လၢႆႁွင်ႈၵၢၼ်တူၵ်းလူင်းလႆႈၸႂ်ၵၼ် တႃႇႁူမ်ႈၵၼ်ၵႄႈလိတ်ႈပၼ်ႁႃယႃႈမဝ်းၵမ် ၼႂ်းႁႅင်းၵၢၼ်ယၢၼ်မိူင်း

ႁွင်ႈၵၢၼ်ၾၢႆႇႁႅင်းၵၢၼ်လႄႈ လၢႆႁွင်ႈၵၢၼ်ဢၼ်ၵဵဝ်ႇၶွင်ႈ ၸတ်းႁဵတ်းပၢင်ႁူပ့်ထူပ်း တႃႇႁူမ်ႈမိုဝ်းၵၼ်ၵႄႈလိတ်ႈပၼ်ႁႃယႃႈမဝ်းၵမ် ႁႂ်ႈႁႅင်းၵၢၼ်ၵႆယၢၼ်ယႃႈမဝ်းၵမ်ၼႆယဝ့်။

ဝၼ်းတီႈ 27/02/2019 ႁွင်ႈၵၢၼ်ၾၢႆႇၸတ်းႁႃၵၢၼ် လူင်ပွင်ၸိုင်ႈမိူင်းထႆး၊ ႁွင်ႈၵၢၼ်ၾၢႆႇတူၺ်းလွမ်ႁႅင်းၵၢၼ်၊  ႁွင်ႈၵၢၼ်ၾၢႆႇၽဵဝ်ႈမူၺ့်ယႃႈမဝ်းၵမ်လႄႈ ထႅင်ႈလၢႆႁွင်ႈၵၢၼ်ဢၼ်ၵဵဝ်ႇၶွင်ႈ 15 ႁွင်ႈၵၢၼ် ၸတ်းႁဵတ်းပၢင်ဢုပ်ႇၵုမ် ၵၼ်တီႈမိူင်းၵွၵ်ႇ ၸိုင်ႈထႆးသေ လႆႈလူင်းလၢႆးမိုဝ်းတူၵ်းလူင်းလႆႈၸႂ်ၵၼ် တႃႇတေႁူမ်ႈၵၼ်ၵႄႈလိတ်ႈပၼ်ႁႃယႃႈ  မဝ်းၵမ်ၼႂ်းတူင်ႇဝူင်းႁႅင်းၵၢၼ်ယၢၼ်မိူင်း ၸတ်းႁဵတ်းတီႈ မိူင်းၵွၵ်ႇၸိုင်ႈထႆး။

ၾၢႆႇႁႅင်းၵၢၼ်ပိုၼ်ၽၢဝ်ႇဝႃႈ “ ဢၼ်တူၵ်းလူင်းလႆႈၸႂ်ၵၼ်ပွၵ်ႈၵမ်းၼႆ့ ပိူင်လူင်မၼ်းတႄ့ တေၵူတ်ႇထတ်းတီႈႁႅင်း ၵၢၼ်ယၢၼ်မိူင်းၶႃႈဢေႃႈ ပိူဝ်ႈႁႂ်ႈႁႅင်းၵၢၼ်ယၢၼ်မိူင်းၵႆယၢၼ်ယႃႈမဝ်းၵမ် ၊ ႁႂ်ႈႁႅင်းၵၢၼ်မီးပၢႆးတူဝ်ပၢႆးၸႂ်ဢၼ်လီ  ၶိူင်ႇၶႅမ့်၊ တႃႇႁႂ်ႈလူတ်းယွမ်းယႃႈမဝ်းၵမ် ဢမ်ႇႁႂ်ႈၽႄႈၼႂ်းတူင်ႇဝူင်းႁႅင်းၵၢၼ်ၸိူဝ်းၼႆ့။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ – “ ဢၼ်လူင်ပွင်ၸိုင်ႈ ပိုၼ်ၽၢဝ်ႇ    ၸိူင့်ၼႆၼႆ့ မၼ်းမီးတင်းၽွၼ်းလီလႄႈ ၽွၼ်းႁၢႆ့ၶႃႈဢေႃႈ ၽွၼ်းလီၵေႃႈႁဵတ်းႁႂ်ႈႁႅင်းၵၢၼ်ဢမ်ႇၵဵဝ်ႇၶွင်ႈယႃႈမဝ်း ၵမ်၊ ၽွၼ်းႁၢႆ့သမ့် ပေႃးဝႃႈၸဝ်ႈၼႃႈတီႈၶဝ်လူင်းၵူတ်ႇထတ်းၼႆ ၵူၼ်းၸိူဝ်းမီးဝတ်းဝႂ်ဢမ်ႇတဵမ်ထူၼ်ႈ ၊ ၵူၼ်းၸိူဝ်း ႁဵတ်းၵၢၼ်ဢမ်ႇမႅၼ်ႈတီႈ မႅၼ်ႈတၢင်းၸိူဝ်းၼၼ့် တေၸၢင်ႈၺႃးၵူတ်ႇထတ်းတီ့ၺွပ်းၶႃႈဢေႃႈ” ဝႃႈၼႆ။

တီႈၼႂ်းမိူင်းၸိုင်ႈထႆးၼႆႉ မီးၵူၼ်းၼွၵ်ႈမိူင်းဢွၼ်ၵၼ်မႃးဢႅဝ်ႇယဵမ်ႈတင်းၼမ်တင်းလၢႆလႄႈ မီးႁႅင်းၵၢၼ်ယၢၼ်   မိူင်းဢၼ်လုၵ်ႉမႃးတၢင်းမိူင်းလၢဝ်း၊ ၵမ်ႊပူႊၶျႃႊလႄႈ မိူင်းႁူမ်ႈတုမ်မၢၼ်ႈ မႃးႁဵတ်းၵၢၼ်ၼပ်ႉဢၢၼ်ႇ ႁူဝ်လၢၼ့် ၊ လူင်ပွင်ၸိုင်ႈ ထႆးၶတ်းၸႂ်ႁႃလၢႆးတၢင်းၵႄႈလိတ်ႈပၼ်ႁႃ ၵၢၼ်ၶၢတ်ႇၵူၼ်းႁဵတ်းၵၢၼ်လႄႈ ႁႂ်ႈႁႅင်းၵၢၼ်ထုၵ်ႇမႅၼ်ႈ ၸွမ်းၼင်ႇပၵ်းပိူင်မၢႆမီႈ ႁူမ်ႈပႃးထိုင်ႁႂ်ႈႁႅင်းၵၢၼ်ယၢၼ်မိူင်းၵႆယၢၼ်ယႃႈမဝ်းၵမ်ၼႆယဝ့်။