ၸုမ်းတူင်ႉၼိုင်တူင်ႇဝူင်းတႆး တူၼ်ႈတီး ယုၵ်ႉဢဝ် ၸဝ်ႈၶႂၢၼ်မိူင်း ၶိုၼ်ႈပဵၼ်ႁူဝ်ပဝ်ႈ ၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်း တႃႇၶၢဝ်းတၢင်း 2 ပီ ဝႃႈၼႆ။

ဝၼ်းတီႈ 03/03/2019 ယၢမ်းဝၢႆးဝၼ်း 1 မူင်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး ၸတ်းႁဵတ်း ပၢင်လိူၵ်ႈ တင်ႈ ႁူဝ်ပဝ်ႈလႄႈ ၽူႈၼမ်းၼႂ်းၵေႃ ၸႄႈဝဵင်း ၸွမ်းၼင်ႇ ပိူင်ၸုမ်းမီး 2 ပီ ၼိုင်ႈပွၵ်ႈ။ ပၢင်လိူၵ်ႈတင်ႈၼႆႉ ၸတ်းႁဵတ်း တီႈ ႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ၸိုင်ႈတႆးပွတ်းၸၢၼ်း တင်းမူတ်း မီးၽူႈ ၶဝ်ႈႁူမ်ႈ ပၼ် သဵင် ႁိမ်း 60 ၵေႃႉ ဝႃႈၼႆ။

ၼၢင်းၼူၼ်းမူဝ် ၽူႈပွင်ၵၢၼ် ၵေႃလိၵ်ႈလၢႆး ၸႄႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ဝၼ်းတီႈ 3 လိူၵ်ႈၸုမ်းပွင် ၵၢၼ်မႂ်ႇ၊ ဝၼ်းတီႈ 4 မွပ်ႈယိုၼ်ႈပၼ် ၼႃႈၵၢၼ်ၵၼ်” ဝႃႈၼႆ။

“ ၵၢၼ်ၸုမ်းဢၼ်ဝႃႈၼၼ်ႉ ပိူင်လူင်မၼ်း လူဝ်ႇဢဝ်ၼမ်ႉၸႂ်ပဵၼ်ယႂ်ႇသေႁဵတ်း မၼ်းလူဝ်ႇဝႆႉၵဝ်သေ မႃးႁူမ်ႈၵၼ် ႁဵတ်း၊ ပေႃးဢဝ်ၵဝ်သေမႃးႁဵတ်းတႄႉ မၼ်းဢမ်ႇပဵၼ်ၵၢၼ် ၼင်ႇႁိုဝ် တေဝႆႉပႅတ်ႈၵဝ်လႆႈၼၼ်ႉၵေႃႈ ႁဝ်း လူဝ်ႇဢွၼ် ၵၼ်မႃးႁဵတ်းၵၢၼ်။ လိူဝ်သေၼၼ်ႉၵေႃႈ ၽူႈဢွၼ်ႁူဝ်ပေႉ လွင်ႈၸတ်းၵၢၼ် လူဝ်ႇမီးၼမ်ႉၵတ်ႉ ထႅင်ႈလွင်ႈၼိုင်ႈ ၵေႃႈ ၵဵဝ်ႇလူၺ်ႈလွင်ႈငိုၼ်းတွင်းလူဝ်ႇလႆႈတႅတ်ႈၼႅတ်ႈ ၸဵမ်ၸိူဝ်းၼႆႉၶႃႈ” ဝႃႈၼႆ။

ယၢမ်းလဵဝ် ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ပဵၼ်ၸဝ်ႈၶႂၼ်မိူင်း၊ ၵႅမ်ႁူဝ်ပဝ်ႈ ၸၢႆး ဢွင်ႇတၢၼ်း၊ ၵႅမ်ႁူဝ်ပဝ်ႈ ၸၢႆးၺုၼ်ႉ၊ ၽူႈၼမ်းၼႂ်း ၸၢႆးၸေႃႇၸေႃႇ၊ ၵႅမ်ၽူႈၼမ်းၼႂ်း ၸၢႆးထုၼ်းၸိင်ႇ၊ ၵႅမ်ၽူႈၼမ်း ၼႂ်း ၸၢႆးမွင်ႇ ၸဵမ်ၸိူဝ်းၼႆႉ။

ႁူဝ်ပဝ်ႈၵေႃႉၵဝ်ႇ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ပဵၼ်လုင်းၸၢႆးတိၼ်ႇ၊ ၵႅမ်ႁူဝ်ပဝ်ႈသမ်ႉ လုင်းၸၢႆး ဢေး တင်း လုင်းၸၢႆးဢွင်ႇမိၼ်ႉ။ ၵေႃလိၵ်ႈလၢႆး ဝဵင်းတူၼ်ႈတီးၼႆႉ မီးပိူင်ဝႆႉ 2 ပီ ၼိုင်ႈပွၵ်ႈ ၸတ်း ႁဵတ်း ပၢင်လိူၵ်ႈ တင်ႈ ႁူဝ်ပဝ်ႈလႄႈ ၽူႈပွင်ၵၢၼ်မႂ်ႇ ဝႃႈၼႆ။