ၼႂ်းဝဵင်းၶူဝ်လမ် ၾႆးမႆႈႁိူၼ်းလင်ၼိုင်ႈ

မိူဝ်ႈၼႆႉ ယၢမ်းၵၢင်ဝၼ်းၸၢႆႉ ၾႆးမႆႈႁိူၼ်းၵူၼ်းဝၢၼ်ႈ လင်ၼိုင်ႈ ၼႂ်းပွၵ်ႉ 4 ဝဵင်းၶူဝ်လမ်၊ ၸဝ်ႈႁိူၼ်းဢမ်ႇယူႇလႄႈ မႆႈယွၼ်ႉသင် ပႆႇႁူႉလွင်ႈတၢင်း။

မိူဝ်ႈၼႆႉ ဝၼ်းတီႈ 13/03/2019 ယၢမ်းဝၢႆးဝၼ်း ၾႆးမႆႈႁိူၼ်း လုင်းသူႉပၺ်ၺႃလႄႈ ပႃႈၶမ်းဢွင်ႇ ပွၵ်ႉ 4 ၾၢႆႇၸၢၼ်း ၵၢတ်ႇ ဝဵင်းၶူဝ်လမ် ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ယွၼ်ႉသင်လႄႈ မႆႈဢၼ်ဝႃႈ ၼၼ်ႉ ပႆႇႁူႉ လွင်ႈ တၢင်းမၼ်း ဝႃႈၼႆ။

ၸၢႆးသိူဝ် ၵူၼ်းၶူဝ်လမ် လၢတ်ႈတီႈၽူႈတွႆႇႁွၵ်ႈဝႃႈ “ တီႈႁိူၼ်းၼၼ်ႉ ၸဝ်ႈၶွင်ႁိူၼ်းၵႂႃႇ ပွႆးလိူၼ်သီႇႁူဝ်လိုင်း။ မီးၵူၼ်းပႂ်ႉ လၢၼ်ႉၶၢႆၶူဝ်းၶဝ် ယူႇၸၼ်ႉတႂ်ႈသုတ်း ၾႆးသမ်ႉမႆႈၸၼ်ႉၼိူဝ် ဢမ်ႇမီးၽႂ်ယူႇၼိူဝ်ႁိူၼ်း ၸဝ်ႈၼႃႈတီႈ လၢမ်းၶၢတ်ႈ တႄႉ လႅပ်ႈတေပဵၼ်မေႃႈထိင်းၾႆးတႅၵ်ႇ ၼႆၶႃႈဝႃႇ။ ၵူၼ်းဝၢၼ်ႈ လႄႈ ၵႃးႁူတ်း ၼမ်ႉ 2 လမ်း မႃးၸွႆႈ ႁူတ်းသေ တိုၵ်ႉမွတ်ႇၵႂႃႇမိူဝ်ႈၵႆႈၼႆႉၵူၺ်း” ဝႃႈၼႆ။

မၼ်းၸၢႆးလၢတ်ႈထႅင်ႈဝႃႈ ၾႆးၼႆႉမႆႈၸၼ်ႉၼိူဝ်ၵူၺ်း ဢမ်ႇလႆႈလၢမ်းမႆႈပႃးၸၼ်ႉတႂ်ႈ လႄႈ လွင်ႈလူႉသုမ်းၵေႃႈ ဢမ်ႇမီးၼမ် ဝႃႈၼႆ။

ယွၼ်ႉပဵၼ်ၶၢဝ်းလိူၼ်သီႇ လူမ်းၵေႃႈပဝ်ႇႁႅင်းဝႆႉလႄႈ ၵူၼ်းဝၢၼ်ႈ ဢွၼ်ၵၼ်တူၵ်းၸႂ်ၵူဝ်ႁႄ ယွၼ်ႉပိူဝ်ႈ ႁိူၼ်းလုင်း သူႉပၺ်ၺႃ လႄႈ ပႃႈၶမ်းဢွင်ႇၼႆႉ ယူႇၵၢင်ဝဵင်းဝႆႉ ဝႃႈၼႆ။

ႁိူၼ်းလုင်းသူႉ ပၺ်ၺႃ လႄႈ ပႃႈၶမ်းဢွင်ႇ ပွၵ်ႉ 4 ၼႆႉ ပဵၼ်ႁိူၼ်း 2 ၸၼ်ႉ ၸၼ်ႉတႂ်ႈသမ်ႉ ပိုတ်ႇႁၢၼ်ႉၶၢႆၶူဝ်းဝႆႉ။ ၵူၼ်းႁိူၼ်းတႄႉ မီး 4 ၵေႃႉ ၵူၺ်းၵႃႈ ၸဝ်ႈႁိူၼ်းတႄႉ ဢမ်ႇယူႇႁိူၼ်းသေၵေႃႉ မီးၵူၼ်းပႂ်ႉလၢၼ်ႉၶၢႆၶွင်ၵူၺ်း ဝႃႈၼႆ။