သိုၵ်း SSPP တင်း သိုၵ်း RCSS တိုၵ်းယိုဝ်းၵၼ်ၼႂ်းၸႄႈဝဵင်းသီႇပေႃႉလႄႈ ၵူၼ်းဝၢၼ်ႈၼႂ်းထုင်ႉၼမ်ႉလၼ်ႈ ႁိမ်း ဝၢၼ်ႈၼႃးမၢၵ်ႇၶေႃၼၼ်ႉ ၵူၼ်းမိူင်းၵေႃႉၼိုင်ႈ လႆႈတိူဝ်ႉၺႃးၸၢၵ်ႇမၢၵ်ႇၸွမ်း ဝႃႈၼႆ။
ဝၼ်းတီႈ 12/03/2019 ၸၢႆးၵႃႇလိင်ႇ ဢႃယု 25 ပီ ၵူၼ်းဝၢၼ်ႈ မၢၼ်ႈမႂ်ႇ ဢိူင်ႇၵုင်းသေႃႉ ၸႄႈဝဵင်းသီႇပေႃႉ ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇ တိူဝ်ႉၺႃးၸၢၵ်ႇမၢၵ်ႇ တီႈၵွင်ႇၵေႃႈမၼ်းၸၢႆးသေ တေႃႈလဵဝ် လႆႈသူင်ႇယူတ်းယႃတူဝ်ဝႆႉ တီႈ ႁူင်းယႃသီႇပေႃႉ ဝႃႈၼႆ။
ၵူဝ်ႇၸေႃႇၺီႇၺီႇ ၸုမ်းၸွႆႈထႅမ် ပရႁိတ Dear Ranger လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၸၢႆးတိူဝ်ႉၺႃးၸၢၵ်ႇမၢၵ်ႇ မိူဝ်ႈဝႃး။ ၵူၺ်းၵႃႈ မိူဝ်ႈၼႆႉ ယၢမ်းၵၢင်ၼႂ် 6 မူင်း ႁဝ်းၶႃႈ ၸင်ႇလႆႈၵႂႃႇႁပ်ႉဢဝ်ဢွၵ်ႇမႃး။ မၼ်းၸၢႆးႁွတ်ႈၽႅဝ်မႃးတီႈႁူင်း ယႃ ၼမ်ႉလၼ်ႈ မွၵ်ႈ 9 မူင်းၵၢင်ၼႂ်ၼႆႉၶႃႈ။ ယွၼ်ႉဝႃႈ မၼ်းၸၢႆးမၢတ်ႇၸဵပ်းသေ လူဝ်ႇယႃႈယႃၼႆလႄႈ လႆႈသိုပ်ႇသူင်ႇ ယူတ်းယႃတီႈ ႁူင်းယႃ သီႇပေႃႉဝႆႉဢေႃႈ” ဝႃႈၼႆ။
ၸၢႆးၵႃႇလိင်ႇ ၵေႃႉၺႃးၸၢၵ်ႇမၢၵ်ႇၼၼ်ႉ တိူဝ်ႉၺႃးတီႈၵွင်ႇၵေႃႈသေ လႆႈသူင်ႇယူတ်းယႃတူဝ်ဝႆႉ တီႈႁူင်းယႃသီႇပေႃႉ ယဝ်ႉ ဝႃႈၼႆ။
ဝူင်ႈၼႆႉ ယွၼ်ႉပၢင်တိုၵ်းသေ ၵူၼ်းမိူင်း ၸိူဝ်းယူႇၼႂ်းၵႄႈၸႄႈဝဵင်းသီႇပေႃႉ-ၼမ်ႉလၼ်ႈ လႆႈၺႃးၸၢၵ်ႇမၢၵ်ႇဢမ်ႇယွမ်း 4 ၵေႃႉ ဝႃႈၼႆ။
ၵူဝ်ႇၸေႃႇၺီႇၺီႇ လၢတ်ႈဝႃႈ “ ယွၼ်ႉပဵၼ်ပၢင်တိုၵ်းၵၼ်သေ ၵူၼ်းမိူင်းဢမ်ႇလႆႈႁဵတ်းၵၢၼ်လီလီ ၵုမ်ႇလႆႈပၢႆႈၽေး သိုၵ်းၵူၺ်း။ လီဢေးလူၵူၼ်းမိူင်းတႄႉၶႃႈ” ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈဝတ်ႉမၢၼ်ႈလီႈၼႆႉ မီးၵႂႃႇႁူဝ်ၵူၼ်း ႁိမ်း 1,400 ၵေႃႉယဝ်ႉ။ မိူဝ်ႈဝႃးၵေႃႈ ယွၼ်ႉပဵၼ်ပၢင်တိုၵ်းၵၼ်သေ ၵူၼ်းဝၢၼ်ႈ 170 ပၢႆ လႆႈဢွၼ်ၵၼ်ပၢႆႈမႃးသွၼ်ႈဝႆႉတီႈ ဝတ်ႉၼႃးမၢၵ်ႇၶေႃ ထႅင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