ၶွင်ႇသီႇဢဝ်ၶိုၼ်းၸိုင်ႈတႆး RCSS လၢတ်ႈဝႃႈ ထႅင်ႈဢမ်ႇႁိုင်သင်ၼႆ့တေတဵမ် 4 လိူၼ် ဢၼ်သိုၵ်းလူင်ပွင်ၸိုင်ႈ မၢၼ်ႈ ပိုၼ်ၽၢဝ်ႇၵိုတ်းတိုၵ်းယဝ့်လႄႈ ၵဵဝ်ႇလူၺ်ႈလွင်ႈငဝ်းလၢႆးၵူႈလွင်ႈလွင်ႈဢမ်ႇလီမႆႈၸႂ် ၸုမ်းလူင်းလၢႆးမိုဝ်းသိပ်းၸုမ်း တေယူႇၼႂ်းၶွပ်ႇပိူင် NCA သေ တေယွၼ်ႇယၢၼ်းၶဝ်ႈႁႃဢုပ်ႇဢူဝ်းၵၼ်ၵႂႃႇ – ဝႃႈၼႆ။

ႁၢင်ပီ 2018 မႃး တေႃႇယၢမ်းလဵဝ် ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ဢၼ်ၵိုတ်းတိုၵ်းတူဝ်ႈမိူင်းတင်း လူင်ပွင်ၸိုင်ႈၼေႇပျီႇတေႃႇၼၼ့် မီးလွင်ႈတွၵ့်တႅၵ့်တုမ့်တိူဝ့်ၵၼ်ဢိတ်းဢီႈ ယင့်ၵိုတ်းဝႆ့ပၢင်ဢုပ်ႇဢူဝ်းၵၼ် တင်းသဵင်ႈသေတႃ့ ဢမ်ႇထိုင်တီႈမႆႈၸႂ် ၵူဝ်ငမ်းယဵၼ်လူ့ ဢၼ်ၾၢႆႇသိုၵ်းတပ့်မတေႃႇမၢၼ်ႈပိုၼ်ၽၢဝ်ႇၵိုတ်း တိုၵ်းၾၢႆႇလဵဝ်ၶၢဝ်းတၢင်း 4 လိူၼ်ၼၼ့်ၵေႃႈ ၸမ်တေသုတ်းသဵင်ႈယဝ့်လႄႈ ဢမ်ႇမီးလွင်ႈမႆႈၸႂ် ၸုမ်းလူင်းလၢႆးမိုဝ်းသိပ်းၸုမ်း တေယူႇ ၼႂ်းၶွပ်ႇပိူင် NCA သေ ဢုပ်ႇဢူဝ်းၵႄႈ လိတ်ႈပၼ်ႁႃၵႂႃႇ ဝႃႈၼႆ ။

ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း 2 RCSS/SSA လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်သိုၵ်းလူင် ပွင်ၸိုင်ႈ ပိုၼ်ၽၢဝ်ႇၼၼ့် မၼ်းပဵၼ်လွင်ႈၶဝ်ၵူၺ်း ၶဝ်ၵေႃႈၶွတ်ႇၽွတ်ႈၸုမ်းႁဵတ်းၵၢၼ် တပ့်သိုၵ်းၶဝ်ၶေႃၶေႃ တႃႇဢုပ်ႇဢူဝ်းတင်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်းၵေႃႈလီ ဢမ်ႇလူင်းၵေႃႈလီ ၊ တႃႇငူပ့်ငီ့ၵၼ် ၼႂ်းၶၢဝ်းၶိဝ်းၼႆ့ ဢၼ်ၶဝ်ဢုပ်ႇၼၼ့် တိုၵ့်မီးၸုမ်းယိပ်းၵွင်ႈၸုမ်းလဵဝ်ၵူၺ်း ၊ ၵူၺ်းၵႃႈတႃႇတေဢုပ်ႇၵၼ်ၼၼ့် တႄ့ ၾၢႆႇၸၢဝ်းၶိူဝ်းႁဝ်းၶႃႈၵေႃႈ ႁၢင်ႈႁႅၼ်းဝႆ့ယူႇ ၊ ႁဝ်းၶႃႈတေယွၼ်ႇယၢၼ်းသေ ဢုပ်ႇဢူဝ်းၵၼ်၊ တေယူႇၼႂ်းၶွပ်ႇပိူင် NCA သေ ၶတ်းၸႂ်ၶဝ်ႈႁႃၵၼ်ဢုပ်ႇဢူဝ်းၵၼ်ၵႂႃႇ၊ ၼင်ႇႁိုဝ် NCA တေဢမ်ႇလူ့။ ၼင်ႇႁိုဝ်ယိူင်း ဢၢၼ်းႁဝ်းတေထိုင်တီႈ ဢၼ်ဝႃႈမိူင်းႁူမ်ႈတုမ် federal ၼႆၼၼ့် ” ဝႃႈၼႆ။

သိုၵ်းလူင်ပွင်ၸိုင်ႈမၢၼ်ႈၼႆႉ ပိုၼ်ၽၢဝ်ႇဝႆႉပဵၼ်တၢင်းၵၢၼ်မိူဝ်ႈဝၼ်းတီႈ 21/12/2018 ၼၼ်ႉဝႃႈ လႆႈၸီႉသင်ႇ ဝႆႉတိူင်း သိုၵ်း 4 ဢၼ် (ယပၶ၊ ယလၶ၊ မပၶလႄႈ တိူင်းသိုၵ်းသၢမ်ၸဵင်ႇ)၊ သိုၵ်းတပ်ႉမတေႃႇ တေၵိုတ်းတိုၵ်း ၾၢႆႇလဵဝ်တႃႇၶၢဝ်း တၢင်း 4 လိူၼ် (21/12/2018 တေႃႇထိုင် 30/04/2019) ဝႃႈၼႆသေတႃ့ မိူဝ်ႈဝၼ်းတီႈ 25/01/2019 ၼၼ့် ပိုၼ်ၽၢဝ်ႇၾၢင့်ထိုင်ၵူႈမူႇၵူႈၸုမ်းၼႄးပူၼ့်ပႅၼ်ၼႃႈလိၼ်၊ ၶႂၢၵ်ႈႁႅင်းသိုၵ်းပၵ်း တပ့်မႂ်ႇ   ၸိူဝ် ၼႆ့ ၽွင်းၼၼ့်သမ့်တူၵ်ႇၸိုဝ်ႈတွၵ်းသဵင် ၾၢင့်ထိုင် RCSS ဝႆ့လၢႆလၢႆၵမ်း။