ဢိင်ၼိူဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ပဵၼ်ပၢင်တိုၵ်းၵၼ် တီႈလႅၼ်ၶၼ်ႈ ၸိုင်ႈတႆး ပွတ်းၸၢၼ်းလႄႈ ပွတ်းႁွင်ႇ ၼႂ်းဝူင်ႈၼႆႉ ၵူၺ်း ၵူၼ်းဝၢၼ်ႈ 2 ၵေႃႉ ၺႃးၸၢၵ်ႇမၢၵ်ႇၸွမ်းသေ တေႃႇထိုင်ယၢမ်းလဵဝ် ပႆႇၸၢင်ႈၸွႆႈဢဝ်တူဝ်ဢွၵ်ႇ မႃးလႆႈ ဝႃႈၼႆ။
ပၢင်တိုၵ်း SSPP တင်း RCSS ပဵၼ်ၼႂ်းၵႄႈဝၢၼ်ႈလွႆငိုၼ်း တင်း ဝၢၼ်ႈပႃႇၵၢင်း ဢိူင်ႇမၢၼ်ႈလီႈ ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ၵူဝ်ႇၸေႃႇၺီႇၺီႇ ၸုမ်းၸွႆႈထႅမ် တူင်ႇဝူင်း ၵူၼ်း( Dear Ranger) ဝဵင်းၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်း ဝၢၼ်ႈ ၽူႈၸၢႆးသွင်ၵေႃႉ တိူဝ်ႉၺႃးၸၢၵ်ႇမၢၵ်ႇ တေႃႇထိုင်ယၢမ်းလဵဝ် ႁဝ်းၶႃႈ ဢမ်ႇၸၢင်ႈၶဝ်ႈၵႂႃႇ ၸွႆႈဢဝ်ဢွၵ်ႇမႃးၶႃႈ။ တွၼ်ႈတႃႇတေၸွႆႈဢဝ်ဢွၵ်ႇမႃးၼၼ်ႉၵေႃႈ ငူပ်ႉငီႉၵၼ်တင်း ၸုမ်းယိပ်းၵွင်ႈၵၢင်ႇယူႇ၊ ၵူၺ်းၵႃႈ ဢမ်ႇလႆႈ၊ ၵူၼ်းမိူင်း ဢၼ်တိူဝ်ႉၺႃးမၢၵ်ႇ 2 ၵေႃႉၼၼ်ႉ တေႃႈလဵဝ် ယူႇဝႆႉတီႈဝတ်ႉလွႆငိုၼ်း၊ ၶဝ်ဢမ်ႇပၼ်ႁဝ်းၶႃႈ ၶိုၼ်ႈၵႂႃႇဢဝ်။ ၵူဝ်ယဵပ်ႇ ၺႃးမၢၵ်ႇၼႆဝႃႇ။ ၵူၺ်းၵႃႈ ၵူၼ်းဝၢၼ်ႈ ဢၼ်တိူဝ်ႉၺႃးမၢၵ်ႇ 2 ၵေႃႉၼၼ်ႉတႄႉ ဢမ်ႇပေႃးလႆႈ မႆႈၸႂ်”ဝႃႈၼႆ။
တီႈၵူၼ်းမၢတ်ႇၸဵပ်း 2 ၵေႃႉၼၼ်ႉၵေႃႈ မီးမေႃယႃ ဢၼ် တူၵ်းပုၼ်ႈၽွၼ်းၸွမ်းဝၢၼ်ႈဝႆႉယူႇ ဝႃႈၼႆ။
သိုၵ်း SSPP တင်း RCSS ၼႆႉ ပဵၼ်ပၢင်တိုၵ်းၵၼ်မႃး တႄႇမိူဝ်ႈဝၼ်းတီႈ 20/02/2019 တီႈႁိမ်းဝၢၼ်ႈပႃႇၵၢင်းလႄႈ ဝၢၼ်ႈလွႆငိုၼ်း ဢိူင်ႇမၢၼ်ႈလီႈ ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉ တီႈဝတ်ႉဝိႁၢရ်မၢၼ်ႈလီႈသမ်ႉ တင်းမူတ်း မီးႁူဝ်ၵူၼ်း 587 ၵေႃႉ ယဝ်ႉ တွၼ်ႈတႃႇ လွင်ႈၵိၼ်လွင်ႈယႅမ်ႉတႄႉ ၵုမ်ႇထူၼ်ႈယူႇသေတႃႉ တွၼ်ႈတႃႇ ၽႃႈႁူမ်ႇၶူဝ်းၼွၼ်းတႄႉ တိုၵ်ႉလူဝ်ႇ တၢင်းၸွႆႈထႅမ်ယူႇ ဝႃႈၼႆ။
ယွၼ်ႉသိုၵ်း SSPP တင်း RCSS ပဵၼ်ပၢင်တိုၵ်းၵၼ် ၼႂ်းၸႄႈဝဵင်းသီႇပေႃႉသေ ၵူၼ်းမိူင်းလႆႈဢွၼ်ၵၼ်ပၢႆႈယၢၼ် ႁိူၼ်းယေးဢွၵ်ႇမႃး တေႃႈလဵဝ် မီးၵႂႃႇယဝ်ႉ ႁူဝ်ၵူၼ်း 1,200 ပၢႆ။ ယူႇသဝ်းဝႆႉတီႈဝတ်ႉၼႃးမၢၵ်ႇၶေႃ၊ ၵျွင်းၶရိတ်ႉယၼ်ႇ လီႇသူး၊ ဝတ်ႉၼမ်ႉမေႃႇသူမ်ႈ၊ ဝၢၼ်ႈသူၼ်ဢွႆႈ၊ ဝတ်ႉၽူဝ်းတေႃႇ၊ ဝတ်ႉၼမ်ႉ သိမ်ႇ ၸိူဝ်းၼႆႉ။
သိုၵ်း SSPP တင်း RCSS ၼႆႉ တႄႇပဵၼ်ပၢင်တိုၵ်းၵၼ်မႃး ႁၢင်လိူၼ်ၼူဝ်ႊဝႅမ်ႊၿိူဝ်ႊ 2018 ၼၼ်ႉသေ တေႃႇထိုင် ယၢမ်းလဵဝ် သွင်ၾၢႆႇတိုၵ်ႉၶဵင်ႈၶႅင်ၵၢၼ်သိုၵ်းၵၼ်ယူႇ ဝႃႈၼႆ။