ၸၢႆးၸၢႆးၶမ်းလႅင် မေႃၵႂၢမ်းလႄႈ ၸၢႆးၸိူင်း ၸိုဝ်ႈသဵင်ယႂ်ႇ ၸၢဝ်းတႆး ၸတ်းပၢင်ပိုတ်ႇတီႈလဵၼ်ႈပၼ်လုၵ်ႈဢွၼ်ႇလႄႈ လူႇ ငိုၼ်းၸွႆႈထႅမ် တီႈႁူင်းႁဵၼ်းၸၼ်ႉသုင် မၢႆ 1 ၸႄႈဝဵင်းတူၼ်ႈတီး ဝႃႈၼႆ။
ဝၼ်းတီႈ 18/02/2019 ယၢမ်းၵၢင်ဝၼ်း 12:30 မူင်း ၽူႈႁွင်ႉၵႂၢမ်း ၸၢႆးၸၢႆးၶမ်းလႅင် မႃးပိုတ်ႇပၼ် တီႈလဵၼ်ႈလုၵ်ႈဢွၼ်ႇ ႁူင်းႁဵၼ်းလႄႈ လူႇငိုၼ်းၸွႆႈထႅမ် ႁူင်းႁဵၼ်းမၢႆၼိုင်ႈ ၸႄႈဝဵင်းတူၼ်ႈတီး။ မီးလုၵ်ႈ ႁဵၼ်းၸၼ်ႉငဝ်ႈလႄႈ ၸၼ်ႉၼိုင်ႈ၊ ပေႃႈ မႄႈလုၵ်ႈႁဵၼ်း ဢိၵ်ႇတင်း ၶူးသွၼ် မႃးၶဝ်ႈႁူမ်ႈၸမ်သွင်ပၢၵ်ႇ ဝႃႈၼႆ။
ၽူႈႁွင်ႉၵႂၢမ်း ၸၢႆးၸၢႆးၶမ်းလႅင် လၢတ်ႈတီႈၽူႈတွႆႇႁွၵ်ႈဝႃႈ “ ၶႃႈၵေႃႈ ယၢမ်းပဵၼ်လုၵ်ႈႁဵၼ်း တီႈၼႆႈမႃးၵေႃႉၼိုင်ႈၶႃႈ။ ႁဵၼ်း တီႈၼႆႈတင်ႈတႄႇ ၸၼ်ႉငဝ်ႈတေႃႇထိုင်ၸၼ်ႉသိပ်းၶႃႈဢေႃႈ။ ၶႃႈႁၼ်ၼႂ်း Facebook ဝႃႈတေႁဵတ်း ဝၢင်း တၢင်းလဵၼ်ႈ တႃႇလုၵ်ႈဢွၼ်ႇၼႆလႄႈ ၶႃႈထၢမ်မႃးတီႈၶူးဝႃႈၶႃႈၶႂ်ႈလူႇ။ ယူႇတီႈၶူးၶဝ်ၵေႃႈ ဝႃႈ လူဝ်ႇၸဝ်ႈတႃႇၼၼႆလႄႈၶႃႈၵေႃႈလႆႈ လူႇၶႃႈ။ မိူဝ်ႈၶႃႈႁဵၼ်းၼၼ်ႉ ၶူးသွၼ်ၶဝ် တႄႇၸၼ်ႉငဝ်ႈ တေႃႇထိုင်ၸၼ်ႉ သိပ်းတီႈႁူင်းႁဵၼ်းၼႆႉ သွၼ်ပၼ်ၶႃႈႁႂ်ႈပႆ တၢင်းထုၵ်ႇမႅၼ်ႈ ယွၼ်ႉၼၼ် ႁူင်းႁဵၼ်းၼႆႉ မီးၵုင်ႇမုၼ်တႃႇၶႃႈတင်းၼမ်ၶႃႈ။ တွၼ်ႈတႃႇၶႃႈ လႆႈလူႇၼႆႉၵေႃႈ မီးတၢင်း ၸူမ်းသိူဝ်းၼႃႇယဝ်ႉၶႃႈ” ဝႃႈၼႆ။
တႃႇလုၵ်ႈႁဵၼ်းၶဝ် တေမီးၸႂ်ၶႂ်ႈမႃးႁူင်းႁဵၼ်းၼၼ်ႉ ၸႂ်ႉၵၢၼ်သွၼ်ပၼ်လိၵ်ႈၵူၺ်းဢမ်ႇလႆႈလႄႈ တႃႇတူဝ်ၶိင်းတေ ၵႅၼ်ႇ ၶႅင် မီးတၢင်းသိူဝ်းၸႂ်ၼၼ်ႉၼႆသေ ၶူးသွၼ်ၶဝ် ၸင်ႇလႆႈဝၢင်းၽႅၼ်ႁဵတ်းသၢင်ႈ တီႈလဵၼ်ႈၼႆႉမႃး ဝႃႈၼႆ။
