Thursday, March 28, 2024

ပႃးလွင်ႈယၢပ်ႇၽိုတ်ႇ တႃႇထၢၵ်ႈႁဵတ်းသိုၵ်းလွင်ႈၼိုင်ႈသေ ၸဝ်ႈသၢင်ႇထုင်ႉသီႇပေႃႉတူၼ်ၼိုင်ႈ ၽႅၼ်ၶေႃးတၢႆ

Must read

ၸဝ်ႈသၢင်ႇ တူၼ်ၼိုင်ႈ ၼႂ်းဢိူင်ႇသီႇထွၵ်ႈ ၸႄႈဝဵင်းသီႇပေႃႉ ၶႂ်ႈၵႂႃႇႁဵၼ်းလိၵ်ႈဢမ်ႇလႆႈၵႂႃႇပေႃးထၢၵ်ႈသမ်ႉ တေလႆႈ ၵႂႃႇႁဵတ်းသိုၵ်းငဝ်းလၢႆးဝၢၼ်ႈမိူင်းသမ်ႉ တႆးတေႃႇတႆးယိုဝ်းၵၼ်လႄႈ ဝူၼ်ႉတၼ်သေ ၵႂႃႇၽႅၼ်ၶေႃးတၢႆပႅတ်ႈ။

Photo by – U Vicittasara/ ဢွင်ႈတီႈ ၸဝ်ႈသၢင်ႇ ၶေႇမိၼ်ႇတ ဢႃယု 14 ပီ ၽႅၼ်ၶေႃးတၢႆ

ဝၼ်းတီႈ 13/03/2019 ယၢမ်းၵၢင်ဝၼ်း သင်ၶၸဝ်ႈလႄႈ ၵူၼ်းဝၢၼ်ႈၵႂႃႇထူပ်းႁၼ် ၶၢပ်ႈတူဝ်တၢႆ ၸဝ်ႈၶေႇမိၼ်ႇတ ဢႃယု 14 ပီ ၽႅၼ်ၶေႃးတၢႆ တီႈႁိမ်းဝတ်ႉသီႇထွၵ်ႈ ၼႂ်းဢိူင်ႇသီႇထွၵ်ႈ ထုင်ႉၼမ်ႉလၼ်ႈ ၸႄႈဝဵင်းသီႇပေႃႉ ၸႄႈ တွၼ်ႈၵျွၵ်ႉမႄး ၸိုင်ႈ တႆးပွတ်းႁွင်ႇ။

- Subscription -

ၸဝ်ႈတူၼ်ၶူး တီႈဝတ်ႉမၼ်းၸဝ်ႈ တူၼ်ၼိုင်ႈ တႅမ်ႈဝႆႉၼိူဝ်ၾဵတ်ႉမၼ်းၸဝ်ႈဝႃႈ“ဢၼ်ၸဝ်ႈသၢင်ႇဢွၼ်ႇ လႆႈၶႃႈတူဝ် တၢႆၼႆႉမီးသၢမ်လွင်ႈ (1) ၶႂ်ႈၵႂႃႇႁဵၼ်းလိၵ်ႈဢမ်ႇလႆႈၵႂႃႇ၊ (2) သမ်ႉတူၵ်းၼႃႈႁိူၼ်းၸိုဝ်ႈမၼ်းၸဝ်ႈ ပႃးၼႂ်းသၢႆမၢႆတႃႇၵႂႃႇ ႁၢပ်ႇၵၢၼ်ၸိူဝ်ႉၸၢတ်ႈ၊ (3) တီႈႁိူၼ်းသမ်ႉပဵၼ်ပေႃႈသိုပ်ႇ ၸိူဝ်းၼႆႉႁဵတ်းႁႂ်ႈမၼ်းၸဝ်ႈၶႃႈတူဝ်တၢႆ” ဝႃႈၼႆ။

