ၸုမ်းဢမ်ႇႁူႉၾၢႆႇ ၶဝ်ႈယိုဝ်းၵူၼ်းဝၢၼ်ႈၼွင်ပိင်လူင် ၸႄႈဝဵင်းၵျွၵ်ႉမႄး တၢႆၵိုၵ်းႁိူၼ်းၵေႃႉၼိုင်ႈ လွင်ႈၼႆႉ ပဵၼ်ၼမ်ႉ မိုဝ်း ၽႂ် ႁဵတ်းဢၼ်ဝႃႈၼၼ်ႉ ပႆႇႁူႉ ဝႃႈၼႆ။
ဝၼ်းတီႈ 10/03/2019 ယၢမ်းၵၢင်ၶမ်ႈ မွၵ်ႈ 8 မူင်း ၸုမ်းဢမ်ႇႁူႉၾၢႆႇ ၶဝ်ႈယိုဝ်းၼႂ်းႁိူၼ်းၵူၼ်းဝၢၼ်ႈၼွင်ပိင်လူင် ၸႄႈ ဝဵင်း ၵျွၵ်ႉမႄး ၸိုင်ႈတႆးပွတ်းႁွင်ႇ ၸဝ်ႈႁိူၼ်း ၸၢႆးပီး ဢႃယု မွၵ်ႈ 30 ပီပၢႆ တိူဝ်ႉၺႃးမၢတ်ႇၵွင်ႈ လၢႆႁွႆး/ လၢႆၵမ်းသေ လႆႈ လူႉတၢႆ တီႈ ႁိူၼ်းမၼ်းၸၢႆးၵမ်းလဵဝ် ဝႃႈၼႆ။
ၵူၼ်းမိူင်းၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းဝႃႈ မီးၵူၼ်းႁၢႆႉၶဝ်ႈယိုဝ်း ၵူၼ်းဝၢၼ်ႈၼွင်ပိင်သေ လႆႈလူႉတၢႆၼႆဝႃႇ။ ၵူၺ်းၵႃႈ ပဵၼ်ၽႂ် ၼမ်ႉမိုဝ်းၽႂ်မႃးယိုဝ်း ဢၼ်ဝႃႈၼၼ်ႉ ဢမ်ႇလႆႈႁူႉၸွမ်း။ လၢႆးႁူဝ်ယွႆႈယႅမ်းၵေႃႈ ဢမ်ႇလႆႈႁူႉလီ ပဵၼ်လွင်ႈတၢင်းသင်သေၺႃးယိုဝ်း ဢၼ်ဝႃႈၼၼ်ႉ” ဝႃႈၼႆ။
တီႈသိုဝ်ႇၶၢဝ်ႇ DVB ဢွၵ်ႇဝႆႉဝႃႈ “ မီးၽူႈၸၢႆး 2 ၵေႃႉ ၶီႇရူတ်ႉၶိူင်ႈမႃးၸွမ်းၵၼ်သေ ၵေႃႉၼိုင်ႈပႂ်ႉတီႈရူတ်ႉၶိူင်ႈ ၵေႃႉ ၼိုင်ႈ ပႆၶဝ်ႈႁိူၼ်းသေ လၼ်ႇၵွင်ႈယိုဝ်းသႂ်ႇ ၸၢႆးဢၢႆႈပီး တိုၵ်ႉၼင်ႈလဵၼ်ႈၾူၼ်းယူႇ တီႈၼႃႈႁိူၼ်းၼၼ်ႉ” ဝႃႈၼႆ။
ၸဝ်ႈႁိူၼ်း ၵေႃႉၺႃးယိုဝ်းတၢႆၼၼ်ႉ ၸိုဝ်ႈႁွင်ႉ တၢၼ်းသေႃႇထူၺ်း (ႁွင်ႉ) ဢၢႆႈပီး ဢႃယု 33 ပီ ပဵၼ်ၵူၼ်းႁဵတ်းၵိၼ် ၵၢၼ်ၵႃႉၶၢႆ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 9/3/2019 ၼၼ်ႉၵေႃႈ ၵူၼ်းမိူင်းငေႃႉ ၼၢင်းၶမ်းလႃႉ ဢႃယု 50 ပီ ၺႃးယိုဝ်းၵႄႈပၢင်တိုၵ်းသိုၵ်း TNLA တင်းသိုၵ်းလူင်ပွင်ၸိုင်ႈမၢၼ်ႈ။ တေႃႈလဵဝ် မၼ်းၼၢင်း တိုၵ်ႉလႆႈယူတ်းယႃတူဝ်ဝႆႉတီႈႁူင်းယႃ ၵျွၵ်ႉမႄးဝႆႉယူႇ ဝႃႈၼႆ။
ၵဵဝ်ႇၵပ်းၵၢၼ်ယိုဝ်းၵၼ်တၢႆ ၼႂ်းၸႄႈဝဵင်းၵျွၵ်းမႄးၼႆႉ ၵူၼ်းမိူင်း၊ ၵူၼ်းႁေႃႈၵႃးတၢင်ႇဝူဝ်း/ ၵႂၢႆး၊ မုၼ်ၸဝ်ႈ လႆႈၺႃး ယိုဝ်းတၢႆမႃး တေႃႇထိုင်ယၢမ်းလဵဝ် ပဵၼ်ၸုမ်းလႂ် ၵေႃႉလႂ် ၼမ်ႉမိုဝ်းၽႂ် ႁဵတ်းဢၼ်ဝႃႈၼၼ်ႉ ပႆႇလႆႈႁူႉ ၸဝ်ႈၼႃႈတီႈ ပလိၵ်ႈ ၸႄႈဝဵင်းၵျွၵ်ႉမႄးၵေႃႈ ဢမ်ႇတီႉၺွပ်းလႆႈသေပွၵ်ႈ။ လိူဝ်ၼၼ်ႉ လွင်ႈႁူမ်ႇလူမ်ႈၵူၼ်းမိူင်းၵေႃႈ ဢမ်ႇမီးၵူၼ်း မိူင်းၵျွၵ်ႉ မႄးလၢတ်ႈၼင်ႇၼႆ။
