ပၢင်တိုၵ်းပဵၼ်ၼႂ်းၸႄႈဝဵင်းၵျွၵ်ႉမႄး ဝူင်ႈပူၼ်ႉမႃးၼႆႉ မၢၵ်ႇလူင်လုၵ်ႈၼိုင်ႈ တူၵ်းပၵ်းၶမ်ဝႆႉတီႈႁိမ်းထၢတ်ႈ/ ၵွင်းမူး ဝၢၼ်ႈၼမ်ႉပႅၼ်ႈ ႁိုင်ႁိမ်းၸမ်ဝူင်ႈ တိုၵ်ႉလႆႈထွၼ်ဢွၵ်ႇပႅတ်ႈၵူၺ်း ဝႃႈၼႆ။

ဝၼ်းတီႈ 19/02/2019 ယၢမ်းၵၢင်ဝၼ်း 10 မူင်းပၢႆၼၼ်ႉ ၵူၼ်းဝၢၼ်ႈၼမ်ႉပႅၼ်ႈ တင်း သိုၵ်းမၢၼ်ႈ ဢဵၼ်ႁႅင်း 30 ပၢႆ ဢွၼ်ၵၼ် ၵႂႃႇထွၼ်ဢဝ်မၢၵ်ႇလူင် ဢၼ်တူၵ်းပၵ်းၶမ်ဝႆႉတီႈႁိမ်းထၢတ်ႈၵွင်းမူးၼႂ်းဝၢၼ်ႈၼမ်ႉပႅၼ်ႈ ဢိူင်ႇပၢင်ႇလေႃႉ ၸႄႈဝဵင်း ၵျွၵ်ႉမႄးၼၼ်ႉ ဢွၵ်ႇပႅတ်ႈ ဝႃႈၼႆ။

ၵူၼ်းဝၢၼ်ႈၼမ်ႉပႅၼ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မၢၵ်ႇၼၼ်ႉ ပဵၼ်မၢၵ်ႇၽႂ် ၸုမ်းလႂ် ဢၼ်ဝႃႈၼၼ်ႉ ဢမ်ႇ လႆႈႁူႉ၊ ယဝ်ႉၵေႃႈ ပဵၼ်မၢၵ်ႇသႅၼ်းမဵဝ်းလႂ် ၼႆၵေႃႈ ဢမ်ႇႁူႉၸၵ်းၸိုဝ်ႈမၼ်း။ သိုၵ်းမၢၼ်ႈၶဝ် မႃးထွၼ် ဢွၵ်ႇပၼ် ၶႃႈ ဢေႃႈ။ မၢၵ်ႈၼၼ်ႉ ၶဝ်ဢမ်ႇဢဝ်မိူဝ်း၊ ႁဝ်းၶႃႈ ဢွၼ်ၵၼ်ၶုတ်းလုၵ်း တၢင်းလိုၵ်ႉမွၵ်ႈ 2 သွၵ်ႇသေ ဢဝ်မၢၵ်ႇၼၼ်ႉ ၾင်၊ ယဝ်ႉၵေႃႈ ဢဝ်ၵိူဝ်ထွၵ်ႇသႂ်ႇ၊ ဢဝ်လိၼ်ၵူမ်ဝႆႉ။ လိူဝ်ၼၼ်ႉ ဢဝ်ထူင်လိၼ် မွၵ်ႈ 20 ထူင်ပၢႆ သေ မေးတဵင် သႂ်ႇ ထႅင်ႈ လွမ်ႉႁွပ်ႈႁဵတ်းပဵၼ် 4 ၸဵင်ႇဝႆႉ” ဝႃႈၼႆ။

မၢၵ်ႇလူင်ဢၼ်သိုၵ်းမၢၼ်ႈမႃးထွၼ်ဢွၵ်ႇပၼ်ၼၼ်ႉ ၾင်ဝႆႉတၢင်းၾၢႆႇဢွၵ်ႇထၢတ်ႈ/ ၵွင်းမူး ၼမ်ႉပႅၼ်ႈ ယၢၼ် ၵႆ ထၢတ်ႈမွၵ်ႈ 15 ဝႃး ဝႃႈၼႆ။

ၵူၼ်းဝၢၼ်ႈ သိုပ်ႇလၢတ်ႈဝႃႈ “သိုၵ်းမၢၼ်ႈၶဝ်ဝႃႈတႄႉ မၢၵ်ႇၼၼ်ႉၾင်ဝႆႉၸိူင်ႉၼၼ်ၵေႃႈ ဢမ်ႇလႆႈမႆႈၸႂ်ၼႆဝႃႇ။ ပၢင် တိုၵ်းၼၼ်ႉ ပဵၼ်ဝၼ်းတီႈ 15/02/2019 ႁဝ်းၶႃႈၵေႃႈ ဢွၼ်ၵၼ်ပၢႆႈဢွၵ်ႇဝၢၼ်ႈၵႂႃႇလႄႈ မၢၵ်ႇၼၼ်ႉ တၼ်း မႃးတူၵ်း မိူဝ်ႈလႂ်ၵေႃႈ ဢမ်ႇႁူႉ။ ၽိူဝ်ႇႁဝ်းၶႃႈ ပွၵ်ႈမႃးတီႈဝၢၼ်ႈၶိုၼ်းၸင်ႇလႆႈႁၼ် မၢၵ်ႇၵွင်ႈလူင် ၶွၵ်ႇမၢၵ်ႇၵွင်ႈၽၢင်းၸိူဝ်းၼႆႉ တူၵ်းၸွမ်းႁိမ်းထၢတ်ႈတင်းၼမ်၊ မၢၵ်ႇလူင်တူၵ်းၶမ်ဝႆႉတီႈႁိမ်းထၢတ်ႈၼၼ်ႉ 1 လုၵ်ႈ။ ႁဝ်းၶႃႈ ဢမ်ႇႁတ်းပၼ်ႇၵႂႃႇ လဵပ်ႈၸမ်လႃးလႃးၶႃႈ မိူဝ်ႈသိုၵ်းမၢၼ်ႈပႆႇမႃးဢဝ်ဢွၵ်ႇၼၼ်ႉ” ဝႃႈၼႆ။

တႄႇဢဝ်ႁူဝ်လိူၼ်ၾႅပ်ႊၿိဝ်ႊရီႊ ဝၼ်းတီႈ 2 ၼႆႉမႃး သိုၵ်း SSPP တင်း RCSS ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၼႂ်း ၸႄႈဝဵင်းၵျွၵ်ႉမႄး ၵူၼ်းမိူင်း ၼပ်ႉႁဵင် လႆႈဢွၼ်ၵၼ်ပၢႆႈယၢၼ်ႁိူၼ်းယေး တီႈယူႇ။