ၸုမ်းဢုပ်ႇဢူဝ်းၶၵ့်ၵၢၼ်ငမ်းယဵၼ် PPST ႁူပ့်ထူပ်းဢုပ်ႇဢူဝ်းၵၼ် တီႈၵဵင်းမႆႇ တႃႇထတ်းသၢင်ၶိုၼ်း ၼႃႈၵၢၼ် ဢၼ်ပူၼ့်မႃးလႄႈ တႃႇတႅပ်းတတ်းတမ်းဝၢင်းၽႅၼ်ၵၢၼ်မိူဝ်းၼႃႈ ။
ဝၼ်းတီႈ 5 – 6 /03/2019 ၸုမ်းဢုပ်ႇဢူဝ်းၶၵ့်ၵၢၼ်ငမ်းယဵၼ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း PPST ႁူပ့်ထူပ်း ဢုပ်ႇဢူဝ်းၵၼ် တႃႇထတ်းသၢင်ၼႃႈၵၢၼ်ဢၼ်ပူၼ့်မႃးတင်ႈတႄႇ လိူၼ်ဢွၵ်ႊထူဝ်ႊၿိူဝ်ႊပူၼ့်မႃးလႄႈ ဢုပ်ႇဢူဝ်းၵၼ်တႃႇၸၢင်ႈတႅပ်းတတ်း တမ်းဝၢင်းၽႅၼ်ၵၢၼ်မိူဝ်းၼႃႈၸိူဝ်းၼႆ့ ၸတ်းႁဵတ်းတီႈ ႁူင်းႁႅမ်း Wintree ၵဵင်းမႆႇ ၸိုင်ႈထႆး ။
ၸဝ်ႈၶိုၼ်းသႂ် ၸႂ်ယဵၼ် တီႈၵိူဝ်းၵုမ် RCSS လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၸုမ်းဢုပ်ႇဢူဝ်းၵၢၼ်မိူင်း PPST ၼႆ့ တင်ႈတႄႇႁူပ့်ထူပ်းတင်း တီႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသုၵျီႇလႄႈ ၾၢႆႇသိုၵ်း လူင်ပွင်ၸိုင်ႈ မိူဝ်ႈလိူၼ်ဢွၵ်ႊထူဝ်ႊၿိူဝ်ႊ 2018 ပူၼ့်မႃးၼၼ့် ဢမ်ႇလႆႈႁူပ့်ဢုပ်ႇၵၼ်။ ၵွပ်ႈၼၼ်လႄႈ ၸင်ႇမႃးႁူပ့်ထူပ်းဢုပ်ႇ ဢူဝ်းၵၼ်သေ ထတ်းသၢင်တူၺ်းၶိုၼ်းၼႃႈၵၢၼ်ဢၼ်ပူၼ့်မႃးလႄႈ တွၼ်ႈတႃႇ မိူဝ်းၼႃႈၼႆ့တေသိုပ်ႇႁဵတ်းသၢင်ႈ ၼႃႈၵၢၼ်ၵႂႃႇၸိူင့်ႁိုဝ်ၸိူဝ်းၼႆ့ တေမႃးဢုပ်ႇၵၼ်တႅပ်းတတ်းဝၢင်းၽႅၼ်ၵႂႃႇ ” ဝႃႈၼႆ။
တီႈပၢင်ၵုမ်ၼၼ်ႉ ၽူႈၼမ်းၸုမ်း PPST ၸွမ်သိုၵ်းလူင် မူႇတူးသေးၽူဝ်း လၢတ်ႈၶေႃႈၵႂၢမ်းပိုတ်ႇပၢင်ဝႃႈ ဢိင်ၼိူဝ်ငဝ်းလၢႆးယၢမ်း လဵဝ်သေ သဵၼ်ႈတၢင်း NCA ၼႆႉ ပိူင်ႈႁွႆးတင်းသဵၼ်ႈတၢင်း ဢၼ်တေၽေႃႇၼမ်ႉၽေႃႇတူဝ်မိူင်းႁူမ်ႈတုမ် ဢၼ်မီးသုၼ်ႇလႆႈၽဵင်ႇပဵင်း၊ သုၼ်ႇလႆႈတႅပ်းတတ်းႁင်းၶေႃ ဢၼ်ဢိင်ၼိူဝ် ပိုၼ်ႉထၢၼ် တီႇမူဝ်ႇၶရေႊသီႊလႄႈၾႅတ်ႊၻရႄႊ ဝႆႉၼၼ်ႉ။ လွင်ႈၼႆႉ ႁဝ်းၶႃႈထုၵ်ႇလႆႈထတ်းသၢင် ၶိုၼ်းလီလီသေ တေလႆႈႁဵတ်းႁႂ်ႈႁွတ်ႈ ၼိူဝ်သဵၼ်ႈတၢင်းၶိုၼ်း။ ပေႃးတေလႅၵ်ႈ လၢႆႈသဵၼ်ႈတၢင်း ၼႆၵေႃႈ ဢမ်ႇထုၵ်ႇလီႁႂ်ႈမၼ်းပိူင်ႈႁွႆႈၵၼ်တင်း ၶေႃႈဢၼ်ပႃးၼႂ်း NCA ၼၼ်ႉ တေလႆႈဢုပ်ႇဢူဝ်းၵႂႃႇ။
ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA (PPST) ၼႆႉပဵၼ် ၶွင်ႇ သီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး (RCSS/SSA) ၊ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်း ႁူမ်ႈၸိူဝ်ႉၸၢတ်ႈၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈတုမ် ၸိူဝ်ႉၸၢတ်ႈယၢင်းၽိူၵ်ႇ (KNU)၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA)၊ တပ်ႉသိုၵ်းပူတ်း ပွႆႇၸိူဝ်ႉ ၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ(ALP)။ လိူဝ်ၼၼ်ႉ ပႃးဝႆႉထႅင်ႈ ၸုမ်းလႃးႁူႇတီႇမူဝ်ႊ ၶရႅတ်ႉတိၵ်ႉ LDU လႄႈ ၸုမ်းပႃႇတီႇမိူင်းမွၼ်းမႂ်ႇ NMSP ၸိူဝ်းၼႆႉ။
