ဢိင်ၼိူဝ် ၾိင်ႈႁိတ်ႈႁွႆး ၸၢဝ်းတႆး ၼႂ်းပိုၼ်ႉတီႈ ဝၢၼ်ႈမႂ်ႇမွၵ်ႇၸၢမ်သေ ဢွၼ်ၸတ်းႁဵတ်းမႃး ပၢင်ပွႆးယုၵ်ႉယွင်ႈၸဝ်ႈ ၶူးမေႃ လိၵ်ႈတႆး ပွၵ်ႈထူၼ်ႈ 43။
ဝၼ်းတီႈ 17-19/02/2019 ယူႇတီႈၵေႃၵမ်ၵၢၼ် ပွင်ပဵၼ်ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ဢွၼ်ႁူဝ်သေ ၸတ်း ႁဵတ်းပၢင်ပွႆးတီႈဝတ်ႉမွၵ်ႇၸၢမ် ဢိူင်ႇတႃႈတွၼ်း ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆး မီးပီႈၼွင်ႉၸၢဝ်းတႆး တီႈၸမ်/ ၵႆ ၶဝ်ႈႁူမ်ႈပၼ်ႁႅင်း တင်းၼမ် ဝႃႈၼႆ။
ၸၢႆးသႅင်ယ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ/ ၽူႈပွင်ၵၢၼ် ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး တီႈ ဝတ်ႉမွၵ်ႇၸၢမ် ၵေႃႈၸႂ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ဝၼ်းယုၵ်ႉယွင်ႈၸဝ်ႈၶူးမေႃလိၵ်ႈတႆး တီႈဝၢၼ်ႈမႂ်ႇမွၵ်ႇၸၢမ်ၼႆႉ ဢွၼ်တၢင်းၼၼ်ႉ တေဢၢၼ်းၸတ်းႁဵတ်း ၼႂ်းဝၼ်းတီႈ 7 လိူၼ်ၾႅပ်ႊၿိဝ်ႊရီႊ (ဝၼ်းၸိူဝ်ႉၸၢတ်ႈၸိုင်ႈတႆး ဢမ်ႇ ၼၼ် ဝၼ်းၶိူဝ်းတႆး) ပူၼ်ႉမႃး 43 ပီၼၼ်ႉ သမ်ႉမႅၼ်ႈဝၼ်းလိူၼ်သၢမ်မူၼ်းလႄႈ ၵူၺ်းၵႃႈ ယူႇတီႈမုၼ်ယႂ်ႇ ၸဝ်ႈႁေႃ ၶမ်းထႆး တူၼ်တီႈ 9 မႃးသူႇၸႂ်းသေလႄႈ မႃးပၵ်းပၼ်တီႈယူႇတီႈသဝ်း တီႈႁဵတ်းႁႃၵိၼ် ပၼ်ပီႈၼွင်ႉတႆး။ ယွၼ်ႉၼၼ် မႃးတေၸၢင်ႈတုမ်ႉတိူဝ်ႉၾၢႆႇသိုၵ်းလူင်ပွင်ၸိုင်ႈ သိုၵ်းမၢၼ်ႈ မိူဝ်ႈၽွင်းၼၼ်ႉ ပဵၼ်ပၢၼ်ၼေႇဝိၼ်း။ ၵမ်းၼႆႉ ယူႇတီႈ ၸဝ်ႈၼႃႈတီႈၾၢႆႇထႆးဝႃႈမၼ်းဢမ်ႇပေႃးသၢင်ႇထုၵ်ႇၼႆသေ ႁႂ်ႈလႆႈပဵၼ်တၢင်ႇလွင်ႈဢမ်ႇလီႁႃႉ ယွၼ်ႉၼၼ် ၸင်ႇဢဝ် ဝၼ်းလိူၼ်သၢမ်မူၼ်းၼၼ်ႉ ႁႂ်ႈမၼ်းပဵၼ်တၢင်း သၢႆၸႂ်ၸိူဝ်ႉၶိူဝ်း ၾိင်ႈငႄႈလိၵ်ႈလၢႆးၼႆလႄႈ ဢဝ်ပဵၼ်မႃး ဝၼ်းယုၵ်ႉ ယွင်ႈၸဝ်ႈၶူးမေႃ” ဝႃႈၼႆ။
