ၵူၼ်းဝၢၼ်ႈ ၼွင်ၵႂၢင် တင်း ၶွၵ်ႈဝူဝ်း ဢွၼ်ၵၼ်ပၢႆႈၶဝ်ႈဝဵင်းၵျွၵ်ႉမႄး ႁူဝ်ၵူၼ်း 50 ပၢႆ တေႃႈလဵဝ် ႁွတ်ႈၽႅဝ်ဝႆႉ တီႈဝတ်ႉ ၵျွင်းယွတ်ႈ ယွၼ်ႉတပ်ႉသိုၵ်း RCSS လႄႈ ၸုမ်းဢူၺ်းလီပွတ်းႁွင်ႇ ၶဵင်ႈၶႅင်ၵၢၼ်သိုၵ်းၵၼ်။

မိူဝ်ႈၼႆႉ ဝၼ်းတီႈ 15/02/2019 ယၢမ်းၵၢင်ဝၼ်း 11 မူင်း ၵူၼ်းဝၢၼ်ႈၼွင်ၵႂၢင် တင်း ဝၢၼ်ႈၶွၵ်ႈဝူဝ်း ဢွၼ်ၵၼ်ပၢႆႈ သွၼ်ႈဝႆႉတီႈဝတ်ႉၵျွင်းယွတ်ႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ယွၼ်ႉငဝ်းလၢႆးၼႂ်းပိုၼ်ႉတီႈ ဢမ်ႇၼိမ်သဝ်း သေ ၵူၼ်းဝၢၼ်ႈၵူဝ်ပဵၼ်ပၢင်တိုၵ်း ဢွၼ်ၵၼ်ငိူင်ႉပၢႆႈဢွၵ်ႇမႃး ဝႃႈၼႆ။

ၵူၼ်းဝၢၼ်ႈၶွၵ်ႈဝူဝ်း ဢၼ်ပၢႆႈႁွတ်ႈၽႅဝ် တီႈဝတ်ႉၵျွင်းယွတ်ႈလၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ႁဝ်းၶႃႈ ၶီႇထူဝ်ႈမႃး ဢွၵ်ႇမႃး 2 လမ်းၶႃႈ။ ယွၼ်ႉသိုၵ်းၶဝ် လဵပ်ႈႁိမ်းၸမ် ဝၢၼ်ႈႁဝ်းၶႃႈလႄႈ ႁဝ်းၶႃႈ ၵူဝ်ၶဝ်ပဵၼ်ပၢင် တိုၵ်းၵၼ်သေ ၼႅတ်ႈ ပၢႆႈဢွၵ်ႇမႃးထႃႈဢွၼ်တၢင်းၶႃႈ။ မိူဝ်ႈၼႆႉ ႁဝ်းၶႃႈ ဢွၼ်ၵၼ်ပၢႆႈဢွၵ်ႇမႃး ၸဵမ်ၵူၼ်းလူင် လုၵ်ႈ ဢွၼ်ႇ ႁူမ်ႈၵၼ်တင်း မူတ်း တေမီး 50 ပၢႆၶႃႈ” ဝႃႈၼႆ။

ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ၵူၼ်းပၢႆႈၽေးသိုၵ်းႁဝ်းၶႃႈတႄႉ ပႆႇၸၢင်ႈၵဵပ်းႁူဝ်ယွႆႈမၼ်းၶႃႈ မၢင်ဝၢၼ်ႈပွၵ်ႈမိူဝ်း၊ မၢင်ဝၢၼ်ႈတိုၵ်ႉမႃး။ မိူဝ်ႈဝႃးတႄႉ ၵူၼ်းဝၢၼ်ႈၼမ်ႉပႅၼ်ႈ ၶိုၼ်းဢွၼ်ၵၼ်ပွၵ်ႈမိူဝ်း၊ မိူဝ်ႈၼႆႉသမ်ႉ ၵူၼ်းဝၢၼ်ႈပၢင်ႇလေႃႉ တေဢွၼ် ၵၼ် ပွၵ်ႈမိူဝ်းထႅင်ႈ။ မိူဝ်ႈၵႆႈၼႆႉသမ်ႉ ၵူၼ်းဝၢၼ်ႈၼွင်ၵႂၢင်လႄႈ ၶွၵ်ႈဝူဝ်း ႁွတ်ႈထိုင်မႃး။ တေလႆႈဝႃႈ ၵူၼ်း ဝၢၼ်ႈၵေႃႈလႆႈ ယူႇၵိၼ်ၸွမ်းငဝ်းလၢႆးၸုမ်းယိပ်းၵွင်ႈ။ ပေႃးသိုၵ်းထွၼ် ၵူၼ်းမိူင်းပွၵ်ႈမိူဝ်း။ ပေႃးသိုၵ်းတူင်ႉၼိုင် ၵႂႃႇ တၢင်းဝၢၼ်ႈၵူၼ်း ၵူၼ်းဝၢၼ်ႈႁိမ်းႁွမ်း ၸိူဝ်းၼၼ်ႉသမ်ႉ ပၢႆႈဢွၵ်ႇမႃးႁဵတ်းၼၼ်” ဝႃႈၼႆ။

ၵူၼ်းပၢႆႈၽေးသိုၵ်း ဢၼ်မီးတီႈဝတ်ႉၼမ်ႉၸဵတ်းလိၼ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ တီႈဝတ်ႉၼႆႉ ႁူဝ်ၵူၼ်း တင်းမူတ်း ပႃးလုၵ်ႈဢွၼ်ႇ ၵူၼ်းလူင် တေမီး 400 ပၢႆၶႃႈယဝ်ႉ။ ၵူၼ်းၵေႃႈၼမ်၊ တီႈယူႇတီႈၼွၼ်းယၢပ်ႇၽိုတ်ႇ။ ဢၼ် ယၢပ်ႇၽိုတ်ႇလိူဝ်ႁႅင်းတႄႉ လွင်ႈၼမ်ႉၸႂ်ႉ တီႈဢွၵ်ႇၼွၵ်ႈဢွၵ်ႇပၢင်ႇ ၸိူဝ်းၼႆႉၶႃႈ” ဝႃႈၼႆ။

တေႃႈလဵဝ် ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈၼႂ်းဝဵင်းၵျွၵ်ႉမႄးသမ်ႉ မိူၼ်ၼင်ႇ ဝတ်ႉၵျွင်းယွတ်ႈ၊ ဝတ်ႉၼမ်ႉ ၸဵတ်းလိၼ်း၊ ဝတ်ႉဢွင်ႇသုပၢၼ်ႇလႄႈ ၸွမ်းႁိူၼ်းပီႈၼွင်ႉၽႂ်မၼ်း ၵမ်ႈၽွင်ႈ ၼႂ်းဝဵင်း ၸဵမ်ၸိူဝ်းၼႆႉ။ မိူဝ်ႈပူၼ်ႉမႃး 2-3 ဝၼ်းၼၼ်ႉ ႁူဝ်ၵူၼ်းပၢႆႈၽေးသိုၵ်း ဢမ်ႇယွမ်း 1,000 ၵေႃႉ ဝႃႈၼႆ။

ယွၼ်ႉသိုၵ်း ဢူၺ်းလီပွတ်းႁွင်ႇလႄႈ RCSS ပဵၼ်ပၢင်တိုၵ်းၵၼ် တႄႇဢဝ်ဝၼ်းတီႈ 9 လိူၼ်ၼႆႉမႃး ဝႃႈၼႆ။

ၼႂ်းၸႄႈဝဵင်းၵျွၵ်ႉမႄးၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃး မိူၼ်ၼင်ႇ တပ်ႉသိုၵ်းလူင်ပွင်ၸိုင်ႈမၢၼ်ႈ၊ သိုၵ်းတဢၢင်း၊ သိုၵ်းဝၢၼ်ႈႁႆးလႄႈ သိုၵ်းလွႆတႆးလႅင်း ၸိူဝ်းၼႆႉ ဝႃႈၼႆ။