သင်ၶၸဝ်ႈလႄႈ ၵူၼ်းမိူင်းလၢႆးၶႃႈ ဢုပ်ႇဢူဝ်းၵၼ် ႁၢင်ႈႁႅၼ်းတုၵ်းယွၼ်း ၸိုဝ်ႈၵၢတ်ႇ၊ ၸိုဝ်ႈတၢင်း ၼႂ်းဝဵင်းလၢႆးၶႃႈ ႁႂ်ႈလႆႈပႃးလိၵ်ႈတႆး၊ လိၵ်ႈဢင်းၵိတ်းလႄႈ လိၵ်ႈမၢၼ်ႈ ဝႃႈၼႆ။

ဝၼ်းတီႈ 10/03/2019 ယၢမ်းဝၢႆးဝၼ်း 1 မူင်း သင်ၶၸဝ်ႈ၊ ၵူၼ်းမိူင်း၊ ၽူႈတႅၼ်းသၽႃးလႄႈ ၸုမ်းတူင်ႉၼိုင်တူင်ႇ ဝူင်း တႆး ၼႂ်းၸႄႈဝဵင်းလၢႆးၶႃႈ ၸတ်းႁဵတ်းပၢင်ၵုမ် ဢုပ်ႇဢူဝ်းၵၼ် လွင်ႈတေသႂ်ႇလိၵ်ႈတႆး တီႈပၢႆႉၶဝ်ႈၵၢတ်ႇလူင် ဝဵင်းလၢႆး ၶႃႈလႄႈ လႅၵ်ႈလၢႆႈၸိုဝ်ႈ ၸွမ်းသဵၼ်ႈတႃႈသၢႆတၢင်း တႄႇဢဝ် ပွၵ်ႉ 1 ထိုင် ပွၵ်ႉ 4 တေလႅၵ်ႈသႂ်ႇၸိုဝ်ႈတႆး ၸဵမ်ၸိူဝ်း ၼႆႉ။ ပၢင်ၵုမ်ၼႆႉ ၸတ်းႁဵတ်းတီႈဝိႁၢရ်ၵျွင်းႁေႃၶမ်း ပွၵ်ႉ 2 ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။

ၸၢႆးယွတ်ႈ ၵူၼ်းမိူင်းလၢႆးၶႃႈ ၵေႃႉၼိုင်ႈ ၶဝ်ႈႁူမ်ႈပၢင်ၵုမ် လၢတ်ႈတီႈၽူႈတွႆႇႁွၵ်ႈဝႃႈ “ တႅၼ်းၽွင်းလၢႆးၶႃႈႁဝ်း ၸၢႆးၵျေႃႇ ၸေႇယ ဢွၼ်ႁူဝ်ၼမ်းၼႃႈသေ မီးသင်ၶၸဝ်ႈလႄႈ ၽူႈယႂ်ႇၵူၼ်းလူင်ၼႂ်းဝဵင်းလၢႆးၶႃႈ ႁူမ်ႈပႃးတင်းၸုမ်းတူင်ႇဝူင်း ၵူၼ်း ဢုပ်ႇ ဢူဝ်းၵၼ်သေ တေသႂ်ႇလိၵ်ႈတႆးလႄႈ လႅၵ်ႈသႂ်ႇၸိုဝ်ႈတႆး။ လိၵ်ႈတႆးၼၼ်ႉ ႁဝ်းၶႃႈတေသႂ်ႇတီႈပၢႆႉၵၢတ်ႇ ဝဵင်းလၢႆးၶႃႈ တေသႂ်ႇ 3 ၽႃ သႃ လိၵ်ႈတႆး၊ လိၵ်ႈမၢၼ်ႈလႄႈ လိၵ်ႈဢင်းၵိတ်း လိၵ်ႈတႆးတႄႉ တေတႅမ်ႈသႂ်ႇတူဝ်ယႂ်ႇသႂ်ႇ ၸိုဝ်ႈဝႃႈ ၵၢတ်ႇလူင် မိူင်း လၢႆးၶႃႈ” ဝႃႈၼႆ။

