ၵူၼ်းၵဵင်းတုင်ၵေႃႉၼိုင်ႈ ႁေႃႈၵႃးၽႃႇ တူၼ်ႈမႆႉတၢႆထင်တီႈ

ၽူႈၸၢႆး ဢႃယု 35 ပီ ႁေႃႈၵႃးၽႃႇသႂ်ႇတူၼ်ႈမႆႉၺွင်ႇ ဢၼ်မီးႁိမ်းၶၢင်ႈ တၢင်းၼိူဝ်သဵၼ်ႈတၢင်း ၵဵင်းတုင်- တူၼ်ႈတီး ၼႂ်းၸႄႈဝဵင်းၵဵင်းတုင် သေလူႉတၢႆထင်တီႈ ဝႃႈၼႆ။

ဝၼ်းတီႈ 30/11/2017 ယၢမ်းၵၢင်ၶမ်ႈ ၸၢႆးထုၼ်းၼေႇ(ႁွင်ႉ) ၸၢႆးၼၢႆႇ ဢႃယု 35 ပီ ႁေႃႈၵႃးဝႆးသေ ဢမ်ႇၵုမ်း လႆႈ ႁႅင်းလူတ်ႉ လေႃႈတမ်ၽႃႇသႂ်ႇ တူၼ်ႈမႆႉၺွင်ႇ ဢၼ်မီးႁိမ်းၶၢင်ႈတၢင်းႁိမ်းဝၢၼ်ႈၵဵင်းၽွင်း ဢိူင်ႇယၢင်းလေႃး ၸႄႈ ဝဵင်းၵဵင်းတုင် ၼိူဝ်သဵၼ်ႈတၢင်း ၵဵင်းတုင် – တူၼ်ႈတီး၊ ၵူၼ်းႁေႃႈၵႃး လူႉတၢႆထင်တီႈၵမ်းလဵဝ် ဝႃႈၼႆ။

ၸၢႆးသၢမ် ၵူၼ်းၼႂ်းပိုၼ်ႉတီႈၸႄႈဝဵင်းၵဵင်းတုင် လၢတ်ႈဝႃႈ “ တီႈၼၼ်ႈၼၼ်ႉ ၵႆႉပဵၼ်ၼႃႇ ၵမ်ႉလူတ်ႉၶိူင်ႈတမ်သႂ်ႇ၊ ၵမ်ႉၵႃးတမ်သႂ်ႇ မၼ်းပဵၼ်တၢင်းငွၵ်း/ၵူတ်ႉဝႆႉ။လႆႈႁူႉဝႃႈ ၵူၼ်းႁေႃႈၵႃးၼႆႉ ၵႂႃႇဢၢပ်ႇၼမ်ႉပုင်ႇသေပွၵ်ႈမႃး။ လႅပ်ႈ တေမဝ်းလဝ်ႈပႃး။ ယဝ်ႉၵေႃႈ သမ်ႉႁေႃႈဝႆးသေဢမ်ႇၵုမ်းလႆႈႁႅင်းလူတ်ႉၵေႃႈပိူင်ၼိုင်ႈသေ လေႃႈတမ်သႂ်ႇတူၼ်ႈမႆႉ ။ ၵူၼ်းႁေႃႈၵႃးတႄႉ လူႉတၢႆထင်တီႈၵမ်းလဵဝ်ၼၼ်ႉယဝ်ႉ။ ၼႂ်းလူတ်ႉၼၼ်ႉ မီးၵူၼ်းႁေႃႈၵႃးၵေႃႉလဵဝ်ၵူၺ်း” ဝႃႈၼႆ။

ၸၢႆးထုၼ်းၼေႇ(ႁွင်ႉ) ၸၢႆးၼၢႆႇၼႆႉ ပဵၼ်ၵူၼ်းဝၢၼ်ႈၵၢင်ၼႃးလူင် ၸႄႈဝဵင်းၵဵင်းတုင် ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၾၢႆႇပလိၵ်ႈလႄႈ ၸုမ်းၵူၼ်းၸွႆႈၽေးဢုပၢတ်ႈ(ၽေးၵိုင်ႉၵၢင်ႉ) ၸႄႈဝဵင်း ၵဵင်းတုင် လႆႈဢွၼ်ၵၼ်ၸွႆႈဢဝ်တူဝ်တၢႆဢွၵ်ႇၼႂ်းၵႃး။ ယဝ်ႉၵေႃႈ ယူႇတီႈပလိၵ်ႈၶဝ် လႆႈပိုတ်ႇလိူင်ႈ(ဢမူႉ)ၶၻီးဝႆႉ တီႈ ႁူင်းပလိၵ်ႈ ၸႄႈဝဵင်းၵဵင်းတုင် ၸွမ်းၼင်ႇမၢႆမီႈဝၢၼ်ႈမိူင်းမီး ဝႃႈၼႆ။