သင်ၶၸဝ်ႈလႄႈ တၵ်ႉၵႃႇ ၸၢဝ်းတႆး တီႈၵုင်းထဵပ်ႈ/ မိူင်းၵွၵ်ႇ တေႁူမ်ႈၵၼ် ၸတ်းႁဵတ်းပၢင်ပွႆးလူႇတၢၼ်းလွင်းသွမ်း သၢၼ် လုၵ်ႈႁဵၼ်းသင်ၶၸဝ်ႈတႆး ပွၵ်ႈၵမ်းထူၼ်ႈ 3 ဝႃႈၼႆ။

ပေႃးထိုင်မႃး ဝၼ်းတီႈ 17/02/2019 ယၢမ်းၵၢင်ၼႂ် 8:30 မူင်းၸိုင် ယူႇတီႈသင်ၶၸဝ်ႈလႄႈ တၵ်ႉၵႃႇသတ်ႉထႃး ပီႈၼွင်ႉ တႆး ႁူမ်ႈၵၼ်သေ တေၸတ်းႁဵတ်းပၢင်ပွႆးလူႇတၢၼ်းလွင်းသွမ်းသၢၼ် လုၵ်ႈႁဵၼ်းသင်ၶတႆး 175 တူၼ်။ ပၢင်လူႇ တၢၼ်းလွင်းသွမ်းသၢၼ်ပွၵ်ႈၼႆႉ ပွၵ်ႈၵမ်း ထူၼ်ႈ 3 တေႁဵတ်းတီႈဝတ်ႉမႂ်ႇတႆး သႃထုပရႃႇတိတ်ႇ သွႆး 44/1 ယၼ်းၼႃး ဝႃး ၵုင်းထဵပ်ႈ/ မိူင်းၵွၵ်ႇ ၸိုင်ႈထႆး ဝႃႈၼႆ။

ၸဝ်ႈၶူးၶမ်းလႅင်း ၶေႇမိၼ်ႇတ လုၵ်ႈႁဵၼ်းၸၼ်ႉၸွမ် ABAC ၵုင်းထဵပ်ႈ ဢၼ်ပဵၼ်ၽူႈၸွႆႈ ပွင်ၵၢၼ် ၸဝ်ႈၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ပိူင်ၼိုင်ႈၵေႃႈပၢင်ပွႆးလွင်းသွမ်းၼႆႉ ပဵၼ်ၾိင်ႈထုင်းၸၢဝ်းပုတ်ႉလႄႈ ႁႂ်ႈပီႈၼွင်ႉတႆး ႁဝ်း မေႃႁူႉမေႃတွင်းသေလႆႈလူႇလႆႈတၢၼ်းၵၼ်။ ထႅင်ႈလွင်ႈၼိုင်ႈ ၽူႈႁပ်ႉတၢင်းလူႇၼႆႉ သမ်ႉပဵၼ်သင်ၶတႆးၵူၺ်းဢမ်ႇ ၵႃး၊ ပဵၼ်လုၵ်ႈႁဵၼ်းၸၼ်ႉၸွမ်ထႅင်ႈ။ ၵွပ်ႈၼၼ် ပၢင်လူႇတၢၼ်းလွင်းသွမ်းၼႆႉ တေလႆႈဝႃႈလူႇတၢၼ်း ၵေႃႈၸႂ်ႈ ဢၼ် ၼႆႉ ပဵၼ်ၵၢၼ်ၵုသူလ် မိူၼ်လူႇတၢၼ်း Scholarship ၵမ်ႉထႅမ်ၵၢၼ်ႁဵၼ်းၵေႃႈပႃး၊ ပေႃးဢဝ်ၼႂ်း မင်ၵလႃ သုတ်ႈဝႃႈ ၵေႃႈ ၵၢၼ်ၵမ်ႉထႅမ်ၸိူဝ်းၼႆႉ ႁွင်ႉဝႃႈၺႃႇတၵႃၼၼ်ၸသင်ၵႁ ၸွႆႈၵမ်ႉထႅမ်ၵၢၼ်ၸိူဝ်ႉၶိူဝ်းၼႆႉ ပဵၼ်ၵၢၼ်လီပိူင် ၼိုင်ႈ” ဝႃႈၼႆ။

သိုပ်ႇလၢတ်ႈဝႃႈ “ ယွၼ်းမွၵ်ႇထိုင် ပီႈၼွင်ႉတၵ်ႉၵႃႇသတ်ႉထႃး တီႈၸမ်ၵႆ ဢၼ်မီး ၼႂ်းၵုင်းထဵပ်ႈၵူႈၵေႃႉ ၵူႈၵူၼ်းသေ ဢမ်ႇၵႃး တၢင်ႇၸႄႈတွၼ်ႈ ၸႄႈဝဵင်း ပေႃးတေလႆႈလူႇမႃးတၢၼ်း ႁႂ်ႈလႆႈပဵၼ်ၵူႇသူလ်ၼႃးမုၼ်ၵႂႃႇၸွမ်းၵၼ်သေ ဢမ်ႇ ၵႃး လိူဝ်ၼၼ်ႉ ႁႂ်ႈႁဝ်းပီႈၼွင်ႉတႆး၊ ႁႅင်းၵၢၼ်တႆး ပေႃးတေလႆႈၶဝ်ႈဢွၵ်ႇမိုတ်ႈၵိုတ်းၸမ်ၸႂ်၊ ၸွႆႈထႅမ်ၵၼ်” ဝႃႈၼႆ။

ပၢင်ပွႆးလူႇတၢၼ်းလွင်းသွမ်းသၢၼ် လုၵ်ႈႁဵၼ်းသင်ၶၸဝ်ႈ 175 တူၼ်ၼႆႉ ယူႇတီႈသင်ၶၸဝ်ႈၶဝ် ဢွၼ်ႁူဝ်သေ ၸတ်းႁဵတ်းမႃးထပ်းၵၼ် မီး 3 ပီ ပႃးပီၼႆႉယဝ်ႉ ဝႃႈၼႆ။