မိူင်းတႆးပွတ်းဢွၵ်ႇၶူင်း ၼႂ်းၸႄႈဝဵင်းၵဵင်းတုင်ၼၼ်ႉ ၾႆးၾႃႉသျွၵ်ႉမႆႈ ႁွင်ႈဝႆႉၶူဝ်းၶွင် (ၵူဝ်ႇတွင်ႇ) လင်ၼိုင်ႈ လူႉသုမ်း ငိုၼ်းၼပ်ႉႁူဝ်သႅၼ်၊ ပလိၵ်ႈမၢၼ်ႈၵၵ်းၶင်ၸဝ်ႈၶွင်ဝႆႉ။
ဝၼ်းတီႈ 05/03/2019 ယၢမ်းၵၢင်ၶမ်ႈ ၾႆးမႆႈႁွင်ႈၵဵပ်းၶွင် လုင်းၸၢႆးၼၢၼ်ပႅင်း ဢႃယု 65 ပီ ယူႇဝၢၼ်ႈသၢဝ်းပႅတ်ႇ ပွၵ်ႈ 2 ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။ ၾႆးၾႃႉသျွၵ်ႉ လုၵ်ႉႁုပ်ႇမႆႈ ႁွင်ႈၵဵပ်းၶွင် (ၵူဝ်ႇတွင်ႇ) မၼ်းၸၢႆးပႃးၵႂႃႇ ၸွမ်းၾႆးၼပ်ႉငိုၼ်းႁိမ်း 10 သႅၼ် ဝႃႈၼႆ။
ၵူၼ်းပိုၼ်ႉတီႈ ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၾႆးမႆႈ ပဵၼ်ႁွင်ႈၵဵပ်းၶွင်ၼႆဝႃႇ။ လႆႈငိၼ်းဝႃႈတႄႉ ပဵၼ်သၢႆၾႆးၾႃႉ မႆႈႁႅင်းသေ သျွၵ်ႉၼႆ။ ၵတ်ႉၵႃႈ ဢမ်ႇလၢမ်းမႆႈပႃးႁိူၼ်းၸွမ်းႁိမ်းၼၼ်ႉလႃႈ။ ဢၼ်မႆႈတႄႉ မႆႈတီႈ ႁွင်ႈၵဵပ်းၶွင်ဢၼ်လဵဝ်ၵူၺ်း” ဝႃႈၼႆ။
ၵဵဝ်ႇလူၺ်ႈလွင်ႈၾႆးမႆႈၼႆႉ ယူႇတီႈၵူၼ်းပိုၼ်ႉတီႈလႄႈ ၽူႈမီးပုၼ်ႈၽွၼ်း ၾၢႆႇၵႅတ်ႇၶႄၾႆး လႆႈႁူမ်ႈၵၼ်ၸွႆႈႁူတ်းၾႆး/ ၶႄၾႆးၵၼ်ၵႂႃႇ တေႃႇပေႃးမွတ်ႇ ဝႃႈၼႆ။
ၵူၼ်းဝၢၼ်ႈသၢဝ်းပႅတ်ႇ ၵေႃႉၼိုင်ႈလၢတ်ႈဝႃႈ “ လႆႈငိၼ်းဝႃႈ ၶူဝ်းၶွင်ဢၼ်မီးၼႂ်းႁွင်ႈၵဵပ်းၶွင်ၼၼ်ႉ ဢမ်ႇတၼ်းလႆႈသင် လူႉသုမ်းၵႂႃႇၸွမ်းၾႆးတင်းၼမ်ၼႆဝႃႇ။
ၵူၺ်းၵႃႈ ဢမ်ႇမီးလွင်ႈတုမ်ႉတိူဝ်ႉၵူၼ်းသင် လွင်ႈမၢတ်ႇၸဵပ်းလူႉတၢႆၵေႃႈ ဢမ်ႇမီး။ တေႃႈလဵဝ်ၼႆႉ မၼ်းၸမ်ၶဝ်ႈ ၶၢဝ်းမႆႈယဝ်ႉလႄႈ လွင်ႈတူမ်ႈႁုင် သႂ်ႇၽိုၼ်းသႂ်ႇၾႆး ၸိူဝ်းၼၼ်ႉလႄႈသင်၊ လွင်ႈၸႂ်ႉၾႆးၾႃႉၼၼ်ႉလႄႈသင် လူဝ်ႇလႆႈ ဝႆႉသတိၵၼ်ၶႃႈယဝ်ႉ ပေႃးပဵၼ်မႃးတႄႉၵမ်းၼိုင်ႈၵူၺ်း” ဝႃႈၼႆ။
ၵဵဝ်ႇၵပ်းလွင်ႈလူႉသုမ်းတီႈႁွင်ႈၵဵပ်းၶွင် လုင်းၸၢႆးၼၢၼ်ပႅင်းၼႆႉ ယူႇတီႈသိုဝ်ႇၶၢဝ်ႇ The Voice ဢွၵ်ႇဝႆႉဝႃႈ တင်း မူတ်းလူႉသုမ်းၶၼ်ငိုၼ်း 750,000 ပၢႆ။ ၵူၼ်းယူႇႁိမ်းၵိၼ်ၸမ်တႄႉလၢတ်ႈဝႃႈ သုမ်းၵႂႃႇၸွမ်းၾႆး ၶၼ်ငိုၼ်းဢမ်ႇယွမ်း 10 သႅၼ်ၵျၢပ်ႈ ဝႃႈၼႆ။