Photo by – U Vicittasara/ သင်ၶၸဝ်ႈလႄႈ ၵူၼ်းဝၢၼ်ႈ တီႈဢိူင်ႇသီႇထွၵ်ႈ ထူပ်းႁၼ် တူဝ်တၢႆ ၸဝ်ႈသၢင်ႇၶေႇမိၼ်ႇတ

ၵူၼ်းပိုၼ်ႉတီႈ ၼႂ်းဢိူင်ႇသီႇထွၵ်ႈ လၢတ်ႈတီႈၽူႈတွႆႇႁွၵ်ႈဝႃႈ “လႆႈငိၼ်းဝႃႈတႄႉ မၼ်းၸဝ်ႈၶႂ်ႈၵႂႃႇႁဵၼ်းလိၵ်ႈတီႈမိူင်း မၢၼ်ႈၼႆသေ ပေႃႈမႄႈသမ်ႉ ဢမ်ႇပၼ်ႁႅင်းႁိုဝ် ဢမ်ႇၼၼ် ဢမ်ႇမီးငိုၼ်းတႃႇၵႃႈၸရိပ်ႈၵေႃႈ ဢမ်ႇႁူႉ။ ထႅင်ႈပိူင်ၼိုင်ႈ ၵေႃႈ ပေႃးမၼ်းၸဝ်ႈထၢၵ်ႈလူင်းဝတ်ႉၵႂႃႇယဝ်ႉၸိုင် သမ်ႉတူၵ်းၼႃႈႁိူၼ်းၶဝ်လႆႈႁဵတ်းသိုၵ်းလႄႈ ပဵၼ်ဝႆႉ လၢႆလွင်ႈလၢႆ တၢင်းသေ ထႅင်ႈလွင်ႈၼိုင်ႈၵေႃႈ ပေႃႈသမ်ႉ ပဵၼ်ပေႃႈသိုပ်ႇၵူၺ်းလႄႈ မၼ်းၸဝ်ႈတေၸႂ်လဵၵ်ႉသေ ၵႂႃႇၽႅၼ်ၶေႃးတၢႆ ၵေႃႈပဵၼ်လႆႈ” ဝႃႈၼႆ။

ၸဝ်ႈသၢင်ႇ ၶေႇမိၼ်ႇတၼႆႉ ႁၢႆတူဝ် ဢွၵ်ႇဝတ်ႉၵႂႃႇ မိူဝ်ႈဝၼ်းတီႈ 12/03/2019 ယၢမ်းၵၢင်ၶမ်ႈ 6 မူင်းသေ ထိုင်မႃး ဝၼ်း တီႈ 13 ယၢမ်းၵၢင်ဝၼ်းသမ်ႉ ၵူၼ်းဝၢၼ်ႈ လႄႈ သင်ၶၸဝ်ႈ ၸင်ႇၵႂႃႇထူပ်းႁၼ် မၼ်းၸဝ်ႈၽႅၼ်ၶေႃးတၢႆဝႆႉ၊ တီႈဢမ်ႇ ပေႃးၸမ် ပေႃးၵႆဝၢၼ်ႈ။

ၸဝ်ႈသၢင်ႇၶေႇမိၼ်ႇတၼႆႉ ဢႃယု လႆႈ 14 ပီ ပဵၼ်ၵူၼ်းဝၢၼ်ႈၼမ်ႉႁူၵ်း ပဵၼ်လုၵ်ႈၸၢႆး လုင်းၸၢႆးသႃႇဢွင်ႇ ပႃႈၼၢင်း လႅင်။ တေႃႈလဵဝ်တႄႉ ယူႇတီႈသင်ၶၸဝ်ႈလႄႈ ပေႃႈမႄႈပီႈၼွင်ႉၸိူဝ်ႉၶိူဝ်း မၼ်းၸဝ်ႈ လႆႈဢွၼ်ၵၼ်လုမ်းလႃး ပူၼ်ႉၶၢပ်ႈတူဝ် သၢင်းၵဵဝ်ႇၵႂႃႇယဝ်ႉ ဝႃႈၼႆ။

