ၵူၼ်းသိုၵ်းမၢၼ်ႈ (ၵဝ်ႇ) ၵေႃႉၼိုင်ႈ ၺႃးယိုဝ်းတၢႆ ၼႂ်းၵၢင်ဝဵင်းၵျွၵ်ႉမႄး၊ ပဵၼ်ၼမ်ႉမိုဝ်းၽႂ် ၸုမ်းလႂ် ယိုဝ်းဢၼ် ဝႃႈၼၼ်ႉ ပႆႇႁူႉ။
ဝၼ်းတီႈ 27/02/2019 ယၢမ်းၵၢင်ၶမ်ႈမွၵ်ႈ 7 မူင်းပၢႆၼၼ်ႉ ဢူးယႄးလိၼ်းဢွင်ႇ ၸၼ်ႉၶုၼ်သိုၵ်းလူင် (ၵူၼ်းသိုၵ်း ၵဝ်ႇ) ၺႃးၵူၼ်းဢမ်ႇႁူႉၾၢႆႇ ယိုဝ်းတၢႆ ႁိမ်းၵျွင်းပလီႇ ၵၢင်ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။
ဢူးတိၼ်ႇမွင်ႇတဵင်း ၸုမ်းၸွႆႈထႅမ်ၸီဝိတ်ႉတ ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ႁိမ်းၵျွင်းပလီႇ ၵၢင်ဝဵင်းၵျွၵ်ႉမႄး ယၢမ်းၵၢင်ၶမ်ႈ 7:20 မူင်းၼၼ်ႉ ဢူးယႄးလိၼ်းဢွင်ႇ တင်းလုၵ်ႈၼွင်ႉမၼ်းၵေႃႉၼိုင်ႈ ၶီႇရူတ်ႉၶိူင်ႈမႃးၸွမ်းၵၼ်သေ ၺႃးယိုဝ်းတၢႆ။ တိူဝ်ႉၺႃးတီႈဢူၵ်းလႄႈ ဢူးယႄးလိၼ်းဢွင်ႇတၢႆထင်တီႈ” ဝႃႈၼႆ။
ဢူးယႄးလိၼ်းဢွင်ႇၼႆႉ ပဵၼ်သိုၵ်းမၢၼ်ႈၵဝ်ႇ ၸၼ်ႉၶုၼ်သိုၵ်းလူင်၊ ပဵၼ်လုၵ်ႈၶူၺ် သထေးလူင်၊ ၼၢႆးၼႃႈ(ပွႆးၸႃး) ဢူးတိတ်ႉလုၼ်ႇ ၵျွၵ်ႉမႄး ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၵျွၵ်ႉမႄးတႄႉ လၢတ်ႈဝႃႈ “ပႆႇၸၢင်ႈတွပ်ႇလၢတ်ႈသင်ပဵၼ်တၢင်းၵၢၼ်” ဝႃႈၼႆ။
ၵူၼ်းဢၼ်မႃးယိုဝ်းသႂ်ႇ ဢူးယႄးလိၼ်းဢွင်ႇၼႆႉ ၶီႇရူတ်ႉၶိူင်ႈမႃးၸွမ်းၵၼ်သွင်ၵေႃႉ။ ဝၢႆးလင်ယိုဝ်းယဝ်ႉ ၼႅတ်ႈၶီႇ ရူတ်ႉၶိူင်ႈပၢႆႈၵႂႃႇၶိုၼ်းလႄႈ ပဵၼ်ၽႂ် ၸုမ်းလႂ် ယင်းဢမ်ႇလႆႈႁူႉ ၵူၼ်းၵျွၵ်ႉမႄးၵေႃႉၼိုင်ႈလၢတ်ႈ။
ၼႂ်းၸႄႈဝဵင်းၵျွၵ်ႉမႄးၼႆႉ ၵႆႉမီးလွင်ႈၵၢၼ်ပိုတ်းယိုဝ်းၵၼ် ၸဵမ်ၵူၼ်းႁေႃႈၵႃးတၢင်ႇဝူဝ်း၊ ၵူၼ်းလႄႈ သင်ၶၸဝ်ႈ ၸဵမ်ၸိူဝ်းၼႆႉ ၺႃးယိုဝ်းၵေႃႈမီး။