ၶူးသွၼ်တေႃႇၼေႃႇမေႇမဵဝ်းဢူး ၽူႈၵွၼ်းႁူင်းႁဵၼ်းၸၼ်ႉသုင်မၢႆၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ“ ပီတေမႃးၼႆႉ ယိူင်း ဢၢၼ်းၶႂ်ႈႁႂ်ႈလုၵ်ႈဢွၼ်ႇၶဝ် မီးၶၢဝ်းယၢမ်းသွၼ်လိၵ်ႈ၊ ၶၢဝ်းယၢမ်းလဵၼ်ႈၵေႃႈႁႂ်ႈလႆႈလဵၼ်ႈ။ မိူဝ်ႈလဵၼ်ႈၼၼ်ႉၵေႃႈၶႂ်ႈႁႂ်ႈ လွတ်ႈၽေး။ ၶၢဝ်းလႂ်ၵေႃႈႁႂ်ႈလဵၼ်ႈလႆႈ ပေႃးလႆႈလဵၼ်ႈမီးတၢင်း သိူဝ်းၸႂ်ၵေႃႈ တေႁဵၼ်းလိၵ်ႈလႆႈလီ” ဝႃႈၼႆ။
ၶူးသွၼ်တေႃႇၸုၸုတွင်း ႁူင်းႁဵၼ်းၸၼ်ႉသုင် မၢႆၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လုၵ်ႈဢွၼ်ႇၶဝ်ၼႆႉၵုမ်ႇ လႆႈႁဵၼ်း လိၵ်ႈၵူၺ်းၼႆလႄႈ ၼႂ်းၸၢတ်ႈပၢၼ်ၶဝ်ၵေႃႈၶႂ်ႈႁႂ်ႈမီးတၢင်းမူၼ်ႈသိူဝ်း။ ယိူင်းဢၢၼ်း ၶႂ်ႈႁဵတ်းမႃး ႁိုင်ယဝ်ႉသေတႃႉ တိုၵ်ႉ လႆႈႁဵတ်းပီၼႆႉၵူၺ်းၶႃႈ” ဝႃႈၼႆ။
တႃႇၶိူင်ပွင်ပဵၼ်မႃး တီႈလဵၼ်ႈလုၵ်ႈႁဵၼ်းၼႆႉ ၸၢႆးၸၢႆးၶမ်းလႅင် လႄႈပေႃႈမႄႈလုၵ်ႈႁဵၼ်းၶဝ် ႁူမ်ႈၵၼ်ပဵၼ်ၸဝ်ႈတႃႇၼ ၵဵပ်းႁွမ်တွမ်ငိုၼ်းၵၼ်သေ လႆႈၸႂ်ႉငိုၼ်းၵႂႃႇၵဝ်ႈသိပ်းသႅၼ်ပၢႆ။ ၵူၺ်းၵႃႈပႆႇယဝ်ႉတူဝ်ႈလီငၢမ်း ယင်းလူဝ်ႇသိုပ်ႇပူၵ်း ပွင်ၵႂႃႇ ယူႇထႅင်ႈတင်းၼမ် ဝႃႈၼႆ။
ၸၢႆးၸၢႆးၶမ်းလႅင်ၼႆႉ ပဵၼ်ၽူႈႁွင်ႉၽဵင်းၵႂၢမ်းလႄႈ ၸၢႆးၸိူင်း ၸိုဝ်ႈသဵင်လိုဝ်းလင် ဢၼ်ၵူၼ်းတင်းမိူင်းမၢၼ်ႈပတ်းပိုၼ်ႉ ယွမ်းႁပ်ႉ မၼ်းၸၢႆး ၵိူတ်ႇမိူဝ်ႈ ဝၼ်းတီႈ 10 လိူၼ်ဢေႊပရိူဝ်ႊ 1979 ပဵၼ်လုၵ်ႈၸၢႆး ၸၢႆးၶမ်းလႅင်လႄႈ ၼၢင်းၶဵဝ်ႇၶဵဝ်ႇ သၢၼ်ႇထုၼ်း မီးပီႈၼွင်ႉႁူမ်ႈတွင်ႉၵၼ် 3 ၵေႃႉ။ မၼ်းၸၢႆးပဵၼ်ၵေႃႉယႂ်ႇသုတ်း ပဵၼ်လၢၼ်ၸဝ်ႈၾႃႉမိူင်းပွၼ် ၸဝ်ႈၸၢမ်ႇ ထုၼ်း ၵေႃႉဢၼ်လူင်းလၢႆးမိုဝ်းလိၵ်ႈႁူမ်ႈမၢႆပၢင်လူင် မိူဝ်ႈပီ 1947 ဝႃႈၼႆ။