ၵူၼ်းၼုမ်ႇတႆး ပၼ်ႇရူတ်ႉထိပ်ႇ ဢၼ်တႄႇတီႈဝဵင်းၵဵင်းမႆႇ မိူင်းထႆး ပၼ်ႇလဵပ်ႈမိူင်းတႆးပွတ်းဢွၵ်ႇ၊ ပွတ်းၸၢၼ်း၊ ယၢင်းလႅင်ယဝ်ႉ လူင်းထိုင် ၵျၢႆႉထီးယူဝ်း တႃႇၵုင်ႈ၊ ၼေႇပျီႇတေႃႇ၊ ပူးၵမ်ႇယဝ်ႉ မိူဝ်ႈၶမ်ႈဝႃးၼႆႉ ၶဝ်ႈထိုင်ဝဵင်းလိူဝ်ႇ (မၼ်းတလေး) သေႁၢင်ႈႁႅၼ်းတေၶိုၼ်ႈမိူင်းတႆးပွတ်းႁွင်ႇ။
ဝၼ်းတီႈ 13/03/2019 ၼႆႉ ၼုမ်ႇတႆး 2 ပီႈၼွင်ႉ ၸၢႆးသႅင်ႁၢၼ်လႄႈ ၸၢႆးဢွၼ်ႇၶိူဝ်း တင်း ၸၢႆးထဵင်ႇလိၼ်း ၶဝ်သၢမ် ၵေႃႉ ပၼ်ႇရူတ်ႉထိပ်ႇ ၶွပ်ႈတဵမ် 2 လိူၼ် တႄႇၵဵင်းမႆႇ ၸိုင်ႈထႆး ဢွၵ်ႇမႃး မိူဝ်ႈဝၼ်းတီႈ 13/01/2019 သေ တေႃႈလဵဝ် ပၼ်ႇႁွတ်ႈထိုင် ဝဵင်းလိူဝ်ႇ(မၼ်းတလေး)၊ မႄးၵူတ်ႉရူတ်ႉထိပ်ႇယဝ်ႉ ႁၢင်ႈႁႅၼ်းတေပၼ်ႇမိူဝ်းမိူင်းတႆး ပွတ်းႁွင်ႇ။
ၸၢႆးဢွၼ်ႇၶိူဝ်း ၵေႃႉပၼ်ႇရူတ်ႉထိပ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းၶႃႈ ပၼ်ႇရူတ်ႉထိပ်ႇမႃး ၼႂ်းၶၢဝ်းတၢင်း 2 လိူၼ်ၼႆႉ ပဵၼ်ဢၼ်ႁၢၼ်ႉၸႂ်တႄႉတႄႉ။ ယဝ်ႉၵေႃႈတီႈဢၼ်ႁဝ်းပႆႇထိုင်လႄႈသင်၊ တီႈဢၼ်ႁဝ်းပႆႇႁၼ် လႄႈသင် ႁဝ်းၶႃႈ လႆႈၶတ်းၸႂ် ပၼ်ႇၵႂႃႇ ထိုင်လႆႈ ႁၼ်လႆႈ၊ ဢမ်ႇဝႃႈမၼ်းၵႆၵႃႈႁိုဝ် ႁဝ်းၶႃႈ ၶတ်းၸႂ်ပၼ်ႇလဵပ်ႈတူၺ်းၶႃႈ။ တေႃႈ လဵဝ် ႁဝ်းၶႃႈ မႃးႁွတ်ႈၽႅဝ် တၢင်းပွတ်းလိၼ်ထုင်ႉပဵင်းဝႆႉၼႆ ၾိင်ႈၾႃႉမၼ်းတေမႆႈ ၵူၺ်းၵႃႈ ႁဝ်းၶႃႈၵေႃႈ မၼ်ႈၸႂ် ယုမ်ႇၸႂ် ႁဝ်းၶႃႈ တီႈဢၼ်ႁဝ်းၶႃႈ ပၼ်ႇလႆႈႁဵတ်းလႆႈ” ဝႃႈၼႆ။
သိုပ်ႇလၢတ်ႈဝႃႈ “ ယိၼ်းၸူမ်းၶွပ်ႈၸႂ်ယႂ်ႇၼမ် ပီႈၼွင်ႉႁဝ်းၶႃႈ ဢၼ် ၸွႆႈႁဝ်းၶႃႈ ၸွမ်းတၢင်း ၸဵမ်လွင်ႈၵိၼ်ယႅမ်ႉလႄႈ တီႈယူႇတၼ်းသဝ်း တင်းမူတ်း။ တေႃႈလဵဝ် ထိုင်ၶၢဝ်းမႆႈယဝ်ႉလႄႈ ဢွၼ်ၵၼ်ၾင်ႉတူၺ်းၽိုၼ်း တူၺ်းၾႆးၵၼ် ၽွင်ႈၶႃႈ။ လိူဝ်ၼၼ်ႉ လွင်ႈၽဝ်ပႃႇၸိူဝ်းၼႆႉ ပေႃးပဵၼ်လႆႈၼႆ ယႃႇပေၸုတ်ႇၽဝ်၊ ပေႃးၸုတ်ႇၽဝ်ၼႆႉ ႁဵတ်းႁႂ်ႈ တူဝ် ၸႂ် သတ်းဢၼ်မီးၼႂ်းပႃႇ တေယူႇယၢပ်ႇ ယွၼ်ႉသၢႆၾႆးဢွၼ်ႇ ဢၼ်ၼိုင်ႈၵူၺ်း တေတုမ်ႉတိူဝ်ႉ ထိုင်သၢႆၸႂ် လွင်ႈၼႆႉ ဢမ်ႇၶႂ်ႈႁႂ်ႈဢွၼ်ၵၼ်ၸုတ်ႇၽဝ်ထိူၼ်ႇပႃႇၵၼ်ၶႃႈ”ဝႃႈၼႆ။