သိုပ်ႇလၢတ်ႈဝႃႈ “ လႅၵ်ႈသႂ်ႇၸိုဝ်ႈတႆး ဢၼ်ဝႃႈၼၼ်ႉ ႁဝ်းၶႃႈတေသႂ်ႇၸွမ်းသဵၼ်ႈတၢင်း ၼႂ်းဝဵင်းလၢႆးၶႃႈ တႄႇဢဝ် ပွၵ်ႉ 1 ထိုင်ပွၵ်ႉ 4 ။ လိၵ်ႈမၢၼ်ႈတႄႉတေတႅမ်ႈသႂ်ႇ ႁႂ်ႈဢွၵ်ႇသဵင်တႆး။ တွၼ်ႈတႃႇ တေတႅမ်ႈလိၵ်ႈတႆး ၵိုၵ်းၸွမ်းၼၼ်ႉ ႁဝ်းၶႃႈတေဝႆႉထႅင်ႈၶၵ်ႉၼိုင်ႈ ယွၼ်ႉဝႃႈ ႁႅင်းငိုၼ်းႁဝ်း တိုၵ်ႉဢေႇယူႇ” ဝႃႈၼႆ။

ၵဵဝ်ႇလူၺ်ႈလွင်ႈတေၵေႃႇသၢင်ႈႁဵတ်းၼႆႉ ယူႇတီႈၽူႈၵွၼ်းၸႄႈဝဵင်း၊ ၾၢႆႇလိူမ်ႈလႆႇၸႄႈဝဵင်းၵေႃႈ ႁၼ်လီၸွမ်း။ ၼႂ်း လိူၼ်ၼႆႉ ယူႇတီႈၽွင်းတႅၼ်း ၸၢႆးၵျေႃႇၸေႇယသေ တေတၢင်ႇၸူးထိုင် ၽွင်းလူင်ၾၢႆႇ လိူမ်ႈလႆႇမိူင်းတႆး/ လူင်ပွင် ၸိုင်ႈမိူင်းတႆး။ သင်ဝႃႈ မၵ်းမၼ်ႈလူင်းမႃးယဝ်ႉၸိုင် ၵူၼ်းမိူင်းလၢႆးၶႃႈ ႁၢင်ႈႁႅၼ်းတူဝ်ႈတၼ်းတႃႇတေၵေႃႇသၢင်ႈၵႂႃႇ” ၵူၼ်းမိူင်းလၢႆးၶႃႈ လၢတ်ႈၼင်ႇၼႆ။

ၵဵဝ်ႇလူၺ်ႈလွင်ႈပၢင်ၵုမ်ၼႆႉ မီးသင်ၶၸဝ်ႈ၊ ၵူၼ်းမိူင်း၊ ၽူႈတႅၼ်းလႄႈ ၸုမ်းတူင်ႉၼိုင်တူင်ႇဝူင်းတႆး ၶဝ်ႈႁူမ်ႈ 52 ၵေႃႉ ဝႃႈၼႆ။

လိူဝ်ၼၼ်ႉ ၼႂ်းမိူင်းတႆး လၢႆလၢႆတီႈ မိူၼ်ၵေးသီး၊ မိူင်းၵိုင်လႄႈ မိူင်းယႆ ၸဵမ်ၸိူဝ်းၼႆႉ မိူၼ်ၼင်ႇ ပၢႆႉၵၢတ်ႇ ၸိုဝ်ႈသဵၼ်ႈ တၢင်း ၸိူဝ်းၼႆႉၵေႃႈ ႁဵတ်းသၢင်ႈယဝ်ႉတူဝ်ႈၵႂႃႇယဝ်ႉ ဝႃႈၼႆ။