ၸၢႆးၸဵမ်း မိုဝ်းလိတ်ႉ ဝူင်းတွႆႇတိုင်ႈ ၸုမ်းၸိူင်းလႅဝ်း လူႉသဵင်ႈ

ၸၢႆးၵျေႃႇၸဵင်ႇ(ႁွင်ႉ) ၸၢႆးၸဵမ်း ၸဝ်ႈပၢႆးမွၼ်းတႆး မိုဝ်းလိတ်ႉ (ၵီႇတႃႇ) လုၵ်ႈၸုမ်း ဝူင်းတွႆႇတိုင်ႈ ၸိူင်းလႅဝ်း လူႉသဵင်ႈ ၵႂႃႇ ၽွင်းဢႃယု 63 ပီ ဝႃႈၼႆ။

မိူဝ်ႈၼႆႉ ဝၼ်းတီႈ 05/03/2019 ယၢမ်းၵၢင်ၼႂ်မွၵ်ႈ 10:30 မူင်း ၸၢႆးၵျေႃႇၸဵင်ႇ(ႁွင်ႉ) ၸၢႆးၸဵမ်း(James) လူႉသဵင်ႈၵႂႃႇ တီႈ ႁိူၼ်းၼွင်ႉယိင်း မၼ်းၸၢႆး ဢၼ်မီးတီႈပွၵ်ႉႁူဝ်ၵၢတ်ႇ ဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ဝႃႈၼႆ။

ၵူၼ်းၼုမ်ႇ ၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပီႈၸဵမ်းၼႆႉ ပဵၼ်တၢင်းပဵၼ်တၢႆၽၢၵ်ႇမႃး မီးၶၢဝ်းတၢင်း 3 ပီပၢႆယဝ်ႉၶႃႈ။ ဢၼ်ပဵၼ်လိူဝ်ႁႅင်း ႁၢႆႉၸႃႉမႃး ဢမ်ႇၸၢင်ႈလုၵ်ႉ ၸၢင်ႈၼွၼ်းၼၼ်ႉတႄႉ ပဵၼ်မိူဝ်ႈပီၵၢႆပူၼ်ႉမႃးၼၼ်ႉ ၵူၺ်း” ဝႃႈၼႆ။

မိူဝ်ႈၼႆႉ ယၢမ်းဝၢႆးဝၼ်း ယူႇတီႈပီႈၼွင်ႉၸိူဝ်ႉၶိူဝ်း မၼ်းၸၢႆးသေ ႁူမ်ႈၵၼ် ပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈၵႂႃႇ ဝႃႈၼႆ။

ၸၢႆးၵျေႃႇၸဵင်ႇ(ႁွင်ႉ) ၸၢႆးၸဵမ်းၼႆႉ ပဵၼ်လုၵ်ႈၸၢႆး လုင်းသိင်း ပႃႈမယဵၼ်ႇ ပဵၼ်ၵူၼ်းၸႃတိၼမ်ႉၶမ်း မီးပီႈၼွင်ႉႁူမ်ႈ တွင်ႉၵၼ် 8 ၵေႃႉ မၼ်းၸၢႆး ပဵၼ်ၵေႃႉယႂ်ႇသုတ်း ဝႃႈၼႆ။

ၸၢႆးၸဵမ်း(James) ၼႆႉ ပဵၼ်ၸဝ်ႈပၢႆးမွၼ်းတႆးၵေႃႉၼိုင်ႈသေဢမ်ႇၵႃး ပဵၼ်မိုဝ်းလိတ်ႉၵဝ်ႇ ၼႂ်းဝူင်းၸိူင်းလႅဝ်း။ လိူဝ်ၼၼ်ႉ ႁဵတ်းၽဵင်းၵႂၢမ်း (music) ပၼ်ၼႂ်းၸိူင်းလႅဝ်း မၢႆ 11 တႆးတိုၵ်ႉတွင်းယူႇ၊ ၸိူင်းလႅဝ်းမၢႆ 12 (1996) 96-97 ပီငရၢႆးလူင်၊ ၸိူင်းလႅဝ်းမၢႆ 13 A(1999) ဝၢၼ်ႈၵဝ်ႇလဝ်ႇႁၢမ်း/ႁိူၼ်းႁဝ်း၊ မၢႆ 13 B(1999) ႁိူဝ်းမႂ်ႇ၊ မၢႆ 14 (1999) ၵူၼ်းႁၢမ်း သုၼ်ႇလႆႈ၊ မၢႆ 15 (2001) ၶေႃႈထၢမ်ထိုင်ၼမ်ႉၶူင်း၊ မၢႆ 16(2002) ႁိူဝ်းမႂ်ႇ သၢမ်ၸဵင်ႇၶမ်း၊ မၢႆ 19 (2004) ၸၢႆးၵၢၼ်း ယွတ်ႈ 1963 ၸဵမ်ၸိူဝ်းၼႆႉ။ လိူဝ်ၼၼ်ႉ ပဵၼ်ၽူႈတႅင်ႇၽဵင်း/ ႁွင်ႉၽဵင်းမႃးၵေႃႈၸႂ်ႈ ဝႃႈၼႆ။