သိုၵ်းတဢၢင်း TNLA ငွႆးယိုဝ်းသၢႆသိုၵ်းလူင်ပွင်ၸိုင်ႈမၢၼ်ႈ ၼႂ်းမိူင်းငေႃႉ ၸႄႈဝဵင်းၵျွၵ်ႉမႄး ယိုဝ်းတိူဝ်ႉၺႃး ၵူၼ်းမိူင်း ပိုၼ်ႉတီႈ ၵေႃႉၼိုင်ႈ လႆႈမၢတ်ႇၸဵပ်းၸွမ်း။

ဝၼ်းတီႈ 9/3/2019 ယၢမ်းၵၢင်ၼႂ် 10 မူင်းပၢႆ တပ်ႉသိုၵ်းလူင်ပွင်ၸိုင်ႈမၢၼ်ႈ ဢၼ်ပၵ်းသဝ်းဝႆႉ တီႈလွႆၵုင်းၽြႃးယၢၼ်ႇ ၵိၼ်း ၾၢႆႇတူၵ်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ၵႂႃႇယူတ်းယႃပၼ် ၵူၼ်းပဵၼ်တီႈလုမ်းသၢင်ႇသီႈ ၼႂ်းဝဵင်းမိူင်းငေႃႉၼၼ်ႉ ၺႃးသိုၵ်းလွႆ TNLA ငွႆးယိုဝ်း။ ယူႇႁိုင်ထႅင်ႈ 10 မိၼိတ်ႉ ယိုဝ်းထႅင်ႈတိူဝ်ႉသႂ်ႇ ၼၢင်းၶမ်းလႃႉ ဢႃယု 50 ပီ ၽွင်းတိုၵ်ႉတေၵႂႃႇၸၢႆႇၵၢတ်ႇ ဝႃႈၼႆ။

ဢူးတိၼ်ႇမွင်ႇတဵင်း ၸုမ်းၸွႆႈထႅမ် ၸီႇဝိတ်ႉတ ဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၼၢင်းတိူဝ်ႉၺႃး မၢၵ်ႇၵွင်ႈတီႈပုမ်။ တေႃႈလဵဝ် လႆႈသူင်ႇယူတ်းယႃတူဝ်ဝႆႉတီႈႁူင်းယႃၵျွၵ်ႉမႄးဝႆႉ။ ဢမ်ႇပေႃးထိုင်တီႈလႆႈမႆႈၸႂ်ၶႃႈ။ ၵူၺ်းၵႃႈ ၶဝ်ႈမႃးယိုဝ်းၼႂ်းၵၢင်ဝဵင်းၸိူင်ႉၼႆ ႁဵတ်းႁႂ်ႈၵူၼ်းမိူင်း တိုၼ်ႇသၢၼ်ႈၵၼ်တင်းဝဵင်း” ဝႃႈၼႆ။

လိူဝ်ၼၼ်ႉ ၼႂ်းမိူင်းငေႃႉၼႆႉ ဢဵၼ်းဢၢၼ်းဝႆႉ တေၸတ်းႁဵတ်းပွႆးသၢင်ႇလွင်းၶိုၵ်ႉယႂ်ႇလူင်ဝႃႈၼႆသေ ပၼ်ႁႃ ၸုမ်းယိပ်း ၵွင်ႈၵၢင်ႇ ႁိမ်ၼႃႈလိၼ်ၵၼ် ပဵၼ်ပၢင်တိုၵ်းတင်းသိုၵ်းလူင်ပွင်ၸိုင်ႈမၢၼ်ႈ ၸိူဝ်းၼႆႉလႄႈ ဢမ်ႇမီးလွင်ႈႁူမ်ႇလူမ်ႈလႄႈ ပွႆးသၢင်ႇလွင်းလႆႈၸိူင်ႉၵၢတ်ႈၵႂႃႇယဝ်ႉလႄႈ ယူႇတီႈပေႃႈမႄႈ ၵူၼ်းမိူင်း တုၵ်းယွၼ်း ႁႂ်ႈၵိုတ်းပၢင်တိုၵ်းပၼ်ၽႂ်းၽႂ်းသေ ၵမ်း ဝႃႈၼႆ။

ၼႂ်းၵိင်ႇၸႄႈဝဵင်းမိူင်းငေႃႉၼႆႉ မီးသိုၵ်းလူင်ပွင်ၸိုင်ႈမၢၼ်ႈ၊ သိုၵ်းဢူၺ်းလီပွတ်းႁွင်ႇလႄႈ သိုၵ်း RCSS ၵႂႃႇမႃးတူင်ႉ ၼိုင် ဝႃႈၼႆ။