ၵူၼ်းၼုမ်ႇယၢင်းလႅင် တုၵ်းယွၼ်း ႁႂ်ႈၶၢႆႉႁုၼ်ႇႁၢင်ႈ ၸွမ်ႁၢၼ် ဢွင်ႇသၢၼ်း ဢွၵ်ႇသူၼ်မွၵ်ႇၵၢင်ဝဵင်းလွႆၶေႃ

ၵူၼ်းၼုမ်ႇမိူင်းယၢင်းလႅင် တုၵ်းယွၼ်း ႁႂ်ႈလူင်ပွင်ၸိုင်ႈၸႄႈမိူင်းယၢင်းလႅင် (ၵယႃး) ၶၢႆႉယၢႆႉ ႁုၼ်ႇႁၢင်ႈ ၸွမ်ႁၢၼ် ဢွင်ႇသၢၼ်း ၶီႇမႃႉ ဢၼ်ပၵ်းဝႆႉၼႂ်းသူၼ်မွၵ်ႇ ၵၢင်ဝဵင်းလွႆၶေႃၼၼ်ႉ ႁႂ်ႈၶၢႆႉယဝ်ႉ ၼႂ်းၵၢင်လိူၼ်ၼႆႉ။

ဝၼ်းတီႈ 17/03/2019 တေမႃးၼႆႉ ပဵၼ်ဝၼ်းလိုၼ်းသုတ်း ႁႂ်ႈၶၢႆႉယၢႆႉ ႁုၼ်ႇႁၢင်ႈၸွမ်ႁၢၼ်ဢွင်ႇသၢၼ်း ၶီႇမႃႉ ဢၼ် ပၵ်း ဝႆႉတီႈၼႂ်းသူၼ်မွၵ်ႇ ၵၼ်ႇတႃႇႁေႇဝၼ်ႇ ၸႄႈဝဵင်းလွႆၶေႃ ၸႄႈမိူင်းယၢင်းလႅင်ၼၼ်ႉ သင်ဢမ်ႇၶၢႆႉယၢႆႉၸိုင် ၵူၼ်းမိူင်း လႄႈ ၵူၼ်းၼုမ်ႇမိူင်းယၢင်းလႅင် တေႁူမ်ႈၵၼ် ၼႄၵၢင်ၸႂ် ထုပ်ႉယႃႉလႅဝ်ပႅတ်ႈႁုၼ်ႇႁၢင်ႈၼၼ်ႉ ဝႃႈၼႆ။

ၶုၼ်တေႃႇမၢတ်ႉ ၸုမ်းၵူၼ်းၼုမ်ႇ မိူင်းယၢင်းလႅင် လၢတ်ႈတီႈသိုဝ်ႇၶၢဝ်ႇ ယၢင်းလႅင် KT ဝႃႈ “ ၵဵဝ်ႇလူၺ်ႈလွင်ႈၼႆႉ တေႃႇထိုင် ဝၼ်းတီႈ 17 ယူႇတီႈလူင်ပွင်ၸိုင်ႈ တေၵႄႈၶႆပၼ်ႁႃၵႂႃႇ ဝႃႈဝႆႉၼင်ႇၼႆ။ ႁဝ်းၶႃႈတႄႉ လၢတ်ႈဝႆႉ ထိုင်ဝၼ်း တီႈ 17 သင်ဢမ်ႇတုမ်ႉတွပ်ႇသင်မႃးၸိုင် ႁဝ်းၶႃႈ တေထုပ်ႉယႃႉလႅဝ်၊ တေယုၵ်ႉပႅတ်ႈႁုၼ်ႇႁၢင်ႈၼၼ်ႉ။ တွၼ်ႈတႃႇ တေသိုပ်ႇႁဵတ်းၵႂႃႇၼၼ်ႉ ႁဝ်းၶႃႈ ႁၢင်ႈႁႅၼ်းဝႆႉယဝ်ႉ ၸဵမ်ၵူၼ်းမိူင်းလႄႈ ၵူၼ်းၼုမ်ႇ ယၢင်းလႅင်ႁဝ်း” ဝႃႈၼႆ။

