တႃႇႁႂ်ႈၵူၼ်းမိူင်းလႆႈလဵပ်ႈႁဵၼ်း ႁူႉလွင်ႈၵႂၢမ်းမၼ်ႈပၢင်လူင်၊ ၼမ်ႉၸႂ်ပၢင်လူင်ၼႆသေ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 4 ၸုမ်း ႁူမ်ႈၵၼ်ႁဵတ်းဢွၵ်ႇပပ်ႉၵႅမ်မိုဝ်းပၢင်လူင်။

ဝၼ်းတီႈ 06/03/2019 ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 4 ၸုမ်း ၸတ်းႁဵတ်းပၢင်ပိုတ်ႇတူဝ်ပပ်ႉၵႅမ်မိုဝ်းပၢင်လူင် တီႈႁူင်းႁႅမ်း Wintree ၵဵင်းမႆႇ ၸိုင်ႈထႆး မီးၸုမ်းယိပ်းၵွင်ႈၵၢင်ႇ 10 ၸုမ်းပၢႆလႄႈ သိုဝ်ႇၶၢဝ်ႇၶဝ်ႈႁူမ်ႈ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵွၼ်းလုမ်း PI လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ပေႃးႁဝ်းတေၶိုၼ်းမႄးၵေႃႇ  တင်ႈပူၵ်းပွင်မိူင်းႁူမ်ႈတုမ်ၼႆၸိုင် ႁဝ်းလူဝ်ႇတူၺ်းၶိုၼ်းဝႃႈ မိူင်းႁူမ်ႈတုမ်ႁဝ်းၼႆႉတႄႇ ပဵၼ်မႃးၸိူင်ႉႁိုဝ်ပေႃးတူၺ်းၶိုၼ်းၼႆ တေလႆႈႁၼ်ဝႃႈ မိူင်းႁူမ်ႈတုမ်ၼႆႉ ပဵၼ်မႃးယွၼ်ႉလိၵ်ႈႁူမ်ႈ မၢႆပၢင်လူင် ၊ ၵႂၢမ်းမၼ်ႈပၢင်လူင်၊ ၶေႃႈတူၵ်းလူင်းလႆႈၸႂ် ပၢင်လူင်ၸိူဝ်းၼႆႉ ပေႃးႁဝ်းၶၢမ်ႈပႅတ်ႈ လိၵ်ႈႁူမ်ႈမၢႆပၢင်လူင်၊ ၵႂၢမ်းမၼ်းပၢင်လူင်ၼႆမၼ်းဢမ်ႇပဵၼ်လႆႈ ၼင်ႇႁိုဝ်ၵူၼ်းမိူင်းတင်း ၼမ်တေလႆႈႁူႉ ၵႂၢမ်းမၼ်ႈပၢင်လူင် ၊ၶေႃႈတူၵ်းလူင်းပၢင်လူင်သေ ၸင်ႇႁဵတ်း ဢွၵ်ႇမႃးပပ်ႉဢၼ်ၼႆႉယဝ်ႉ” ဝႃႈၼႆ။

ၼႂ်းပပ်ႉၼႆႉ တႅမ်ႈဝႆႉလွင်ႈမိူင်းႁူမ်ႈတုမ်တႆး၊ မိူင်းယၢင်းလႅင်၊ သၼ်လွႆၶျၢင်း၊ သၼ်လွႆၶၢင်လႄႈ မိူင်းမၢၼ်ႈလႆႈၶတ်း ၸႂ်ၵေႃႇတင်ႈမႃးမိူင်းႁူမ်ႈတုမ်ၸိူင်ႉႁိုဝ်၊ တႃႇတေဢဝ်ၵွၼ်းၶေႃႁူမ်ႈၵၼ်ၼၼ်ႉ ၸွမ်ႁၢၼ်ဢွင်ႇသၢၼ်း ၶတ်းၸႂ် ႁူၺ်းၸၢဝ်းၶိူဝ်းၸိူင်ႉႁိုဝ်၊ ၵႂၢမ်းမၼ်ႈၵတိဢၼ်ၸွမ်ႁၢၼ်ဢွၼ်ႇသၢၼ်းပၼ်ဝႆႉ 3 ၶေႃႈ မိူၼ်ၼင်ႇ တေလႆႈမီးၽွင်းငမ်းတူဝ်ၵဝ်ႇတဵမ်ထူၼ်ႈ၊ တေလႆႈမီးသုၼ်ႇလႆႈၵူၼ်းလႄႈ တီႊမူဝ်ႊၶရေႊသီႊ တဵမ်ထူၼ်ႈ၊ ၵဵဝ်ႇၵပ်းလွင်ႈငိုၼ်းတွင်းတေလႆႈမီးသုၼ်ႇလႆႈၸတ်းၵၢၼ်ႁင်းၵူၺ်း။ သၢမ်ၶေႃႈၼႆႉ တေႃႇထိုင် မိူဝ်ႈလဵဝ်ဢမ်ႇပဵၼ်မႃးလႄႈ မိူင်းႁူမ်ႈ တုမ်လႆႈလူႉလႅဝ်။ တႃႇမိူင်းႁူမ်ႈတုမ်တေလီမႃးၶိုၼ်းၼႆႉ တေလႆႈၶုၵ်းၸႂ်လႆႈသၢမ်ၶေႃႈၼႆႉသေတေလႆႈႁဵတ်းပၼ်ႁႂ်ႈၽဵင်ႇပဵင်း ၸဵမ်ၸိူဝ်းၼႆႉ။

ပပ်ႉမိုဝ်းပၢင်လူင်ၼႆႉ တႅမ်ႈဝႆႉသွင်ၽႃႇသႃႇ ၽႃႇသႃႇဢင်းၵိတ်ႉလႄႈၽႃႇသႃႇမၢၼ်ႈ၊ ယင်းငိၼ်းဝႃႈတေၶပ်းၶိုင်ပိၼ်ႇဢွၵ်ႇ ၾၢႆႇၸၢဝ်းၶိူဝ်းလူးၵွၼ်ႇ။

တႃႇတေႁဵတ်းဢွၵ်ႇပပ်ႉၼႆႉ ယူႇတီႈ ႁူဝ်ပဝ်ႈ RCSS/SSA, ႁူဝ်ပဝ်ႈ SSPP/SSA, ႁူဝ်ပဝ်ႈၸုမ်းၶၢင်KIO ဢိၵ်ႇႁူဝ်ပဝ်ႈၸုမ်းၶျၢင်းCNF လႆႈႁူမ်ႈၵၼ်ၶတ်းၸႂ်ႁဵတ်းဢွၵ်ႇမႃး။ လႆႈဢဝ်ၶၢဝ်းယၢမ်း 2 ပီပၢႆ တင်ႈတႄႇ 2016 လိူၼ်ၾႅပ်ႇပိဝ်ႈရီႊ တေႃႇထိုင် 2018 လိူၼ်ဢွၵ်ႊထူဝ်ႊပိူဝ်ႊ။ လႆႈပိုတ်ႉပပ်ႉမိူဝ်ႈဝၼ်းတီႈ 6 လိူၼ်မၢတ်ႊၶျ် တီႈပၢင်ၵုမ်ၶိုၵ်ႉတွၼ်းၸုမ်းဢွၼ်ႁူဝ်ၶၵ်ႉၵၢၼ်လွင်ႈငမ်းယဵၼ် PPST တီႈၵဵင်းမႆႇ။