လိူဝ်ၼၼ်ႉ တွၼ်ႈတႃႇတေပၼ်ႇရူတ်ႉထိပ်ႇ ပၼ်ႁႅင်းၸႂ် ၵူၼ်းပၢႆႈၽေးသိုၵ်းလႄႈ ႁပ်ႉလွင်ႈလူႇၶၢမ်ႇ တီႈပီႈၼွင်ႉၵူၼ်း မိူင်း တႃႇၵမ်ႉထႅမ် ၵူၼ်းပၢႆႈၽေးသိုၵ်း တီႈသီႇပေႃႉ ၵျွၵ်ႉမႄး လႄႈ ဢိၵ်ႇထႅင်ႈလၢႆလၢႆတီႈၼၼ်ႉ တိုၵ်ႉတေဢုပ်ႇဢူဝ်း ၸွမ်းၵူၼ်းၼုမ်ႇတႆး ပွတ်းႁွင်ႇ ဝႃႈတေဝၢင်းၽႅၼ်ၸိူင်ႉႁိုဝ် ဝႃႈၼႆ။
ၸၢႆးဢွၼ်ႇၶိူဝ်း လၢတ်ႈဝႃႈ“ လွင်ႈဢၼ်ႁဝ်းၶႃႈ ယိူင်းဢၢၼ်း တေပၼ်ႇရူတ်ႉထိပ်ႇ ပၼ်ႁႅင်းၸႂ် ၵူၼ်းပၢႆႈၽေးသိုၵ်းႁဝ်း တၢင်း ပွတ်းႁွင်ႇၼၼ်ႉ ႁဝ်းၶႃႈ တေဢုပ်ႇၵၼ် တင်းၵူၼ်းၼုမ်ႇပွတ်းႁွင်ႇထႅင်ႈၵမ်းၼိုင်ႈၶႃႈ ဝႃႈတေဝၢင်းၽႅၼ် ႁဵတ်း ၸိူင်ႉႁိုဝ် တေပၼ်ႇတၢင်းလႂ်ၵႂႃႇဢွၼ်တၢင်း ၸဵမ်ၼႆၶႃႈ” ဝႃႈၼႆ။
ၶၢဝ်းတၢင်းၵူၼ်းၼုမ်ႇတႆး ဢၼ်ပၼ်ႇရူတ်ႉထိပ်ႇၵႂႃႇသမ်ႉ တႄႇဢဝ်ၵဵင်းမႆႇ ၸိုင်ႈထႆး ပၼ်ႇႁွတ်ႈထိုင် တႃႈၶီႈလဵၵ်း၊ တႃႈလိူဝ်ႇ၊ မိူင်းၽျၢၵ်ႈ၊ ၵဵင်းတုင်၊ မိူင်းသၢတ်ႇ၊ မိူင်းတူၼ် ၼႂ်းၸိုင်ႈတႆးပွတ်းဢွၵ်ႇၶူင်း။ လိူဝ်ၼၼ်ႉ ပၼ်ႇၵႂႃႇတၢင်းမိူင်း ပၼ်ႇ၊ မိူင်းၼၢႆး၊ လၢင်းၶိူဝ်း၊ ၵဵင်းတွင်း၊ မွၵ်ႇမႆႇ၊ ၶူဝ်လမ်၊ ၼမ်ႉၸၢင်၊ ပၢင်လူင်၊ လွႆလႅမ်၊ တူၼ်ႈတီး၊ ယွင်ႁူၺ်ႈ၊ ပၢင်လွင်း ၸိုင်ႈတႆးပွတ်းၸၢၼ်း။ သိုပ်ႇလူင်းၵႂႃႇတၢင်းၸႄႈမိူင်းယၢင်းလႅင်၊ ၸႄႈမိူင်းမွၼ်း၊ တႃႈၵုင်ႈ ယဝ်ႉၵေႃႈ ၶိုၼ်ႈ မႃးတၢင်း ၼေႇပျီႇတေႃႇ။ လိူဝ်ၼၼ်ႉ သိုပ်ႇၵႂႃႇတၢင်း ပၵၢၼ်ႇ၊ ဝဵင်းလိူဝ်ႇသေ တေသိုပ်ႇၶိုၼ်ႈၵႂႃႇတၢင်းပၢင်ဢူႈလူင်၊ ယဝ်ႉၵေႃႈ တေသိုပ်ႇၶိုၼ်ႈမိူင်းတႆး ပွတ်းႁွင်ႇသေ တေၶဝ်ႈၶိုၼ်းၵွၼ်ၵၢင်ၸိုင်ႈတႆး သိုပ်ႇၸူးပွတ်းဢွၵ်ႇၶူင်း ယိူင်း ထိုင်မိူင်းလူၺ် မိူင်းလႃး ၸိူဝ်းၼႆႉလူးၵွၼ်ႇ ဝႃႈၼႆ။
