ၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃးၸွမ်းႁိမ်းဝၢၼ်ႈပိုတ်းယိုဝ်းၵၼ်ႁၢဝ်ႈႁႅင်း မၢင်တီႈၶဝ်ႈယိုဝ်းၵၼ်ၼႂ်းဝၢၼ်ႈလႄႈ ၵူၼ်းပၢႆႈၽေးသိုၵ်း ၼႂ်းၸႄႈဝဵင်းသီႇပေႃႉ ယၢမ်းလဵဝ်မီး 2,000 ပၢႆ။
ဝၼ်းတီႈ 04/03/2019 ယၢမ်းၵၢင်ၼႂ် 10:30 မူင်း ၵူၼ်းဝၢၼ်ႈလွႆငိုၼ်း ႁူဝ်ၵူၼ်း 619 လႆႈဢွၼ်ၵၼ်ပၢႆႈမႃးသွၼ်ႈဝႆႉတီႈ ဝတ်ႉဝိႁၢရ်မၢၼ်ႈလီႈ ဢိူင်ႇမၢၼ်ႈလီႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေးသိုၵ်း ၼမ်မႃးယူႇ ၵူႈမိုဝ်ႉၵူႈဝၼ်း ယဝ်ႉၶႃႈ။ သိုၵ်းတူင်ႉၼိုင်ၵႂႃႇမႃးႁိမ်းဝၢၼ်ႈႁၢဝ်ႈႁႅင်း။ မၢင်တီႈၵေႃႈထိုင်တီႈပိုတ်းယိုဝ်းၵၼ် ႁိမ်းဝၢၼ်ႈ၊ မၢၵ်ႇတူၵ်းသႂ်ႇ ၼႂ်းဝၢၼ်ႈၸိူဝ်းၼႆႉ” ဝႃႈၼႆ။
ဝၼ်းတီႈ 01/03/2019 ၼၼ်ႉ ပၢင်တိုၵ်းပဵၼ်ၼႂ်းမၢၼ်ႈလီႈလႄႈ ၵူၼ်းဝၢၼ်ႈ 1000 ပၢႆ လႆႈပၢႆႈယၢၼ်ႁိူၼ်းယေး မႃးသွၼ်ႈယူႇၸွမ်းဝတ်ႉမၢၼ်ႈလီႈ၊ ဝတ်ႉၵျွင်းတူင်ႈၸၢင်ႉ ၸိူဝ်းၼႆႉ။
သိုပ်ႇလၢတ်ႈဝႃႈ “ ယွၼ်ႉၵူၼ်းပၢႆႈၽေးသိုၵ်းၵေႃႈ တိူဝ်းၼမ်မႃးၵူႈဝၼ်းလႄႈ ယၢပ်ႇၽိုတ်ႇလွင်ႈၵိၼ်ယႅမ်ႉၵၼ်ၶႃႈ။ တေႃႈလဵဝ်ၼႆႉ ၶဝ်ႈၼမ်ႉတၢင်းၵိၼ် တႃႇၵမ်ႉထႅမ်ၵူၼ်းပၢႆႈၽေးတႄႉ လႅပ်ႈတေဢမ်ႇပေႃးၵုမ်ႇယဝ်ႉၶႃႈ ဢိင်ၼိူဝ် ၵူၼ်း ဝၢၼ်ႈ ၵူၼ်းမိူင်းမႃးၵမ်ႉထႅမ်ၵေႃႈ မီးဢေႇၶႃႈ။ ယွၼ်ႉၼၼ် ယွၼ်းလူႇၶၢမ်ႇထိုင် တီႈၽူႈမီးၼမ်ႉၸႂ်ၸေႇတၼႃႇ ႁဝ်း တီႈၸမ်ၵႆယူႇၶႃႈ” ဝႃႈၼႆ။
ၵူၼ်းပၢႆႈၽေးသိုၵ်း ၵေႃႉၼိုင်ႈ လၢတ်ႈဝႃႈ “ လွင်ႈၼုင်ႈဝႆတႄႉ ႁဝ်းၵုမ်ႇထူၼ်ႈၵၼ်ယူႇၶႃႈ။ သင်ပဵၼ်လႆႈ လွင်ႈၵိၼ် ယႅမ်ႉၶႃႈဢေႃႈ မိူၼ်ၼင်ႇ ၶဝ်ႈသၢၼ်၊ ၼမ်ႉမၼ်း၊ ၽၵ်းယိူဝ်ႈၼၢင်းၶဵဝ် ၶွင်ၵိၼ်ႁႅင်ႈ ၸိူဝ်းၼႆႉၶႃႈ။ ယွၼ်ႉႁဝ်းၶႃႈၵေႃႈ ၵုမ်ႇလႆႈဢွၼ်ၵၼ်ပၢႆႈၵူၺ်းလႄႈ ဢမ်ႇလႆႈႁဵတ်းၵၢၼ်ငၢၼ်းသင်လီလီၶႃႈ” ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်းဢၼ်မီးဝႆႉတီႈ သီႇပေႃႉ မိူၼ်ၼင်ႇ တီႈဝတ်ႉၼမ်ႉသိမ်ႇ 52 ၵေႃႉ၊ ဝတ်ႉမၢၼ်ႈလီႈ 1399 ၵေႃႉ၊ ဝတ်ႉ 2500 (တောင်မြို့ရပ်ကွက် ၂၅၀၀ ဘုန်းကြီးကျောင်းတိုက်) 192 ၵေႃႉ၊ ဝတ်ႉၽူဝ်းတေႃႇ ပွၵ်ႉၸၢင်ႈၶမ်း ၸၢၼ်း 348 ၵေႃႉ၊ ႁူင်းႁဵၼ်းၸၼ်ႉဢွၼ် တူင်ႈၸၢင်ႉ 234 ၵေႃႉ၊ ဝတ်ႉၼႃးမၢၵ်ႇၶေႃ 123 ၵေႃႉလႄႈ ဝတ်ႉၵုင်းၸၢင်ႈ လဵၵ်း 60 ၵေႃႉ တင်းမူတ်း ႁူမ်ႈၵၼ် 2,408 ၵေႃႉ ဝႃႈၼႆ။
သင်ပီႈၼွင်ႉ တီႈၸမ်ၵႆ ၶႂ်ႈၸွႆႈထႅမ် ၵူၼ်းပၢႆႈၽေးၼႆၸိုင် ၵပ်းသိုပ်ႇလႆႈတီႈမၢႆၾူၼ်း 094-03764777, 099-56882654, 097-87979140 ၸိူဝ်းၼႆႉ။
ယွၼ်ႉပဵၼ်ပၢင်တိုၵ်း ၸုမ်းယိပ်းၵွင်ႈၵၢင်ႇ ၼင်ႇၵၼ် ပိုတ်းယိုဝ်းၵၼ် ၸဵမ်မိူဝ်ႈႁူဝ်ပီ 2019 ၼႆႉမႃးသေ ၵူၼ်း ဝၢၼ်ႈ ၵူၼ်းမိူင်း လႆႈဢွၼ်ၵၼ်ပၢႆႈယၢၼ်ႁိူၼ်းယေး တီႈယူႇတၼ်းသဝ်း ဝႃႈၼႆ။
