မၢၵ်ႇတႅၵ်ႇႁိမ်းၶၢင်ႈတၢင်းလူင် ဝဵင်းလိူဝ်ႇ – မူႇၸေႊ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ တႅၵ်ႇတိူဝ်ႉသႂ်ႇၵႃး 12 လေႃႉလမ်းၼိုင်ႈ လွင်ႈမၢတ်ႇၸဵပ်းလူႉတၢႆ တႄႉဢမ်ႇမီး ဝႃႈၼႆ။
မိူဝ်ႈၼႆႉ ဝၼ်းတီႈ 14/02/2019 ယၢမ်းၵၢင်ၼႂ် မၢၵ်ႇတႅၵ်ႇတိူဝ်ႉသႂ်ႇရူတ်ႉၵႃး 12 လေႃႉ ၼႂ်းၵႄႈဝၢၼ်ႈ ၸၢမ်လဝ်း လႄႈ ဝၢၼ်ႈၵုင်းသႃႇ ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
ၸၢႆးသႅင် ၵူၼ်းဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်ၵႃးတၢင်ႇၵုၼ်ႇ 12 လေႃႉ လုၵ်ႉမၼ်းတလေး ၶိုၼ်ႈမႃး တေၵႂႃႇတၢင်းမူႇၸေႊ။ မၢၵ်ႇတႅၵ်ႈ တိူဝ်ႉၺႃးတွၼ်ႈတၢင်းလင်ၵႃးၵူၺ်း။ ၵႃးလမ်းၼၼ်ႉ သိုပ်ႇၵႂႃႇ ထႅင်ႈ လႆႈယူႇၶႃႈ ။ ဢမ်ႇပေႃးတိူဝ်ႉႁႅင်း ။ လွင်ႈ ၵူၼ်းမၢၵ်ႇၸဵပ်းလူႉတၢႆၵေႃႈ ဢမ်ႇမီး” ဝႃႈၼႆ။
ၵူၼ်းပိုၼ်ႉတီႈသီႇပေႃႉ လၢတ်ႈဝႃႈ မၢၵ်ႇၼႆႉ ပဵၼ်ၸုမ်းလႂ် ၵေႃႉလႂ်ႁၢင်ႈၵၢင်ဝႆႉ ဢၼ်ဝႃႈၼၼ်ႉ ပႆႇႁူႉ။ ၸုမ်း ယိပ်းၵွင်ႈၵၢင်ႇၵေႃႈၼမ်၊ ၸုမ်းၵႃႉယႃႈၵေႃႈၼမ် ၊ တေႃႈလဵဝ် ယူႇတီႈၽူႈမီးပုၼ်ႈၽွၼ်းၾၢႆႇပလိၵ်ႈၶဝ် တိုၵ်ႉထတ်းယူႇလွင်ႈတၢင်းပိူင်ပဵၼ်မႃးယူႇ ဝႃႈၼႆ။
ၸၢႆးသႅင် သိုပ်ႇလၢတ်ႈထႅင်ႈဝႃႈ “ တေႃႈလဵဝ် ၼႂ်းဝဵင်းသီႇပေႃႉႁဝ်းၶႃႈၼႆႉ ဢမ်ႇမီးလွင်ႈႁူမ်ႇလူမ်ႈယဝ်ႉၶႃႈ ။ ၸုမ်းယိပ်းၵွင်ႈၵၢင်ႇ ၵေႃႈၼမ်။ သူၼ်ႈသဵၼ်းသၢၼ်ၵၼ်မူတ်း ၸုမ်းလႂ် ပဵၼ်ၸုမ်းလႂ် ဢီႈသင်လၢႆလၢႆၵေႃႈဢမ်ႇႁူႉယဝ်ႉ” ဝႃႈၼႆ။
တေႃႈလဵဝ် ၼႂ်းၸႄႈဝဵင်းသီႇပေႃႉၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးတင်းၼမ် မိူၼ်ၼင်ႇ တပ်ႉသိုၵ်းလူင်ပွင် ၸိုင်ႈမၢၼ်ႈ၊ သိုၵ်းဢူၺ်းလီပွတ်းႁွင်ႇလႄႈ RCSS ၸဵမ်ၸိူဝ်းၼႆႉ ဝႃႈၼႆ။
