆ။
ၸၢႆးၵႃႇလိင်ႇၼႆႉ ပဵၼ်ၵူၼ်းဝၢၼ်ႈ မၢၼ်ႈမႂ်ႇ ဢိူင်ႇၵုင်းသေႃႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။
ယွၼ်ႉသိုၵ်းၶူဝ်းၶဵဝ်/ လၢႆး 2 ၸုမ်း ပိုတ်းယိုဝ်းၵၼ်ႁၢဝ်ႈႁႅင်းသေ ၵူၼ်းမိူင်း လႆႈဢွၼ်ၵၼ်ပၢႆႈယၢၼ်ႁိူၼ်းယေးၵၼ် မႃးသွၼ်ႈ ဝႆႉၸွမ်းဝတ်ႉဝႃးၽႃသိူဝ်ႇ တေႃႈလဵဝ် မီးၵႂႃႇယဝ်ႉ ႁူဝ်ၵူၼ်း 1,400 ပၢႆ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