ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး ပိုတ်ႇႁႂ်ႈႁႅင်းၵၢၼ် ပွၵ်ႈႁိူၼ်းၽွင်းၶၢဝ်းသွၼ်းၼမ်ႉသၢင်းၵျၢၼ်ႇ လူၺ်ႈဢမ်ႇလူဝ်ႇသဵင်ႈငိုၼ်း ယွၼ်းဝႂ်ဢွၵ်ႇတၢင်း ၊ ဝႂ်ဢွၵ်ႇမိူင်း ။

တႄႇဝၼ်းတီႈ 05 – 30/04/2019 ၶၢဝ်းတၢင်း 25 ဝၼ်းၼႆႉ ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈ မိူင်းထႆး ပၼ်ၶႂၢင်ႉႁႂ်ႈႁႅင်းၵၢၼ် လၢဝ်း၊ ၵမ်ႊပူႊၶျႃႊ၊ မၢၼ်ႈ ပွၵ်ႈမိူဝ်းၸႂ်းႁိူၼ်း ၽွင်းၶၢဝ်းသွၼ်းၼမ်ႉလိူၼ်ႁႃႈ လူၺ်ႈဢမ်ႇလူဝ်ႇသဵင်ႈငိုၼ်း ၵႃႈယွၼ်းဝႂ်ဢွၵ်ႇတၢင်းလႄႈ ဝႂ်ဢွၵ်ႇမိူင်း RE-ENTRY PERMIT ။

ၸွမ်သိုၵ်းလူင်ၾၢႆႇပလိၵ်ႈ ဢၻုၼ်ႊ သႅင်သိင်ၵႅဝ်ႊ ၽွင်းလူင်ၾၢႆႇႁႅင်းၵၢၼ် လၢတ်ႈဝႃႈ – “ တီႈၼႂ်း ပၢင်ဢုပ်ႇၵုမ်တႃႇၵႄႈလိတ်ႈပၼ်ႁႃႁႅင်းၵၢၼ်ယၢၼ်မိူင်းလႄႈ ၵၢၼ်ၵႃ့ၶၢႆၵူၼ်းၼၼ့်လႆႈၸႂ်ၵၼ်ဝႃႈ ၽွင်းၶၢဝ်းသွၼ်းၼမ့်လိူၼ်ႁႃႈၼႆ့ တေပၼ်ၶႂၢင့်ႁႂ်ႈႁႅင်းၵၢၼ်ယၢၼ်မိူင်း ပွၵ်ႈဢႅဝ်ႇမိူင်းၽႂ်မၼ်း တႃႇၶၢဝ်းတၢင်း 25 ဝၼ်း ဢမ်ႇလူဝ်ႇသဵင်ႈငိုၼ်းယွၼ်းဝႂ်ၶဝ်ႈဢွၵ်ႇမိူင်း ” ဝႃႈၼႆ။

ၸၢႆးၸၢႆး ၽူႈၸွႆႈထႅမ်ၾၢႆႇႁဵတ်းဝတ်းဝႂ်ႁႅင်းၵၢၼ်ယၢၼ်မိူင်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်လူင်ပွင် ၸိုင်ႈ ပၼ်ၶႂၢင့်ၼႆ့ ပဵၼ်တွၼ်ႈတႃႇႁႅင်းၵၢၼ်ၸိူဝ်းယိပ်း Passport ၼၼ့်ၵူၺ်း ၊ တွၼ်ႈတႃႇပီႈၼွင့်ၸိူဝ်းယိပ်းဝႂ် 10 ပီ ႁိုဝ် ဝႂ်ပိုၼ့်တီႈသုင်ၸိူဝ်းၼၼ့်တႄ့ ႁႂ်ႈဢွၼ်ၵၼ်ၾၢင့်သတိၽွင်းဢွၵ်ႇတႃႈဢွၵ်ႇတၢင်း ယွၼ့်လူင်ပွင်ၸိုင်ႈထႆးမၢႆဝႃႈ ပဵၼ်ၵူၼ်းဢမ်ႇမီးႁိူၼ်းယေးတၢင်းမိူင်းတႆးယဝ့်၊ ပေႃးၶဝ်ၵူတ်ႇထတ်း ၺႃးဝႂ်10ပီလႄႈဝႂ်မၢႆၾၢင်မိူင်းႁူမ်တုမ်မၢၼ်ႈၵိုၵ်းၵၼ်ၼႆ ၸၢင်ႈၺႃးတူတ်ႈတၢမ်ႇၼၵ်း ” ဝႃႈၼႆ။

ႁႅင်းၵၢၼ်ယၢၼ်မိူင်း ၸိူဝ်းဢၼ်ပွၵ်ႈမိူဝ်းၸႂ်းႁိူၼ်းယေး ၽႂ်မၼ်းၼၼ့်တေလႆႈပွၵ်ႈၶိုၼ်းမိူင်းထႆး ၵွၼ်ႇဝၼ်းတီႈ 30/04/2019 သင်ဝႃႈပူၼ့်ၶၢဝ်းယၢမ်းၼႆၸိုင် တေလႆႈၵႂႃႇတွၵ်ႇၸုမ်ႈ တီႈလုမ်းၾၢႆႇ ၵူတ်ႇထတ်းၵူၼ်းၶဝ်ႈမိူင်းသေ တေလႆႈသဵင်ႈငိုၼ်း 2,000 ဝၢတ်ႇၼႆယဝ့်။

ႁႅင်းၵၢၼ်တႆး ဢၼ်မႃးမီးၼႂ်းမိူင်းထႆး မီးၼပ့်ႁူဝ်သႅၼ်။ ၵမ်ႈၼမ်ယူႇသဝ်းႁဵတ်းၵၢၼ်တီႈၵဵင်းမႆႇ၊ လမ်းပုၼ်း မိူင်းထႆးတွၼ်ႈၼိူဝ်ၸိူဝ်းၼႆ့ ။

ၸိုင်ႈမိူင်းၼႂ်းလုမ်ႈၾႃႉ ဢၼ်ၸတ်းႁဵတ်းၾိင်ႈပွႆးသွၼ်းၼမ်ႉသၢင်းၵျၢၼ်ႇၼႆႉ မီးမိူၼ်ၼင်ႇ မိူင်းထႆး၊ မိူင်းလၢဝ်း၊ မိူင်းမၢၼ်ႈ ၊ မိူင်းၵမ်ႊပူႊၶျႃႊ ၊ သိပ်းသွင်ပၼ်းၼႃး ၼႂ်းမိူင်းၶႄႇလႄႈ မိူင်းဢိၼ်ႊၻီႊ ယိူဝ်ႊ ၸိူဝ်းၼႆႉ။