ၾႆးမႆႈႁိူၼ်းၵူၼ်းမိူင်း ဝၢၼ်ႈၵွင်းမူး ၸႄႈဝဵင်းမိူင်းၽျၢၵ်ႈလင်ၼိုင်ႈ ယွၼ်ႉမေႃႈၾႆးပႅတ်ႊထရီႊ ဢၼ်ၵဵပ်းၾႆးသႅင် လႅတ်ႇဝႆႉ ၼၼ်ႉ မႆႈႁႅင်းသေ ၸင်ႇလုၵ်ႉမႆႈႁိူၼ်း ဝႃႈၼႆ။

ဝၼ်းတီႈ 14/02/2019 ယၢမ်းၵၢင်ၼႂ် 10 မူင်းပၢႆ ၾႆးမႆႈႁိူၼ်း ဢူးဢႃးၼိူဝ်ႇ ၸၢဝ်းလႃးႁူႇ တီႈဝၢၼ်ႈၵွင်းမူး ဢိူင်ႇၵွင်းမူး ၸႄႈဝဵင်းမိူင်းၽျၢၵ်ႈ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ ၾႆးလုၵ်ႉႁုပ်ႇမႆႈတင်းလင် လွင်ႈၵူၼ်းမၢတ်ႇ ၸဵပ်းဢမ်ႇမီးၶူဝ်းၶွင်တႄႉ ဢမ်ႇတၼ်းလႆႈသင် ဝႃႈၼႆ။

ၸၢႆးၶမ်းၸၼ် ႁူဝ်ပဝ်ႈ ပႃႇတီႇသိူဝ်ၽိူၵ်ႇ ၸႄႈဝဵင်းမိူင်းၽျၢၵ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်မေႃႈပႅတ်ႊထရီႊၵဵပ်း ၾႆး သူဝ်ႇလႃႇပျႃး။ မႆႈႁႅင်းသေ ၾႆးမႆႈႁိူၼ်း။
ႁိူၼ်းၶဝ်ၼၼ်ႉ ပဵၼ်ႁိူၼ်းမႆႉၶႃႈဢေႃႈ။ လွင်ႈၶူဝ်းၶွင်တႄႉ ဢမ်ႇတၼ်း လႆႈသင်၊ လွင်ႈၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး၊ လွင်ႈၾႆးသူဝ်ႇလႃႇပျႃးၼႆႉ ပွၵ်ႈၼႆႉ ပဵၼ်ပွၵ်ႈၵမ်းႁႅၵ်ႈ ၶႃႈယဝ်ႉ” ဝႃႈၼႆ။

လိူဝ်ၼၼ်ႉ ၼႂ်းဝၼ်းလဵဝ်ၵၼ်ၵူၺ်း တီႈပွၵ်ႉၵျွင်းၵျီးၸု ၸႄႈဝဵင်းတူၼ်ႈတီး ယၢမ်းၵၢင်ၶမ်ႈ 6 မူင်းၶိုင်ႈၼၼ်ႉၵေႃႈ ၾႆးမႆႈႁိူၼ်းၵူၼ်းဝၢၼ်ႈလင်ၼိုင်ႈ ယွၼ်ႉသၢႆၾႆးမေႃႈၶဝ်ႈ ဢၼ်တိုၵ်ႉႁုင်ၶဝ်ႈဝႆႉၼၼ်ႉ ပဵၼ်သျွတ်ႉသေမႆႈႁိူၼ်း မယဵၼ်ႇယဵၼ်ႇဝိၼ်း ဢႃယု 35 ပီ ဝႃႈၼႆ။

ၵဵဝ်ႇၵပ်းလွင်ႈၼႆႉ လွင်ႈၵူၼ်းလူႉတၢႆ မၢတ်ႇၸဵပ်းဢမ်ႇမီး။ ၵူၺ်းၵႃႈ ၶူဝ်းၶွင်ၼႂ်းႁိူၼ်းယေးတႄႉ လႆႈလူႉသုမ်း ၸွမ်း ၾႆးမႆႈ တင်းၼမ် ဝႃႈၼႆ။

တေႃႈလဵဝ် ယူႇတီႈၽူႈမီးပုၼ်ႈၽွၼ်း ပလိၵ်ႈၶဝ်လႆႈဢဝ်လိူင်ႈလၢဝ်း ၸဝ်ႈႁိူၼ်းဝႆႉ ၸွမ်းၼင်ႇမၢႆမီႈဝၢၼ်ႈမိူင်းမီး ၼၼ်ႉဝႃႈၼႆ။