ႁူမ်ႈဝႃႈ ဢမ်ႇမႅၼ်ႈၵၼ်တင်းၶၢဝ်းယၢမ်းဢၼ်မိူင်းတႆး ၸတ်းႁဵတ်း(ၼႂ်းလိူၼ်12 မႂ်ႇ 1 ၶမ်ႈ) ၼၼ်ႉသေတႃႉ ၵေႃႈ ယွၼ်ႉပဵၼ်တီႈတႆး မႃးၵေႃႇတင်ႈယူႇသဝ်း။ လိူဝ်ၼၼ်ႉ ၸဝ်ႈမုၼ်ယႂ်ႇႁေႃၶမ်းထႆးၵေႃႈ မႃးသူႇယဵမ်ႈၸႂ်း မႅၼ်ႈၼႂ်းဝၼ်း လိူၼ်သၢမ်မူၼ်းၵေႃႈၸႂ်ႈသေ ၸင်ႇဢဝ် ဝၼ်းလိူၼ်သၢမ်မူၼ်းၼႆႉ ႁဵတ်းပဵၼ်ဝၼ်း ယုၵ်ႉယွင်ႈၸဝ်ႈၶူးမေႃမႃးၵူႈပီ ဝႃႈၼႆ။
ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈထူၼ်ႈ 43 ပီၼႆႉ ၸတ်းႁဵတ်းပႃး ပၢင်ဢုပ်ႇၶႆႈ ပၼ်ပၢႆးႁူႉၼႂ်းႁူဝ်ၶေႃႈ ၵၢၼ် သွၼ်ႁဵၼ်းသင်ၶၸဝ်ႈ မႅတ်ႇပႅင်းပႂ်ႉပႃးၾိင်ႈငႄႈလိၵ်ႈလၢႆး လႆႈၸိူင်ႉႁိုဝ် – မီးၽူႈၵတ်ႉၶႅၼ်ႇလိၵ်ႈလၢႆးလၢႆလၢႆၸဝ်ႈ ၶဝ်ႈ ဢုပ်ႇၶႆႈပၼ်ပိုၼ်ႉႁူႉၵႂႃႇ ၼႂ်းဝၼ်းတီႈ 17/02/2019 ယၢမ်းဝၢႆးဝၼ်း 1 မူင်း။
ၸၢႆးသႅင်ယ လၢတ်ႈဝႃႈ “ ပီၼႆႉ ယူႇတီႈလုၵ်ႈႁဵၼ်းဝၢၼ်ႈမႂ်ႇမွၵ်ႇၸၢမ်ၵေႃႈ တုၵ်းယွၼ်းမႃး ၶႂ်ႈႁဵၼ်းႁူႉလိၵ်ႈတႆး။ လိူဝ် ၼၼ်ႉ မိူဝ်ႈပူၼ်ႉမႃး ပီ 2522 ၼၼ်ႉ ၸဝ်ႈမုၼ်ယႂ်ႇၶုၼ်ႁေႃၶမ်းထႆး မႃးမွၵ်ႇလၢတ်ႈဝႆႉဝႃႈ ႁဝ်းၶႃႈ ပဵၼ်ထႆးၼွႆႉ၊ သူၸဝ်ႈ သမ်ႉ ပဵၼ်ထႆးယႂ်ႇ၊ ႁဝ်းပဵၼ်ပီႈၼွင်ႉၵၼ် ႁဝ်းလူဝ်ႇလႆႈ ႁၵ်ႉသႃ ၾိင်ႈငႄႈႁိတ်ႈႁွႆးႁဝ်းလႄႈ ၽႃသႃၵႂၢမ်းလၢတ်ႈ ၵႂႃႇ ယိုၼ်း ယၢဝ်းမၼ်ႈၵိုမ်း။ ယွၼ်ႉၼၼ်လႄႈ ပီႈၼွင်ႉတီႈဝၢၼ်ႈမႂ်ႇမွၵ်ႇၸၢမ်ႁဝ်း ၸင်ႇႁူမ်ႈၵၼ်သၢင်ႈႁေႃၸဝ်ႈၶူးမေႃဝႆႉ။ လိူဝ် ၼၼ်ႉ မုၼ်ယႂ်ႇၶုၼ်ႁေႃၶမ်း လႆႈမႃးသၢင်ႈပၼ်ႁူင်းႁဵၼ်း” ဝႃႈၼႆ။
ၼႂ်းဝၼ်းတီႈ 18/02/2019 ယၢမ်းၵၢင်ၶမ်ႈၼၼ်ႉ ယူႇတီႈႁူဝ်ပဝ်ႈပွင်ပဵၼ်ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ၵၢဝ်ႇ လၢတ်ႈၼႄ လၢႆးငၢၼ်းသေ ယူႇတီႈၽူႈၵွၼ်းၸႄႈဝဵင်းမႄႈဢၢႆး မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ပွႆးၵႂႃႇ ဝႃႈၼႆ။
