ၵူၼ်းဝၢၼ်ႈၼမ်ႉမင်း ၸႄႈဝဵင်းၵျွၵ်ႉမႄး ၺႃးၸၢၵ်ႇမၢၵ်ႇ ၸုမ်းယိပ်းၵွင်ႈၵၢင်ႇ ယိုဝ်းၵၼ် ပွႆႇမၢၵ်ႇလူင်သႂ်ႇၼႂ်းဝၢၼ်ႈ ယၢမ်းလဵဝ် ၵူၼ်းဝၢၼ်ႈ 3 ၵေႃႉၼႆႉ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃယဝ်ႉ။

ဝၼ်းတီႈ 21/02/2019 ယၢမ်းၵၢင်ၼႂ် မၢၵ်ႇလူင်တူၵ်းသႂ်ႇၼႂ်းဝၢၼ်ႈၼမ်ႉမင်း ၸႄႈဝဵင်းၵျွၵ်ႉမႄး တိူဝ်ႉၺႃးၵူၼ်းဝၢၼ်ႈ မတၢၼ်းဢေး ဢႃ ယု 46 ပီ၊ လုင်းၸၢႆး ဢႃယု 50 ပီလႄႈ ဢွၼ်ႇယိင်းသႅင်လိုၼ်း ဢႃယု 8 ၶူပ်ႇ။ ထိုင်ယၢမ်းၵၢင် ဝၼ်း ယူႇတီႈၸုမ်းၸွႆႈထႅမ်တူင်ႇဝူင်းၵူၼ်း (ဇီဝိတ) ၵျွၵ်ႉမႄး လႆႈၸွႆႈဢဝ်မႃးသူင်ႇႁူင်းယႃ တီႈၵျွၵ်ႉမႄး ဝႃႈၼႆ။

ဢူးတိၼ်ႇမွင်ႇတဵင်း ၸုမ်းၸွႆႈထႅမ်တူင်ႇဝူင်းၵူၼ်း (ဇီဝိတ) ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ မတၢၼ်းဢေးတႄႉ တိူဝ်ႉၺႃးတီႈပုမ်၊ ဢွၼ်ႇယိင်း သႅင်လိုၼ်းသမ်ႉ တိူဝ်ႉၺႃးတီႈမိုဝ်း၊ လုင်းၸၢႆးသမ်ႉ တိူဝ်ႉၺႃးတီႈပုမ်ၾၢႆႇၶႂႃ၊ ႁူဝ်ၶဝ်ႇ၊ မိုဝ်းၾၢႆႇ ၶႂႃ။ တွၼ်ႈတႃႇမတၢၼ်းဢေးတႄႉ လႆႈမၢတ်ႇၸဵပ်းႁၢဝ်ႈႁႅင်းသေ လႆႈၶဝ်ႈၽႃႇတတ်းၼႂ်းဝၼ်းၼၼ်ႉၵမ်းလဵဝ်။ ဝၢႆးၽႃႇတတ်းယဝ်ႉ တေလႆႈဝႃႈ လီၶိုၼ်ႈမႃးတင်းၼမ် ဢမ်ႇထိုင်တီႈလႆႈမႆႈၸႂ်ႁႅင်း” ဝႃႈၼႆ။

ထုင်ႉၼမ်ႉမင်းၼႆႉ သိုၵ်း RCSS ၵႂႃႇမႃးတူင်ႉၼိုင်ႁိမ်းဝၢၼ်ႈ၊ သိုၵ်းဢူၺ်းလီပွတ်းႁွင်ႇသမ်ႉ တူင်ႉၼိုင်ထိုင်ပွတ်းထိူၼ်ႇ ဝႃႈၼႆ။

ၵူၼ်းဝၢၼ်ႈလၢတ်ႈဝႃႈ “ မၢၵ်ႇလူင်ဢၼ်ယိုဝ်းၶဝ်ႈ ၼႂ်းဝၢၼ်ႈၼၼ်ႉ ပဵၼ်ၸုမ်းလႂ်ယိုဝ်းတႄႉ ဢမ်ႇလႆႈႁူႉ။ ယူဝ်သိုၵ်း တပ်ႉပွင်းၸူႉ ၶဝ်ထၢင်ႇဝႃႈ မီးသိုၵ်းတႆးၼႂ်းဝၢၼ်ႈၼႆသေ ယိုဝ်းၵွင်ႈလူင်ၶဝ်ႈမႃးၵေႃႈပဵၼ်လႆႈ” ဝႃႈၼႆ။

သိုၵ်းဢၼ်တူင်ႉၼိုင်တၢင်းပွတ်းတွၼ်ႈၼၼ်ႉမီး သိုၵ်းလူင်ပွင်ၸိုင်ႈမၢၼ်ႈ၊ RCSS လႄႈ TNLA ၸိူဝ်း ၼႆႉ။

လိူဝ်ၼၼ်ႉ တၢင်းပွတ်းဝၢၼ်ႈလွႆငိုၼ်း ဝဵင်းၼမ်ႉလၼ်ႈၵေႃႈ ယွၼ်ႉသိုၵ်း RCSS တင်း SSPP ပဵၼ်ပၢင်တိုၵ်းၵၼ်သေ ၵူၼ်းဝၢၼ်ႈ 2 ၵေႃႉတိူဝ်ႉၺႃးမၢၵ်ႇ ပႆႇၸၢင်ႈၸွႆႈဢဝ်ဢွၵ်ႇမႃး တိုၵ်ႉၶမ်ဝႆႉယူႇၼႂ်းဝၢၼ်ႈ ၵူၺ်းၵႃႈ ၼႂ်းဝၢၼ်ႈမီးမေႃယႃ ယူႇလႄႈ ဢမ်ႇထိုင်တီႈမႆႈၸႂ် ဝႃႈၼႆ။

ယွၼ်ႉသိုၵ်း RCSS တင်း SSPP ပဵၼ်ပၢင်တိုၵ်းၵၼ် ၼႂ်းၸႄႈဝဵင်းသီႇပေႃႉသေ ၵူၼ်းမိူင်း 1,000 ပၢႆ လႆႈဢွၼ်ပၢႆႈ ယၢၼ်ႁိူၼ်းယေး တေႃႈလဵဝ် ၵူၼ်းမိူင်းႁူပ်ႉလွင်ႈယၢပ်ႇၽိုတ်ႇ မိူၼ်ၼင်ႇ လွင်ႈၶဝ်ႈၼမ်ႉတၢင်းၵိၼ် ၸဵမ်ၸိူဝ်းၼႆႉ။