မိူဝ်ႈဝၼ်းတီႈ 1 လိူၼ်မၢတ်ႊၶျ်ၼႆႉ ၸုမ်းယိပ်းၵွင်ႈၵၢင်ႇၼင်ႇၵၼ် ပဵၼ်ပၢင်တိုၵ်းၵၼ် ႁိမ်းမၢၼ်ႈလီႈ ၼိူဝ်သဵၼ်ႈ တၢင်း ၼမ်ႉတူႈ – သီႇပေႃႉၼၼ်ႉ ၵူၼ်းဝၢၼ်ႈ 10 ၵေႃႉ ႁၢႆဝႆႉ တေႃႇထိုင်ယၢမ်းလဵဝ် ပႆႇႁၼ် ဝႃႈၼႆ။
ပဵၼ်ပၢင်တိုၵ်းၼႂ်းၵႄႈသိုၵ်းဢူၺ်းလီပွတ်းႁွင်ႇ SSPP ၊ TNLA တင်း RCSS၊ ပၢင်တိုၵ်းပဵၼ်ႁၢဝ်ႈႁႅင်းထိုင် တီႈမၢၵ်ႇၵွင်ႈ တူၵ်းၼႂ်းဝၢၼ်ႈလႄႈ ၵူၼ်းဝၢၼ်ႈ ဢွၼ်ၵၼ်ပၢႆႈၽေးသိုၵ်း၊ ၵူၼ်းဝၢၼ်ႈၽူႈၸၢႆး 10 ၵေႃႉႁၢႆ။
ၵူဝ်ႇတႃႇဢူး ၽူႈၵွၼ်းဢိူင်ႇမၢၼ်ႈလီႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 1 – 2 ၼၼ်ႉ ပဵၼ်ပၢင် တိုၵ်းၵၼ် ႁၢဝ်ႈႁႅင်း။ ၵူၼ်းဝၢၼ်ႈတႄႉ လႆႈၽူင်ႉပၢႆႈၵႂႃႇၵေႃႉႁူႉၵေႃႉတၢင်း၊ ထိုင်မႃး ဝၼ်းတီႈ 3 ၸင်ႇတေႁူႉဝႃႈ မီးၵူၼ်းႁၢႆ။ ၼႂ်း ၵူၼ်းႁၢႆၼၼ်ႉ ၵူဝ်ႇၸၢႆးငႄႇ ၵူၼ်းၸွႆႈထႅမ်ၼႂ်းၸုမ်း ပရႁိတၵေႃႈ ပႃးၵႂႃႇၵေႃႉၼိုင်ႈ” ဝႃႈၼႆ။
ၵူၼ်းဢၼ်ႁၢႆၵႂႃႇ 10 ၵေႃႉၼၼ် ပဵၼ်ၵူၼ်းပႂ်ႉႁိူၼ်းၵမ်ႈၽွင်ႈ၊ ပဵၼ်ၵူၼ်းၼုမ်ႇဢၼ်လုၵ်ႉတီႈပၢင်သဝ်းၵူၼ်းပၢႆႈၽေး သေ ပွၵ်ႈမိူဝ်းဝၢၼ်ႈ တႃႇမိူဝ်းတူၺ်းငဝ်းလၢႆးၼႂ်းဝၢၼ်ႈ မိူဝ်းၸႂ်းၵူၼ်းပႂ်ႉႁိူၼ်းၶိုၼ်း ၸဵမ်ၸိူဝ်းၼႆႉ။
ၵူဝ်ႇတႃႇဢူး သိုပ်ႇလၢတ်ႈဝႃႈ “ ၵူၼ်းဢၼ်ႁၢႆတူဝ်ၵႂႃႇၼၼ်ႉ ပဵၼ်ၸၢဝ်းထၼု၊ တႆးလႄႈ တဢၢင်း။ လိူဝ်ၼၼ်ႉ တီႈႁိမ်းမၢၼ်ႈလီႈ ၵေႃႈ လႆႈႁၼ်ၾႆးမႆႈၵႃးဝႆႉလမ်းၼိုင်ႈ။ ပဵၼ်ၵႃးၽႂ်၊ ၸုမ်းလႂ်၊ ၵေႃႉလႂ်ယိုဝ်း ဢၼ်ဝႃႈၼၼ်ႉ ႁဝ်းၶႃႈဢမ်ႇလႆႈႁူႉ” ဝႃႈၼႆ။
ၼွၵ်ႈလိူဝ်ၼၼ်ႉ ၼိူဝ်သဵၼ်ႈတၢင်း သီႇပေႃႉ – မၢၼ်ႈလီႈၵေႃႈ ယူႇတီႈၾၢႆႇတပ်ႉသိုၵ်းလူင်ပွင်ၸိုင်ႈ ဢဝ်ႁူမ်ႇလူမ်ႈ ၵဵပ်းၵႂၢတ်ႇၽဵဝ်ႈ မၢၵ်ႇမႅင်းလႄႈ မၢၵ်ႇၵွင်ႈၽၢင်း ဢၼ်တူၵ်းၶမ်ဝႆႉ ၸွမ်းသဵၼ်ႈတၢင်းၸိူဝ်းၼၼ်ႉယူႇ ၵူၼ်းမၢၼ်ႈ လီႈ လၢတ်ႈၼႄၼင်ႇၼႆ။
ၵူဝ်ႇတႃႇဢူး လၢတ်ႈဝႃႈ “ ၵူၼ်းဝၢၼ်ႈႁဝ်းၶႃႈၼၼ်ႉ ပဵၼ်ၸုမ်းလႂ် ႁွင်ႉၵႂႃႇၵေႃႈယဝ်ႉ ယူႇတီႈႁဝ်းၶႃႈ ၵူၼ်းဝၢၼ်ႈတႄႉ တုၵ်းယွၼ်းႁႂ်ႈပွႆႇ လွတ်ႈ ဢွၵ်ႇ မႃးပၼ်သေၵမ်း။ ၵူၼ်းဝၢၼ်ႈဢၼ်ႁၢႆၵႂႃႇၼၼ်ႉ ၶဝ်မီးလုၵ်ႈလၢင်း၊ ၼၢင်းမေးလႄႈ ၵူၼ်းထဝ်ႈ တီႈတင်းႁေႃ တင်း ႁိူၼ်းဝႆႉ။ လိူဝ်ၼၼ်ႉ ၵူၼ်းၸိူဝ်းႁၢႆၵႂႃႇၼၼ်ႉ ပဵၼ်ၵူၼ်းဝၢၼ်ႈၵူၺ်းၶႃႈ ဢမ်ႇၸႂ်ႈပဵၼ် ၵူၼ်းၸုမ်းလႂ်၊ မူႇလႂ်ၶႃႈ” ဝႃႈၼႆ။
ယွၼ်ႉသိုၵ်းၸၢဝ်းၶိူဝ်းၼင်ႇၵၼ် ပိုတ်းယိုဝ်းၵၼ်ႁၢဝ်ႈႁႅင်းသေ ၵူၼ်းမိူင်းၼႂ်းၸႄႈဝဵင်းသီႇပေႃႉ 2,400 ပၢႆ လႆႈဢွၼ် ၵၼ်ပၢႆႈယၢၼ်ႁိူၼ်းယေး ဝႃႈၼႆ။