လိူဝ်ၼၼ်ႉ တီႈပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈထူၼ်ႈ 43 ၼႆႉ ၸတ်းႁဵတ်းပႃး ပၢင်လိူၵ်ႈၼၢင်းသၢဝ်လဝ်း/ ၼၢင်း ငၢမ်း ဢမ်ႇၼၼ် ဢၼ်သႂ်ႇၸိုဝ်ႈဝႃႈ လုၵ်ႈယိင်းသၢဝ်ၼၢင်းၶမ်းၵူႇ။ လူႁေႃးလိၵ်ႈလင်ႇၵႃႇလိၵ်ႈလူင် ဢၼ်ၸဝ်ႈ ၶူးမေႃ တင်း 10 ၸဝ်ႈတႅမ်ႈမၢႆဝႆႉၼၼ်ႉသေ ၸတ်းႁဵတ်းပႃးထႅင်ႈပၢင်ၶေႉၶဵင်ႇလဵၼ်ႈႁႅင်းပႃးထႅင်ႈ ဝႃႈၼႆ။
ၵေႃၵမ်ၵၢၼ် ပွင်ပဵၼ်ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈထူၼ်ႈ 43 ၼႆႉ ယူႇတီႈသၢမ်ၸႄႈဝဵင်း မိူၼ်ၼင်ႇ မႄႈ ဢၢႆး၊ မိူင်းၾင်လႄႈ ၶျၢႆးပရႃႇၵၢၼ်း ႁူမ်ႈၵၼ်သေ ၶွတ်ႇၽွတ်ႈဝႆႉ ဝႃႈၼႆ။
ၼႂ်းပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး တီႈဝၢၼ်ႈမႂ်ႇမွၵ်ႇၸၢမ် ပီၼႆႉ မီးလုၵ်ႈႁဵၼ်း ၸၼ်ႉၸွမ်ၵဵင်းတုင်၊ ပီႈၼွင်ႉတႆး ၵဵင်းမႆႇ၊ ၵုင်းထဵပ်ႈ(မိူင်းၵွၵ်ႇ)၊ မႄႈသွတ်ႇ၊ မႄႈႁွင်ႈသွၼ်၊ မိူင်းၾၢင်၊ မႄႈဢၢႆး၊ ၶျႆးပရႃႇၵၢၼ်းလႄႈ ဢိၵ်ႇထႅင်ႈလၢႆလၢႆတီႈ ၶဝ်ႈႁူမ်ႈ ၸွႆႈထႅမ် တင်းၼမ်လၢႆ ဝႃႈၼႆ။
ပီႈၼွင်ႉတႆး ၶဝ်ႈမႃးပၵ်းတင်ႈတီႈယူႇတၼ်းသဝ်း ၼႂ်းမိူင်းထႆး တီႈဝၢၼ်ႈမႂ်ႇမွၵ်ႇၸၢမ် မိူဝ်ႈၽွင်းပီ 1962 ။ ထိုင်မႃးမိူဝ်ႈ 19 လိူၼ်ၵျႅၼ်ႊၼိဝ်ႊရီႊ 1973 ၸဝ်ႈမုၼ်ယႂ်ႇၶုၼ်ႁေႃၶမ်းထႆး (တူၼ်ႈတီႈ 9) မႃးယဵမ်ႈသူႇၸႂ်း ပီႈၼွင်ႉတႆး တီႈဝၢၼ်ႈ မႂ်ႇမွၵ်ႇၸၢမ်၊ မႃးပၼ်တၢင်းၶႆႈၸႂ်လႄႈ ပၼ်တိုဝ်ႉတၢင်း ၸတ်းပၢင်ပွႆးယုၵ်ႉယွင်ႈ ၸဝ်ႈၶူးမေႃလိၵ်ႈတႆး။ တင်ႈတႄႇပၢၼ် ၼၼ်ႉမႃး ၸတ်းမႃးၵူႈသိုပ်ႇပီသေ ထိုင်ပီ 2019 ၼႆႉ ၶွပ်ႈထူၼ်ႈ 43 ပီ။