ၵဵဝ်ႇလူၺ်ႈလွင်ႈ ႁုၼ်ႇႁၢင်ႈ ၸွမ်ႁၢၼ်ဢွင်ႇသၢၼ်းၼႆႉ ၶွမ်ႊမတီႊဢၼ်သၢင်ႈႁုၼ်ႇႁၢင်ႈလႄႈ ၵူၼ်းၼုမ်ႇ လႆႈငူပ်ႉငီႉ တူၵ်းလူင်းလႆႈၸႂ်ၵၼ်ဝႆႉ တင်းသွင်ၾၢႆႇ မိူဝ်ႈလိူၼ်ပူၼ်ႉမႃးၼၼ်ႉသေ တေႃႇထိုင်ယၢမ်းလဵဝ် ယူႇတီႈႁူဝ်ၼႃႈ ၵူၼ်း ၼုမ်ႇယၢင်းလႅင် ယွၼ်းၶဝ်ႈႁူပ်ႉထူပ်း လူင်ပွင်ၸိုင်ႈၵေႃႈ ဢမ်ႇပၼ်ႁူပ်ႉ ဝႃႈၼႆ။

မိူဝ်ႈဝၼ်းတီႈ 12/02/2019 ဝၼ်းမိူင်းႁူမ်ႈတုမ်ၼၼ်ႉ ၶွမ်ႊမတီႊဢၼ်သၢင်ႈႁုၼ်ႇႁၢင်ႈ ၸွမ်ႁၢၼ် ဢွင်ႇသၢၼ်းလႄႈ ၵူၼ်းၼုမ်ႇယၢင်းလႅင် လႆႈ ႁူပ်ႉဢုပ်ႇၵၼ် တူၵ်းလူင်းလႆႈၸႂ်ၵၼ် ၶွပ်ႈတဵမ် 1 လိူၼ်ယဝ်ႉလႄႈ ၵွပ်ႈၼႆ တေႃႇထိုင်ယၢမ်း လဵဝ် ႁူဝ်ၼႃႈၵူၼ်းၼုမ်ႇ ယွၼ်းၶႂၢင်ႉထူပ်းလူင်ပွင်ၸိုင်ႈၵေႃႈဢမ်ႇလႆႈသေ လွင်ႈတေထုပ်ႉယႃႉလႅဝ် ယုၵ်ႉပႅတ်ႈ ႁုၼ်ႇ ႁၢင်ႈၸွမ်ႁၢၼ်ဢွင်ႇသၢၼ်းၼၼ်ႉ ၽူႈဢွၼ်ႁူဝ်ၵူၼ်းၼုမ်ႇၶဝ် ၶတ်းၸႂ်ႁၢင်ႈႁႅၼ်းၵၼ်ယူႇ ဝႃႈၼႆ။

ယူႇတီႈၽူႈမီးပုၼ်ႈၽွၼ်း ဢၼ်ၵဵဝ်ႇၶွင်ႈ ဢၼ်သၢင်ႈႁုၼ်ႇႁၢင်ႈၼၼ်ႉ ပၼ်ၵႂၢမ်းမၼ်ႈဝႆႉယဝ်ႉ။ သင်ဢမ်ႇႁဵတ်းၸွမ်း ၵႂၢမ်းမၼ်ႈၸိုင် ၵူၼ်းမိူင်းတင်းၵူၼ်းၼုမ်ႇ တေႁၢင်ႈႁႅၼ်း ၶဝ်ႈထုပ်ႉယႃႉ ႁုၼ်ႇႁၢင်ႈ ၸွမ်ႁၢၼ်ဢွင်ႇသၢၼ်း ဢၼ်တမ်း ဝႆႉၼႂ်းသူၼ်မွၵ်ႇ ၵၼ်ႇတႃႇႁေႇဝၼ်ႇပႅတ်ႈ ပၼ်ၾၢင်ႉဝႆႉၼင်ႇၼႆ။

