လုၵ်ႈႁဵၼ်း လႄႈ ၶူးသွၼ် ႁူမ်ႈၵၼ် ယိပ်းပၢႆႉၼႄၵၢင်ၸႂ် တုၵ်းယွၼ်း ႁႂ်ႈၵိုတ်းပၢင်တိုၵ်းဝႆးဝႆး တႃႇႁႂ်ႈလုၵ်ႈဢွၼ်ႇလႆႈ ႁဵၼ်းလိၵ်ႈလီလီ ဝႃႈၼႆ။

ဝၼ်းတီႈ 02/03/2019 ယၢမ်းၵၢင်ၼႂ် 9 :15 မူင်းၼၼ်ႉ လုၵ်ႈႁဵၼ်းလႄႈ ၶူးသွၼ် တီႈႁူင်းႁဵၼ်း ၾၢႆႇပူၵ်းပွင်ၵူၼ်းၼုမ်ႇ T.K.O တီႈဝတ်ႉၸေႇယသုၶ ဝၢၼ်ႈၼွင်ပိင်ဢွၼ်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁူမ်ႈၵၼ် ယိပ်းပၢႆႉ ၼႄၵၢင် ၸႂ် သၢၼ်ၶတ်း ပၢင်တိုၵ်းသေဢမ်ႇၵႃး၊ တုၵ်းယွၼ်း ႁႂ်ႈၵိုတ်းတိုၵ်းပၼ်ဝႆးဝႆး။

ၸုမ်းမေႃသွၼ် လုၵ်ႈႁဵၼ်း ၶဝ်လၢတ်ႈတီႈၽူႈတွႆႇႁွၵ်ႈဝႃႈ “ ဢိင်ဢဝ်လွင်ႈပၢင်တိုၵ်းၵၼ်ပဵၼ်တႄႉယူႇၼၼ်ႉသေ ႁဝ်းၶႃႈ ၶႂ်ႈႁႂ်ႈ ၶဝ်ၵိုတ်းပၢင်တိုၵ်းၵၼ်ဝႆးဝႆး ၸွမ်းၼင်ႇတႅမ်ႈမၢႆတီႈပၢႆႉ ဢၼ်လုၵ်ႈႁဵၼ်းႁဝ်း ယိပ်းၼႄၼၼ်ႉ” ဝႃႈၼႆ။

မိူဝ်ႈဝၼ်းတီႈ 1 ၼၼ်ႉ မၢၵ်ႇၵွင်ႈတူၵ်းသႂ်ႇၼႂ်းႁူင်းႁဵၼ်း 3-4 လုၵ်ႈ ၽွင်းလုၵ်ႈႁဵၼ်း တိုၵ်ႉႁဵၼ်းလိၵ်ႈတႆး တီႈဝတ်ႉ ၸေႇယသုၶ ဝၢၼ်ႈၼွင်ပိင်ဢွၼ်ႇ မၢၵ်ႇၵွင်ႈဢမ်ႇတၼ်းတိူဝ်ႉၺႃးလုၵ်ႈႁဵၼ်း လႄႈ ဢမ်ႇမီးလွင်ႈမၢတ်ႇၸဵပ်း။ ၵူၺ်းၵႃႈ လုၵ်ႈႁဵၼ်း၊ ၶူးသွၼ်တူၵ်းၸႂ်ၵူဝ်ႁႄ၊ ပၢင်သွၼ်လႆႈၸိူင်ႉၵၢတ်ႈ၊ ၵိုတ်းလိုဝ်ႈပႅတ်ႈ။

ၸုမ်းမေႃသွၼ် လၢတ်ႈဝႃႈ“ၵတ်ႉၵႃႈလႃႈ မိူဝ်ႈဝၼ်းၼၼ်ႉ ဢမ်ႇတိူဝ်ႉၺႃးလုၵ်ႈဢွၼ်ႇႁဵၼ်းသေၵေႃႉ ပေႃးတိူဝ်ႉၺႃးၼႆ တေႁဵတ်းႁိုဝ်ၶႃႈၼၼ်ႉ မၢၵ်ႇၼၼ်ႉ ပဵၼ်ၸုမ်းလႂ် မူႇလႂ် ယိုဝ်းမႃး ဢၼ်ဝႃႈၼၼ်ႉ တေႃႇထိုင်ယၢမ်းလဵဝ် ဢမ်ႇလႆႈႁူႉ” ဝႃႈၼႆ။

လုၵ်ႈႁဵၼ်းတင်း ၶူးသွၼ် ႁူမ်ႈၵၼ် ယိပ်းပၢႆႉၼႄၵၢင်ၸႂ် လႄႈ တုၵ်းယွၼ်းၼၼ်ႉ တီႈပၢႆႉၼၼ်ႉ တႅမ်ႈဝႆႉဝႃႈ “မၢၵ်ႇၵွင်ႈ ဢၼ်ယိုဝ်းလၼ်ၶဝ်ႈမႃးၼႂ်းႁူင်းႁဵၼ်းၼႆႉ ႁဝ်းၶႃႈ တိုၼ်းဢမ်ႇၵျိူၵ်ႈ ၶႅၼ်းတေႃႈ ၵိုတ်းယိုဝ်းၵၼ်သေ ပၼ်ပေႃႈမႄႈ ၵူၼ်းမိူင်းလႆႈၵတ်းယဵၼ်သေၵမ်း”၊“ယႃႇႁဵတ်းႁၢႆႉပေႃႈမႄႈၵူၼ်းမိူင်း”၊“ ႁႂ်ႈႁဝ်းၶႃႈ လႆႈသွၼ်ႁဵၼ်းလိၵ်ႈပၺ်ၺႃ လီသေ ၵမ်း”၊ “ႁႂ်ႈၵိုတ်းယိုဝ်းၵၼ်ဝႆးဝႆး” ၸဵမ်ၸိူဝ်းၼႆႉ။ လိူဝ်ၼၼ်ႉ “ပၢႆႉဢၼ်တႅမ်ႈဝႆႉဝႃႈ သၢၼ်ၶတ်းပႃးထႅင်ႈ တႆးတေႃႇတႆး ယိုဝ်းၵၼ်” ၼႆၵေႃႈမီး။

ပၢင်တိုၵ်းၼႂ်းၵႄႈသိုၵ်း RCSS လႄႈ SSPP တိုၵ်ႉပဵၼ်ယူႇပႆႇၵိုတ်း မိူၼ်ၼင်ႇ ၼႂ်းၸႄႈဝဵင်းသီႇပေႃႉ၊ ၵျွၵ်ႉမႄး၊ ၼမ်ႉ တူႈ ၸိူဝ်းၼႆႉ။ ၵူၼ်းမိူင်းဢၼ်ၺႃးတီႉၺွပ်းပေႃႉထုပ်ႉၵေႃႈမီး။ ဢၼ်မၢတ်ႇၸဵပ်းလူႉ တၢႆယွၼ်ႉပၢင်တိုၵ်းသိုၵ်းသိူဝ် ၵေႃႈမီး။ ဢမ်ႇၸၢင်ႈႁဵတ်းလွင်ႈလူႇလွင်ႈတၢၼ်း၊ ၵၢၼ်ႁႃၵိၼ်လဵင်ႉတွင်ႉသေ ဢၼ်လႆႈပၢႆႈၽေးသိုၵ်းဝႆႉ ဝၼ်းမိူဝ်ႈၼႆႉ မီးႁဵင်ပၢႆ။