Photo by – U Vicittasara/ မိူဝ်ႈသၢင်းၵဵဝ်ႇ ၶၢပ်ႈတူဝ် ၸဝ်ႈသၢင်ႇ ၶေႇမိၼ်ႇတ

ၸဝ်ႈၸၢင်း တီႈဝၢၼ်ႈ ဢၼ်ၶိုၼ်ႈႁဵၼ်းၸၼ်ႉၸွမ် တီႈမိူင်းသီႇႁူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ပၼ်ႁႃ ၵူႈလွင်ႈလွင်ႈ ၼႆႉ မၼ်း မီးတၢင်းဢွၵ်ႇမၼ်းယူႇ။ ၸဝ်ႈသၢင်ႇဢၼ်လႆႈလွၼ်ႇၵႂႃႇၼၼ်ႉၵေႃႈ ဢႃယုလဵၵ်ႉၵေႃႈပိူင်ၼိုင်ႈ၊ တေပဵၼ် ၵူၼ်းၸႂ် လဵၵ်ႉငၢႆႈၵေႃႈပိူင်ၼိုင်ႈသေ လႆႈၶႃႈတူဝ်ၸဝ်ႈၵဝ်ႇၶိုၼ်းၼႆႉ ပဵၼ်ဢၼ်ၸႂ်ဢမ်ႇလီၸွမ်းတႄႉၶႃႈ။ ယွၼ်ႉၼႃႈ ႁိူၼ်း လၢႆ လၢႆလွင်ႈသေ သင်ဝႃႈ ၵေႃႉပဵၼ်ပေႃႈမႄႈ လၢတ်ႈၼႄ တီႈၸဝ်ႈၸၢင်း ၸဝ်ႈတူၼ်ၶူးလူင်ၶဝ် လွင်ႈယၢပ်ႇ ၽိုတ်ႇၼႂ်းၼႃႈႁိူၼ်းယေးၸဝ်ႈၵဝ်ႇၸိုင် ယူဝ်တေမီးၸဝ်ႈသတ်ႉထႃး ၽူႈၵူၼ်းလီၶဝ် ၶႂ်ႈၵမ်ႉထႅမ် ပၼ် လွင်ႈၵၢၼ်ႁဵၼ်း မၼ်းၸဝ်ႈသေ လႆႈၵႂႃႇၶိုၼ်ႈႁဵၼ်းတၢင်းမိူင်းမၢၼ်ႈၵေႃႈပဵၼ်လႆႈယူႇ” ဝႃႈၼႆ။

ဢိူင်ႇသီႇထွၵ်ႈၼႆႉ ယၢၼ်ၵႆ ထုင်ႉၼမ်ႉလၼ်ႈ မွၵ်ႈ 10 လၵ်းပၢႆ မီးၾၢႆႇႁွင်ႇၼမ်ႉလၼ်ႈ ယူႇၼႂ်းၸႄႈဝဵင်းသီႇပေႃႉ။ ၾၢႆႇၼိုင်ႈၼႂ်းပိုၼ်ႉတီႈဢမ်ႇၼိမ်သဝ်း၊ သိုၵ်းတႆးၼင်ႇၵၼ်ယိုဝ်းၵၼ်၊ ၶၢၼ်းသိုၵ်းမႂ်ႇ၊ ၵဵပ်းသိုၵ်းမႂ်ႇ ၸိူဝ်းၼႆႉၵေႃႈမီးယူႇ ၶိူဝ်းယႂ်းယႂ်းၼႆ ၸဝ်ႈတူၼ်ၶူးထုင်ႉသီႇပေႃႉ-ၼမ်ႉလၼ်ႈၸဝ်ႈၼိုင်ႈလၢတ်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း