ၶုၼ်တေႃႇမၢတ်ႉ သိုပ်ႇလၢတ်ႈဝႃႈ “ တီႈဢၼ်ၶဝ်မႃးတမ်းဝၢင်းႁုၼ်ႇႁၢင်ႈၼၼ်ႉ မၼ်းပဵၼ်တီႈၶွင်ၵူၼ်းတင်းၼမ် ဢမ်ႇ လီဢဝ်မႃးဝၢင်း။ ႁဝ်းၶႃႈ လၢတ်ႈဝႆႉၸဵမ်လႂ်ယဝ်ႉယႃႇပေဢဝ်မႃးဝၢင်းတမ်းၼႆ။ ပိူင်တႅၵ်ႈမၼ်း NLD ႁဵတ်းၼႆၵေႃႈ ႁႂ်ႈၶၢႆႉ ၵႂႃႇဝႆႉတီႈလုမ်း NLD ၶဝ်၊ သင်ဝႃႈ ၸုမ်းပရႁိတ ႁဵတ်းၼႆၵေႃႈ ႁႂ်ႈၶၢႆႉဢဝ်ၵႂႃႇဝႆႉတီႈလုမ်းပရႁိတ၊ သင်ၵဵဝ်ႇၶွင်ႈၸွမ်း လုမ်းလႂ် ႁႂ်ႈၶၢႆႉၵႂႃႇပၵ်းတီႈလုမ်းၼၼ်ႉ ႁဝ်းၶႃႈ လႆႈလၢတ်ႈဝႆႉယူႇ။ ၵဵဝ်ႇလူၺ်ႈလွင်ႈႁုၼ်ႇႁၢင်ႈၼႆႉ သင်ဝႃႈတူၺ်းၸိူင်ႉ ၼႆၵေႃႈ ပဵၼ်ႁုၼ်ႇႁၢင်ႈဢၼ်ၼိုင်ႈၵူၺ်း။ ၵူၺ်းၵႃႈ ႁုၼ်ႇႁၢင်ႈၼႆႉ တၢင်းလင်မၼ်း မီးပိုၼ်းဝႆႉလႄႈ ဢၼ်ႁဝ်းၶႃႈ ၶတ်း ၸႂ် မၢႆတွင်းပိူင်ၾၢင်မၼ်းႁၢႆၵႂႃႇၼႆတႄႉၵေႃႈ ဢမ်ႇၸႂ်ႈၼင်ႇၵဝ်ႇ” ဝႃႈၼႆ။

ၵဵဝ်ႇလူၺ်ႈလွင်ႈႁုၼ်ႇႁၢင်ႈ ၸွမ်ႁၢၼ်ဢွင်ႇသၢၼ်း ၶီႇမႃႉၼႆႉ ယူႇတီႈၵူၼ်းၼုမ်ႇယၢင်းလႅင်လႄႈ ၵူၼ်းမိူင်း ဢွၼ်ၵၼ် သၢၼ်ၶတ်းမႃး လၢႆပွၵ်ႈလၢႆၵမ်းယဝ်ႉ။ မိူဝ်ႈဝၼ်းတီႈ 12/02/2019 ၼၼ်ႉၵေႃႈ ၵူၼ်းမိူင်းလႄႈ ၵူၼ်းၼုမ်ႇယၢင်းလႅင် ႁူမ်ႈၵၼ်သၢၼ်ၶတ်းမႃး ဢမ်ႇယွမ်းႁပ်ႉလႆႈ ဢၼ်ဢဝ်ႁုၼ်ႇႁၢင်ႈဢွင်ႇသၢၼ်းမႃးပၵ်း တီႈၼႂ်းသူၼ်မွၵ်ႇ ၵၢင်ဝဵင်းလွႆ ၶေႃ ၼၼ်ႉသေ ႁူမ်ႈၵၼ်ၼႄၵၢင်ၸႂ် တေႃႇလူင်ပွင်ၸိုင်ႈ မိူင်းယၢင်းလႅင် ႁၢဝ်ႈႁၢဝ်ႈႁႅင်းႁႅင်း။ ထိုင်တီႈတပ်ႉပလိၵ်ႈ လၼ်ႇၵွင်ႈမၢၵ်ႇယၢင် ပိုတ်းယိုဝ်းၵူၼ်းၼုမ်ႇ၊ ပေႃႉထုပ်ႉၵူၼ်းၼုမ်ႇတိူဝ်ႉမၢတ်ႇၸဵပ်းလၢႆလၢႆၵေႃႉ။