ႁႅင်းၵၢၼ်တႆး (ၵဵင်းမႆႇ) ၵႂႃႇၶဝ်ႈႁူမ်ႈပွႆးပၢင်ၶႅၵ်ႇ ၵႂႃႇပဵၼ်ၽေးၵိုင့်ၵၢင့်ၵႃးပိၼ်ႈ လႆႈမၢတ်ႇၸဵပ်း 3 ၵေႃ့ လူ့တၢႆ 1 ၵေႃ့ ။
ဝၼ်းတီႈ 17/02/2019 ၶၢဝ်းယၢမ်းၵၢင်ၼႂ်မွၵ်ႈ 10 မူင်း ရူတ့်ၵႃးဢၼ်ႁႅင်းၵၢၼ် 4 ၵေႃ့ ၶပ်းၶီႇမႃးၼၼ့်လႆႈပဵၼ် ၽေးၵိုင့်ၵၢင့် ၵႃးပိၼ်ႈၼိူဝ်သဵၼ်ႈတၢင်း ဢိၼ်ႊထၼုၼ်ႊ – မႄႈၸႅမ်ႇ ဝၢၼ်ႈသၼ်ႊၽတ်ႊထၼႃႊ မူႇတီႈ 19 ဢိူင်ႇၶျၢင်ႊၶိူင်ႊ ၸႄႈဝဵင်းမႄႈၸႅမ်ႇ ၸႄႈတွၼ်ႈၵဵင်းမႆႇ ၸိုင်ႈထႆး ။ ၸိူဝ်းၶဝ်လုၵ့်တၢင်း ၸႄႈဝဵင်းသႃႊရၽီႊ ပိူဝ်ႈတေ ၵႂႃႇႁူမ်ႈပွႆးပၢင်ၶႅၵ်ႇတီႈဝဵင်းမႄႈၸႅမ်ႇ။
ယွၼ့်ပိူဝ်ႈၵႃးပိၼ်ႈသေ ႁဵတ်းႁႂ်ႈၼၢင်းၾူၼ် ဢႃယု 50 ပီ ၵူၼ်းမိူင်းၵိုင်လူ့တၢႆ၊ ၸၢႆးၶမ်း ဢႃယု 47 ပီ ၵူၼ်း လၢင်းၶိူဝ်းမၢတ်ႇၸဵပ်းႁၢဝ်ႈႁႅင်း မိူဝ်ႈလဵဝ်ယူတ်းယႃတူဝ်ဝႆ့တီႈ ႁူင်းယႃထဵပ်ႊပၼ်ႊယႃႊ ၊ ၸၢႆးၶိူဝ်း ဢႃယု 29 ပီ၊ ၸၢႆးဢႃးၵွၼ်း ၽတ့်ထၼႃးၵွၼ်း ဢႃယု 39 ပီ ၸိူဝ်းၼႆ့ မၢတ်ႇၸဵပ်းဢိတ်းဢွတ်း။
ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ မိူဝ်ႈလဵဝ်ၼႆ့ ၶႃႈႁဝ်းတိုၵ့်ၵႂႃႇတီႈ ႁူင်းပလိၵ်ႈမႄႈၸႅမ်ႇယူႇဢေႃႈ တႃႇဢုပ်ႇဢူဝ်းလွင်ႈဢမုၶၻီႊၼႆ့ ၊ ဝႃႈတေလႆႈႁပ့်သုၼ်ႇလႆႈၵႃႈသၢႆႈတႅၼ်းၸိူင့်ႁိုဝ် ၽွင်ႈၸိူဝ်းၼႆ့ဢေႃႈ၊ ၽေးၵိုင့်ၵၢင့်ပွၵ်ႈၼႆ့ ပဵၼ်ယွၼ့်ပရိၵ်ႈရူတ့်ၵႃး( brake) မၼ်းတႅၵ်ႇ ဢမ်ႇၸႂ်ႈဝႃႈႁေႃႈဝႆးၶႃႈ ၊ ၸိူင့်ႁိုဝ်ၵေႃႈယဝ့် တေၵႂႃႇလႂ်မႃး လႂ်ၵေႃႈယွၼ်းႁႂ်ႈ ပီႈၼွင့်ႁဝ်းဝႆ့ၾၢင့်သတိၵၼ်ၼမ်ၼမ်သေၵမ်းၶႃႈ” ဝႃႈၼႆ။
မိူဝ်ႈလဵဝ်ယူႇတီႈၸဝ်ႈၼႃႈတီႈၽူႈမီးပုၼ်ႈၽွၼ်း တေဢုပ်ႇဢူဝ်းၵၼ်သေ ထတ်းႁႃလွင်ႈ တၢင်းပိူင်ပဵၼ်မၼ်းသေ ၶပ်းၶိုင်ၵႂႃႇၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ့်ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